မဲခေါင်၊ သြဂုတ် ၁၈

ကရင်နီပြည်နယ်၊ ဒီးမော့ဆိုမြို့နယ် အရှေ့ဘက်ခြမ်း၊ ငွေတောင်ရွာသစ်မှာ စစ်ကောင်စီတပ်နဲ့ ကာကွယ်ရေးတပ် သြဂုတ်လ ၂ ရက်ကစပြီး တိုက်ပွဲပြင်းထန်နေရာ မနေ့က တိုက်ပွဲ ထပ်မံ ဖြစ်ပွားခဲ့တယ်လို့ ဒီးမော့ဆို PDF ရဲဘော် တစ်ဦးက ပြောပါတယ်။

မနေ့က ဖြစ်ပွားတဲ့ နာရီဝက်ကြာ တိုက်ပွဲအတွင်း စစ်ကောင်စီတပ်ဘက်က ဒဏ်ရာရသူတွေ ရှိနိုင်ပေမယ့် အရေအတွက် အတိအကျ ဆက်လက် စုံစမ်းနေတယ်လို့ သူကပြောပါတယ်။

“မနေ့ (သြဂုတ်လ ၁၇ ရက်) ကတော့ ၈ နာရီ ဝန်းကျင်လောက်မှာ ကျွန်တော်တို့နဲ့ နာရီဝက်လောက် ထိတွေ့မှု ရှိတယ်။ ၂ ဖက် အပြန်အလှန် ပစ်တာလည်းရှိတယ်။ သူ့ဟာသူ ပစ်တာလည်းရှိတယ်။ မနေ့ညကတော့ လူအင်အား ထပ်ဖြည့်တာတွေရှိတယ်” လို့ သူက ရှင်းပြပါတယ်။

လက်ရှိ စစ်ကောင်စီ အင်အား ၄၀၀ ကျော်အထိ ဖြည့်တင်းထားပြီး ဒီးမော့ဆို-ဖရူဆို လမ်းမကြီး တစ်လျှောက်၊ ငွေတောင်ရွာသစ်နဲ့ တောင်တွေပေါ်မှာ နေရာယူ ဖြန့်ကျက်ထားတယ်လို့ သိရပါတယ်။

ကရင်နီပြည်နယ် နေရာအနှံ့အပြားမှာ တိုက်ပွဲတွေ ပြင်းထန်နေပြီး စစ်ကောင်စီတပ် အင်အား တိုးချဲ့နေလို့ ဒီးမော့ဆို -ဖရူဆို လမ်းမအနီး တိုက်ပွဲ ဖြစ်ပွားနိုင်တာကြောင့် ပြည်သူတွေ အနေနဲ့ စစ်ရေးသတိနဲ့ သွားလာကြဖို့ ကရင်နီ အမျိုးသားများ ကာကွယ်ရေးတပ်-KNDF က ဒီကနေ့ ထုတ်ပြန်ထားပါတယ်။

CJ-004

#MeKongNews

#ဒီးမော့ဆို

#PDF

#KNDF

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)