မဲခေါင်၊ အောက်တိုဘာ ၂
ရှမ်းပြည်နယ်ရဲ့ မြို့တော်၊ တောင်ကြီးမြို့၊ တောင်ကြီး တက္ကသိုလ်အနီးက ရပ်ကွက်တွေမှာ စက်တင်ဘာလ ၃၀ ရက်နေ့ကစပြီး ဧည့်စာရင်းတိုင်ဖို့ လက်ကမ်း စာစောင်တွေ ဖြန့်ဝေနေတယ်လို့ ဒေသခံတွေက ပြောပါတယ်။
စစ်ကောင်စီ လက်အောက်ခံ အုပ်ချုပ်ရေးမှူး၊ ရာအိမ်မှူး၊ ဆယ်အိမ်မှူးနဲ့ ပျူစောထီးတွေက ဖြန့်ဝေနေတာ ဖြစ်ပြီး လက်ကမ်းစာစောင်ပါ အချက်တွေဟာ လိုက်နာဖို့ ခက်ခဲတယ်လို့ ကျောင်းသားတွေ နေထိုင်တဲ့ ရပ်ကွက် အတွင်းက အဆောင်ပိုင်ရှင် တစ်ဦးက ပြောပါတယ်။
“ဧည့်စာရင်း တိုင်ရမယ် ဆိုတာက မဖြစ်နိုင်ဘူး ထင်တယ်။ ကျောင်းသားတွေက အမြဲတမ်း အတည်တကျမှ မရှိတာ။ တစ်ရက် နှစ်ရက်နဲ့ ပြောင်းသွားတာမှ အများကြီး။ တချို့လည်း တခြားအဆောင်ကနေ ကိုယ့်အဆောင်မှာ လာအိပ်တာတွေ ရှိတာပဲ။ အဲလိုဆို နေ့တိုင်းကို သွားနေရမှာ။ ရပ်ကွက်ရုံးကလည်း နေရာက အဝေးကြီး။ အလှည့်စောင့်တာနဲ့ဆို တစ်နာရီလောက် ကြာတယ်” လို့ သူက ပြောပါတယ်။
အဲဒီ လက်ကမ်း စာစောင်ကို တောင်ကြီး တက္ကသိုလ်အနီး ကျောင်းကြီးစု ရပ်ကွက်ထဲရှိ ၂၁၂၊ ဖရဲငွေတောင်၊ အရှေ့ပင်စင်၊ အနောက်ပင်စင်၊ ရွှေတောင်ကြား၊ ရွှေသူဌေးကုန်း စတဲ့ နေရာတွေက ကျောင်းသား အဆောင်တွေကို အဓိက ဖြန့်ဝေခဲ့တာ ဖြစ်ပြီး တချို့နေရာတွေမှာတော့ ဧည့်စာရင်း တိုင်ဖို့ စစ်ကောင်စီတပ်က ကားနဲ့လှည့်ပြီး လိုက်အော်နေတယ်လို့ သိရပါတယ်။
လတ်တလော လက်ကမ်းစာစောင်ပါ အချက်တွေ မဖြစ်မနေ လိုက်နာဖို့ ခြိမ်းခြောက်တာ မရှိသေးပေမယ့် ကျောင်းသား အဆောင်တွေကို ညဘက် ရှောင်တခင် ဝင်ရောက် စစ်ဆေးတာတွေ ကြုံနေရတာကြောင့် အဆောင်ပိုင်ရှင်တွေ အနေနဲ့ စိုးရိမ်နေကြတယ်လို့ ဆိုပါတယ်။
“ပါတဲ့အချက်တွေက လိုက်နာဖို့ အကုန်လုံး မဖြစ်နိုင်သလောက်ပဲ။ ဒီခေတ်မှာ လော်စပီကာတော့ ဖွင့်တဲ့သူ မရှိတော့ပါဘူး။ ဒါပေမယ့် လူငယ်သဘာဝအရ ဘောစ်အကျယ်ကြီး ဖွင့်တာ၊ ဂစ်တာတီးတာလောက်က ရှိမှာပဲ။ တိတ်ဆိတ်နေရအောင် တရားစခန်းလည်း မဟုတ်ဘူးလေ။ တခါတလေ ဆူညံရင် ဆယ်အိမ်မှူး လာပြောတာလောက်တော့ ရှိတယ်” လို့ အဆောင်ပိုင်ရှင် တစ်ဦးက ပြောပါတယ်။
စစ်ကောင်စီ ကျင်းပမယ့် တောင်ကြီး တန်ဆောင်တိုင်ပွဲအတွင်း PDF တွေက စစ်ဆင်ရေး လုပ်မယ် ဆိုတဲ့သတင်း ပျံ့နှံ့နေတဲ့အတွက် ကျောင်းသား အဆောင်တွေကို အခုလို လုံခြုံရေး တင်းကြပ်တာ ဖြစ်ပြီး အဝေးသင် တက်သူတွေထဲမှာ ရဲတပ်သား တချို့ ပါဝင်နေတဲ့အတွက် အဆောင်ပိုင်ရှင်တွေ အနေနဲ့ သူစိမ်း ကျောင်းသား လက်မခံရဲတဲ့ အခက်အခဲတွေလည်း ရှိနေတယ်လို့ စုံစမ်း သိရပါတယ်။
CJ-007
#MekongNews
#တောင်ကြီးတက္ကသိုလ်
#ဧည့်စာရင်း
#ပျူစောထီး
