မဲခေါင်၊ သြဂုတ် ၁၂
ရှမ်းပြည်နယ် တောင်ပိုင်း၊ ညောင်ရွှေမြို့နယ်၊ အင်းလေးဒေသ၊ ဖောင်တော်ဦးဘုရား ဒေသစာရီ ကြွချီပူဇော်ခံ ပွဲတော် ပြန်လည် ကျင်းပခြင်းကြောင့် အင်းလေးဒေသကို ခရီးသွား ဧည့်သည်တွေ လာရောက် လည်ပတ်မယ်လို့ ဒေသတွင်း လုပ်ငန်းရှင်တွေနဲ့ ဈေးသည်တွေက သုံးသပ် ပြောဆိုလိုက်ပါတယ်။
ဒေသစာရီ ကြွချီ ပူဇော်ပွဲဟာ ၂၀၂၀ ခုနှစ်မှာ COVID-19 ကပ်ရောဂါဘေးကြောင့် ၃ နှစ်ကြာ ရပ်ဆိုင်းခဲ့ရပြီး အဲဒီ ကာလတွေ အတွင်း ခရီးသွား ဧည့်သည် လာရောက်မှု မရှိတာကြောင့် အင်းလေးဒေသက လုပ်ငန်းရှင်တွေနဲ့ ဈေးသည်တွေ စားဝတ်နေရေး အတွက် ရုန်းကန်ခဲ့ရတာပါ။
ဖောင်တော်ဦး ဘုရားမှာ ဈေးဆိုင်ဖွင့်ထားသူ တစ်ဦးက “ကုန်စုံဆိုင်လိုမျိုးကျတော့ ၁၂ ရာသီ ရောင်းရတာပေါ့။ ဘုရားက အထည်ဆိုင်တွေ စားသောက်ဆိုင်တွေ ကျတော့ ခရီးသွား အမှီပြုပြီး လုပ်စားရတာလေ။ ခရီးသွားရှိမှပဲ ယက္ကန်းရက်သူရော၊ ချုပ်တဲ့သူရော၊ ရောင်းတဲ့သူရော အဆင်ပြေကြတာပေါ့။ ကျနော်တို့ ဒီ ၃ နှစ်လုံးက တော်တော်ကျပ်တည်း သွားတာ။ စားဖို့တောင် အနိုင်နိုင်ပဲ” လို့ ပြောပါတယ်။
အင်းလေးဒေသက စားသောက်ဆိုင်၊ ဟော်တယ်၊ ယက္ကန်းရုံ၊ အထည်ဆိုင်၊ ငွေထည်ဆိုင် စတဲ့ လုပ်ငန်းတွေဟာ အရင်ကတည်းက ဘုရားပွဲတော်၊ တန်ဆောင်တိုင်နဲ့ နှစ်သစ်ကူး သင်္ကြန်ကာလတွေမှာသာ ရောင်းရပြီး ကျန်တဲ့ အချိန်တွေမှာ ခရီးသွား မလာသလောက်ပဲလို့ သူက ဆက်ပြောပြပါတယ်။
အင်းလေးဒေသ စီးပွားရေး လုပ်ငန်းတွေ ရပ်ထားရတဲ့ ၃ နှစ်ကျော် ကာလ အတွင်း အထိနာဆုံးက ဟိုတယ် လုပ်ငန်းရှင်တွေ ဖြစ်ပြီး တချို့ ဟိုတယ်တွေ အရှုံးပေါ်တာကြောင့် အပြီး ရပ်ဆိုင်းလိုက်ရတယ်လို့ ဆိုပါတယ်။
ဟိုတယ်လုပ်ငန်းရှင် တစ်ဦးက “တခြား လုပ်ငန်းတွေထက် ဟိုတယ်၊ စားသောက်ဆိုင်ကြီးတွေက ပိုထိတာပေါ့။ ဧည့်သည် မရှိလည်း ဝန်ထမ်း စရိတ်က ပေးနေရတာပဲလေ။ ရေရှည်က ဘယ်တောင့်ခံနိုင်မလဲ။ ဒီနှစ်ထဲတော့ ဘုရားလည်း ပြန်ကြွမယ်ဆိုတော့ ခရီးသွားတွေ လာကြမှာပေါ့။ ဟိုတယ်လည်း တချို့ ပြန်ဖွင့်ကြမှာပါ။ ခေတ်မကောင်းလို့ အရင်ကလောက် မလာကြဘူး ဆိုရင်တောင် ဒေသခံတွေ အတွက်တော့ ခဏတဖြုတ်တော့ အဆင်ပြေသွားမှာပေါ့” လို့ ပြောပါတယ်။
ဒေသစာရီ ကြွချီအပူဇော်ခံပွဲကို အောက်တိုဘာ ၁၅ ရက်၊ သီတင်းကျွတ်လဆန်း ၁ ရက်မှာ အင်းလေးဒေသထဲက ၂၁ ဌာနကို စတင်ကြွချီမှာဖြစ်ပြီး ၁၇ ရက်ပြီးတဲ့နောက် နိုဝင်ဘာလ ၁ ရက်၊ သီတင်းကျွတ် လဆုတ် ၃ ရက်မှာ ဖောင်တော်ဦး ရတနာစံကျောင်းတော်ကို ပြန်လည် ဆိုက်ရောက်မှာ ဖြစ်တယ်လို့ ဂေါပကတွေက ပြောပါတယ်။
CJ-007
#Mekongnews
#ဖောင်တော်ဦးဘုရား
#အင်းလေး
#COVID-19
