မဲခေါင်၊ စက်တင်ဘာ ၆
ရှမ်းပြည်နယ် တောင်ပိုင်း၊ ညောင်ရွှေမြို့နယ်ရှိ ညောင်ရွှေထောင်-တောင်လေးလုံးထောင်ရှိ အမျိုးသားဆောင်မှ နိုင်ငံရေး အကျဉ်းသား အများစု ပြီးခဲ့တဲ့ အပတ်တွင်းက မန္တလေး၊ အိုးဘိုထောင်သို့ ပြောင်းရွှေ့ခံခဲ့ရတယ်လို့ မိသားစုဝင်တွေထံက သိရပါတယ်။
အခုလို ထောင်ပြောင်းရွှေ့ခံရတာဟာ ပြီးခဲ့တဲ့ မတ်လ ၁၄ ရက်နေ့က ဖြစ်ပွားခဲ့တဲ့ တောင်လေးလုံး ထောင်ဖောက်မှု ဖြစ်စဉ်မှာ ပါဝင်ခဲ့လို့ ယခုအချိန်ထိ ထောင်ဝင်စာ အပိတ်ခံထားရတဲ့ နိုင်ကျဉ်းတွေ ဖြစ်တယ်လို့ စုံစမ်း သိရှိရပါတယ်။
“အိုးဘိုထောင်ထဲ ရောက်နေတဲ့ အသိတစ်ယောက်ရဲ့ အိမ်ကနေ တဆင့် စာရေး ဆက်သွယ်လာတာ။ ထောင်ဖောက်တယ်လို့ သူတို့ ခေါင်းစဉ်တပ်ထားတဲ့ထဲ ပါတဲ့ သူတွေ ရွှေ့ခံရတာ ဆိုတော့ အယောက် ၄၀ လုံး ပါတယ် ထင်တယ်။ ခန့်မှန်းခြေ အရင်အပတ်လောက်က ရွှေ့ခံရတာလို့ ထင်ရတယ်။ မိသားစုတွေကို အကြောင်းမကြားတော့ သေသေချာချာ မသိရဘူး” လို့ နိုင်ကျဉ်း တစ်ဦးရဲ့ မိသားစုဝင်က မဲခေါင်သတင်းဌာနကို ပြောပါတယ်။
အဲ့ဒီ ထောင်ဖောက်မှု ဖြစ်စဉ်ဟာ ထောင်ဝန်ထမ်း တစ်ဦးကို အကျဉ်းသားတွေက ကတ်ကြေးနဲ့ထိုးတဲ့ ဖြစ်စဥ် ဖြစ်ပြီး ထောင်ဝန်ထမ်းတွေနဲ့ စစ်ကောင်စီက အဖြစ်မှန်ကိုဖုံးကွယ်ပြီး ထောင်ဖောက်ပြေးမှုလို့ ဝါဒဖြန့်ခဲ့တာ ဖြစ်တယ်လို့ စာရေးဆက်သွယ်လာတဲ့ အကျဉ်းသား တစ်ဦးရဲ့ စာထဲမှာ ဖော်ပြထားပါတယ်။
“သူတို့ထောင်ထဲမှာ အရမ်းဆိုးတဲ့ ထောင်ဝန်ထမ်း တစ်ယောက်က နိုင်ကျဉ်းတွေကိုဆို မထိတထိ အရမ်းပြောတာတဲ့။ အဲ့ထောင်ဖောက်တဲ့ နေ့ကလည်း အဲ့ဝန်ထမ်းကို နိုင်ကျဉ်း ၁၃ ယောက်၊ အဲ့ထဲမှာ ဆရာသော် လည်းပါတယ်။ ဆရာသော် က ကတ်ကြေးနဲ့ ပြေးထိုးတာ။ ကတ်ကြေးက အပျော့ပဲ ပေးထားတော့ ဝန်ထမ်းက သိပ်မထိသွားဘူး။ ဆရာသော် ကိုတော့ သေနတ်နဲ့ ဝိုင်းပစ်လို့ ဆုံးသွားတာ။ အခုတော့ အဲ့ဝန်ထမ်းကိုလည်း ပြောင်းလိုက်ပြီ” လို့ နောက်ထပ် နိုင်ကျဥ်း မိသားစုဝင် တစ်ဦးက ဆိုပါတယ်။
အဲ့ဒီဖြစ်စဉ်မှာ ပါဝင်ခဲ့တယ် ဆိုတဲ့ အကျဉ်းသား ၁၃ ယောက်အပြင် တဆောင်ထဲနေတဲ့ ကျန်အကျဉ်းသား ၂၇ ယောက်၊ စုစုပေါင်း အယောက် ၄၀ ကိုပါ ၄ လကျော် ထောင်ဝင်စာပို့ခွင့် ပိတ်ခဲ့တဲ့အပြင် ပြီးခဲ့တဲ့ သြဂုတ်လ နောက်ဆုံး အပတ်ထဲမှာ အိုးဘိုထောင်ကို ပြောင်းရွှေ့ခဲ့တာလို့ သိရပါတယ်။
ရှမ်းပြည်နယ် တောင်ပိုင်းက နိုင်ငံရေး အကျဉ်းသားတွေ အိုးဘိုထောင်ကို ပြောင်းရွှေ့ခံရတဲ့ ဖြစ်စဥ်နဲ့ ပတ်သတ်ပြီး မဲခေါင်သတင်းဌာန အနေနဲ့ ထပ်မံ အတည်ပြုနေဆဲ ဖြစ်ပါတယ်။
အခုလို နိုင်ကျဥ်းတွေ ထောင်ပြောင်းတဲ့ ကိစ္စနဲ့ ပတ်သက်ပြီး ထောင်အာဏာပိုင်တွေက ဆက်သွယ် အကြောင်းကြားတာ မရှိဘူးလို့ မိသားစု၀င်တွေက ဆိုပါတယ်။
CJ-001
#MeKongNews
#တောင်လေးလုံးထောင်
#နိုင်ကျဉ်း
#ထောင်ရွှေ့
#အိုးဘိုထောင်
