မဲခေါင်၊ ဩဂုတ် ၁၁

ကရင်နီပြည်နယ်၊ လွိုင်ကော်မြို့၊ နန်းကွပ်ရပ်ကွက် အနီးမှာ ဩဂုတ် ၉ ရက်က ဖြစ်ပွားတဲ့ ပစ်ခတ်မှုအတွင်း စစ်ကောင်စီတပ်သား ၁၃ ဦးသေဆုံးကာ ၈ ဦး ဒဏ်ရာရသွားတယ်လို့ KNDF နဲ့နီးစပ်သူ တစ်ဦးက မဲခေါင်သတင်းဌာနကို ပြောပါတယ်။

နန်းကွပ်ရပ်ကွက်ထဲက ပြည်သူပိုင် ဒန်ဘာကား တစ်စီးကို စစ်ကောင်စီတပ်သားတွေ သေနတ်ပြခြိမ်းခြောက် ယူဆောင်ကာ လွိုင်ကော်မြို့ထဲ ၀င်စဥ် တော်လှန်ရေးတပ်တွေ ကြားဖြတ် တိုက်ခိုက်ခဲ့တာလို့ ဆိုပါတယ်။

“ပြည်သူပိုင် ဒန်ဘာကား အ၀ါကို သေနတ်ပြတောင်းပြီး မြို့အတက် ကြားဖြတ်ပစ်ခံရတာ။ ကားပေါ်မှာတော့ ၃၀ စွန်းစွန်းလောက်ကိုပါတယ်။ မျက်မြင်အရ ၁၃ ကောင်လောက် သေပါတယ်။ ဒဏ်ရာရ ၈ ဦးပါ” လို့ သူကရှင်းပြပါတယ်။

တော်လှန်ရေးတပ်တွေရဲ့ တိုက်ခိုက်မှုကြောင့် ဒန်ဘာကား မောင်းနှင်လို့ မရအောင်ပျက်စီးသွားပြီး စစ်တပ်က ကရိန်းနဲ့ ဆွဲကာ နန်းကွပ်ရပ်ကွက်အနီး ဘုရားကုန်းပေါ်က စခန်းဘက် ဆုတ်ခွာသွားတယ်လို့ ဆိုပါတယ်။

တိုက်ခိုက်မှု အတွင်း လွိုင်ကော် အမြောက်တပ်က ပစ်ကူပေးခဲ့သလို့ ရှမ်းပိုင်းက စစ်ကား ၃ စီး၊ ဒေါနိုးကူး လမ်းပိုင်းက စစ်ကား တစ်စီး ချက်ချင်း အင်အားဖြည့်တာကြောင့် တော်လှန်ရေးတပ်ဖွဲ့တွေ ပြန်လည် ဆုတ်ခွာခဲ့ရတယ်လို့ KNDF နဲ့ နီးစပ်သူ တစ်ဦးက ပြောပါတယ်။

ပစ်ခတ်မှု ဖြစ်ပွားပြီးနောက် မြို့ပြင် ဘုရားကုန်း အထိုင်စခန်း ပတ်ချာလည်မှာ စစ်ကောင်စီ ကင်းပုန်းတွေ ၀ပ်နေသလို မြို့ထဲမှာ အစစ်အဆေးကြမ်းနေတယ်လို့ ဒေသခံ တစ်ဦးက ပြောပါတယ်။

အဆိုပါ တိုက်ခိုက်မှုကို ရှားတောဘက်က ဆင်းလာတဲ့ KNDF B12 က လုပ်ဆောင်ခဲ့တယ်လို့ သိရပြီး ပြည်သူ့ကာကွယ်ရေးတပ်ဖွဲ့တွေ ဘက်က အထိအခိုက်မရှိ ဆုတ်ခွာနိုင်ခဲ့တယ်လို့ ဆိုပါတယ်။

MK-007

#MeKongNews

#လွိုင်ကော်

#KNDF_B12

#ကင်းပုန်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)