မဲခေါင်၊ စက်တင်ဘာ ၂၉

ကရင်နီပြည်နယ်၊ ဒီးမော့ဆိုမြို့နယ်၊ ဒေါရောက်ခူကျေးရွာနဲ့ စစ်ဘေးရှောင် စခန်းတွေမှာ အလှူရှင် မရှိတာ တစ်နှစ်ကျော်ကြာပြီးနောက် ဆန်ပြတ်လပ်လာတယ်လို့ ဒီးမော့ဆို ဒေသခံတွေက ပြောပါတယ်။

ပြီးခဲ့တဲ့ ၂၀၂၂ ခုနှစ်၊ ဇူလိုင်လ ကတည်းက အလှူရှင်တွေ လာရောက်မှု မရှိတော့တာဖြစ်ပြီး လတ်တလော ဆန်မလုံလောက်မှုကြောင့် ရွာခံနဲ့ စစ်ဘေးရှောင်တွေဟာ ထမင်းတစ်နပ် လျှော့စားနေရတယ်လို့ ဆိုပါတယ်။

“၆ လပိုင်းလောက် ကတည်းက ဆန်တွေ ပြတ်သလောက် ဖြစ်နေပြီ။ သူတို့ လူကြီးပိုင်းတွေကတော့ ထမင်းတစ်နပ် လျှော့စားရတာပေါ့။ အဲဒါမှလည်း ကလေးတွေအတွက် အဆင်ပြေမှာ။ ကျနော်တို့လည်း ကိုယ်ထူကိုယ်ထ အဖွဲ့အစည်းဆိုတော့ အများကြီး မကူနိုင်ဘူးပေါ့နော်။ အလှူရှင်တွေ လာမှပဲ အဆင်ပြေမှာပေါ့” လို့ ကူညီဆောင်ရွက် ပေးနေတဲ့ အဖွဲ့အစည်း တစ်ခုက တာဝန်ရှိသူ တစ်ဦးက ပြောပါတယ်။

စစ်ဘေးရှောင်တွေ အနေနဲ့ လတ်တလော စားဝတ်နေရေး ဖြေရှင်းဖို့ တောင်ယာ အငှားလိုက်နေကြပြီး လုပ်အားခကို ဆန်နဲ့ လဲလှယ်ကြတယ်လို့ သူက ဆက်ပြောပါတယ်။

တောင်ယာ လုပ်အားခ အနေနဲ့ ၃ ရက်ကို ဆန်တစ်ပုံးရပြီး မလုပ်ကိုင်နိုင်တဲ့ သက်ကြီးရွယ်အို စစ်ဘေးရှောင်တွေ အတွက် ရွာခံတွေက ဆန်ဝေမျှပေးနေရတာကြောင့် ရေရှည်မှာ ပိုခက်ခဲလာနိုင်တယ်လို့ ကူညီနေသူတွေက ပြောပါတယ်။

ဒါ့အပြင် ဒေါရောက်ခူကျေးရွာက စစ်ဘေးရှောင်တွေထဲမှာ ကိုယ်ဝန်ဆောင်၊ နို့တိုက်မိခင်၊ မသန်စွမ်း၊ နာတာရှည် ရောဂါသည်တွေ ပါဝင်နေလို့ သီးခြား အလှူရှင်တွေ လိုအပ်နေတယ်လို့ ဆိုပါတယ်။

ဒေါရောက်ခူကျေးရွာက စစ်ဘေးရှောင်တွေဟာ ပါဒေါခူ၊ ဒေါတမငယ်၊ ဒေါတမကြီး၊ ဒေါငံရောက်၊ ဒေါကော့၊ ဒေါဖာ၊ ၆ မိုင် စတဲ့ကျေးရွာတွေက စစ်ရှောင်လာကြတာ ဖြစ်ပြီး လူဦးရေ စုစုပေါင်း ၅,၀၀၀ နီးပါး ရှိတယ်လို့ သိရှိရပါတယ်။

CJ-007

#MekongNews

#ဒီးမော့ဆို

#စစ်ဘေးရှောင်

#ဆန်ပြတ်လပ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)