မဲခေါင်၊ အောက်တိုဘာ ၁၁
ရှမ်းတောင် အခြေစိုက် (၁၀၀၈) တပ်ရင်း-SSRY မှ ရဲဘော် ၂၃ ဦး ကရင်နီ အမျိုးသား ကာကွယ်ရေးတပ်ဖွဲ့-KNDF သို့ အောက်တိုဘာလ ၈ ရက်က ပြောင်းရွှေ့ တာ၀န် ထမ်းဆောင်နေတယ်လို့ KNDF တပ်ရင်း (၂) က ဒီကနေ့ ထုတ်ပြန် အသိပေးလိုက်ပါတယ်။
ရှမ်းတောင် (၁၀၀၈) တပ်ရင်းမှာ တပ်ထောက်အဖြစ် တာ၀န်ယူခဲ့သူ အပါအ၀င် ရဲဘော် ၂၃ ဦး KNDF ထံ ပြောင်းရွှေ့ တာ၀န် ထမ်းဆောင်နေတာ ဖြစ်တယ်လို့ ဆိုပါတယ်။
“ဘာကြောင့်ရယ်မှ မဟုတ်ပါဘူး။ စုပေါင်း စစ်ရေး ဦးဆောင်မှုကို ခံယူလိုတဲ့ ရည်ရွယ်ချက်ပါပဲ။ တခြားတော့ ပြောစရာ မရှိပါဘူး” လို့ KNDF ပြန်ကြားရေး တာ၀န်ရှိသူ တစ်ဦးက ရှင်းပြပါတယ်။
အမှတ် (၁၀၀၈) တပ်ရင်းဟာ NUG အစိုးရ၊ ကာကွယ်ရေး၀န်ကြီးဌာန၊ အမှတ် (၃) စစ်ဒေသအတွင်း တာ၀န် ထမ်းဆောင်နေပြီး ရှမ်း-ကရင်နီနယ်စပ်မှာ KNDF အပါအ၀င် တော်လှန်ရေးတပ်ဖွဲ့တွေနဲ့အတူ စစ်ဆင်ရေးတွေ ဆောင်ရွက်နေတဲ့ တပ်ရင်း ဖြစ်ပါတယ်။
အခုလို ရဲဘော် ၂၃ ဦး KNDF ထံ ပြောင်းရွှေ့ တာ၀န်ထမ်းဆောင်ရတဲ့ အကြောင်းရင်းကို (၁၀၀၈) တပ်ရင်းထံ မဲခေါင်သတင်းဌာနက ဆက်သွယ်မေးမြန်းဖို့ ကြိုးစားပေမဲ့ ဆက်သွယ်လို့ မရသေးပါဘူး။
KNDF တပ်ရင်း (၂) ကတော့ ပြောင်းရွှေ့လာတဲ့ ရဲဘော် ၂၃ ဦးကို စစ်သင်တန်း ပြန်လည်တက်ရောက်စေပြီး ကိုယ်ပိုင် နံပါတ်ပေးတာ၊ ယူနီဖောင်းနဲ့ တပ်တံဆိပ်ပေးတာ၊ ကတိသစ္စာခံယူတာတွေ ပြုလုပ်ပေးခဲ့ပြီး လက်ရှိ တာ၀န်တွေ ပေးအပ်ထားတယ်လို့ ထုတ်ပြန်ချက်မှာ ဖော်ပြထားပါတယ်။
MK-007
#MekongNews
#(၁၀၀၈)_တပ်ရင်း
#KNDF
#စစ်သင်တန်း
