မဲခေါင်၊ စက်တင်ဘာ ၉
ကရင်နီပြည်နယ်၊ ဒီးမော့ဆိုမြို့နယ်၊ ဖရူဆို-ဘောလခဲ လမ်းပိုင်းကို စစ်ကောင်စီ စစ်ကြောင်း အများအပြားနဲ့ ထိုးစစ်ဆင်ဖို့ ပြင်ဆင်နေတာကြောင့် တိုက်ပွဲ ပြင်းထန်လာနိုင်တယ်လို့ ကရင်နီ စစ်ရေးသတင်းရင်းမြစ် တစ်ဦးက မဲခေါင်သတင်းဌာနကို ပြောပါတယ်။
လက်ရှိ စစ်ကောင်စီက စစ်ကြောင်း အများအပြားခွဲပြီး မားခရော့ရှည်၊ လောကျေခူ၊ ထားလဲ၊ နန်းဖဲ ကျေးရွာချင်းဆက် လမ်းတွေကနေ တစ်ဆင့် ဖရူဆို-ဘောလခဲမြို့နယ် အစပ်ကို ထိုးစစ်ဆင်ဖို့ ကြိုးစားနေတာ ဖြစ်တယ်လို့ ဆိုပါတယ်။
“ထိတွေ့မှုလေးတွေတော့ ရှိပါတယ်။ သူတို့ (စစ်ကောင်စီ) က ဘောလခဲ ဘက်ကို ဦးတည်ပြီး ထိုးတယ်လို့ ထင်တယ်။ ဘာလို့ဆို အဲ့ဘက်မှာ ပိတ်မိနေတဲ့ စကစတွေရှိတယ်။ ရိက္ခာပို့ဖို့လည်း လိုတယ် ဆိုတော့ ဖောက်၀င်ဖို့ ကြိုးစားနေတယ်လို့တော့ ထင်တယ်” လို့ သူကရှင်းပြပါတယ်။
ဘောလခဲမြို့နယ်ထဲကို ပြီးခဲ့တဲ့ မတ်လဆန်းပိုင်းက စစ်ကြောင်းထိုးလာတဲ့ စစ်ကောင်စီတပ်ဟာ တော်လှန်ရေး အင်အားစုတွေ ၀ိုင်း၀န်းပိတ်ဆို့ထားလို့ မြို့နယ်အတွင်း ပိတ်မိနေသလို ရိက္ခာနဲ့ လက်နက်ခဲယမ်း လိုအပ်နေရာ ဒီအခြေအနေတွေကို ကိုင်တွယ်ဖို့ အခုလို စစ်ရေးလှုပ်ရှားတာ ဖြစ်နိုင်တယ်လို့ ဘောလခဲ PDF ရဲဘော် တစ်ဦးက သုံးသပ်ပါတယ်။
လက်ရှိ ဘောလခဲမြို့နယ် ကရင်နီ တော်လှန်ရေး အင်အားစုတွေ လုံခြုံရေးယူထားတဲ့ နယ်မြေတွေဘက်ကို စစ်ကောင်စီ စစ်ကြောင်းငယ်တွေ နီးကပ်လာလို့ တိုက်ပွဲတွေ အချိန်မရွေး ဖြစ်လာနိုင်တယ်လို့ သူကဆိုပါတယ်။
အခုလို စစ်ရေးတင်းမာနေတဲ့ အခြေအနေကြောင့် ကရင်နီ အမျိုးသားများ ကာကွယ်ရေးတပ်ဖွဲ့-KNDF က စက်တင်ဘာလ ၈ ရက်နေ့ကစပြီး ဖရူဆို-ဘောလခဲ လမ်းမကြီးကို ပြည်သူတွေ လုံး၀ အသုံးမပြုဖို့ ထုတ်ပြန် မေတ္တာရပ်ခံ ထားပါတယ်။
MK-007
#MeKongNews
#ဖရူဆို_ဘောလခဲ
#စစ်ကြောင်းထိုး
#KNDF
