မဲခေါင်၊ ဩဂုတ် ၉

အာဏာသိမ်းထားတဲ့ စစ်ကောင်စီတပ်က ရှမ်းပြည်နယ် မြောက်ပိုင်းမှာ အရပ်သား သတ်ဖြတ်မှုတွေကို လုပ်ကြံ ဖုံးကွယ်ခဲ့တယ်လို့ ရှမ်းလူ့အခွင့်အရေး မဏ္ဍိုင်အဖွဲ့-SHRF က မနေ့ ဩဂုတ်လ ၈ ရက်မှာ ထုတ်ပြန်ပါတယ်။

စစ်ကောင်စီတပ်တွေဟာ ရှမ်းမြောက်ပိုင်း မူဆယ်မြို့နယ် ဒေသခံ အရပ်သားတွေဖြစ်တဲ့ ကိုတူးဂျာ ၂၅ နှစ်၊ ကိုဘရန်အောင် ၂၇ နှစ်နဲ့ ဦးအိုက်လော ၄၀ နှစ်တို့ရဲ့ ရုပ်အလောင်းတွေကို TNLA တပ်ဖွဲ့ ယူနီဖောင်းတွေ ဝတ်ဆင်ပေးပြီး လူမှုကွန်ရက်မှာ TNLA တပ်သား ၃ ဦး အသေဖမ်းမိခဲ့တယ်လို့ ဖော်ပြခဲ့ကြောင်း SHRF က ဆိုပါတယ်။

အဆိုပါ အရပ်သား ၃ ဦးထဲက ဦးအိုက်လော ဟာ စစ်ကောင်စီတပ်က ဆိုင်းခေါင်ကျေးရွာကို လေကြောင်း တိုက်ခိုက်စဥ် သေဆုံးခဲ့တာဖြစ်ပြီး ကိုတူးဂျာနဲ့ ကိုဘရန်အောင် တို့ကိုတော့ စစ်တပ်က ရိုက်နှက် နှိပ်စက်ပြီး သေနတ်နဲ့ ပစ်သတ်ခဲ့တာလို့ သိရပါတယ်။

ဆိုင်းခေါင်ရွာကို လက်နက်ကြီး ပစ်ခတ်ပြီး လေကြောင်းက တိုက်ခိုက်လို့ သေဆုံးခဲ့တဲ့ ဦးအိုက်လော ရဲ့ ရုပ်အလောင်းကို စစ်ကောင်စီတပ်က ကျေးရွာအတွင်း ဝင်ရောက်လုယူပြီး TNLA ဝတ်စုံ ဝတ်ဆင်ပေးခဲ့တာကို TNLA သတင်းနဲ့ပြန်ကြားရေးဌာနက ဇူလိုင် ၂၇ ရက်နေ့မှာ အတည်ပြု ထုတ်ပြန်ခဲ့ပါတယ်။

စစ်ကောင်စီတပ်ဟာ ရှမ်းပြည်နယ်အတွင်း အရပ်သား သတ်ဖြတ်မှုတွေ အပြင် အုပ်စုဖွဲ့ အဓမ္မကျင့်မှုတွေကိုလည်း ကျူးလွန်ခဲ့တယ်လို့ SHRF က ထုတ်ပြန်တဲ့ အချက်အလက်တွေမှာ ဖော်ပြထားပါတယ်။

အခုနှစ် ဇူလိုင်လ ၃၀ ရက်မှာ ကွတ်ခိုင်မြို့နယ်၊ ဆွန်လုံကျေးရွာကို ဝင်ရောက်ပြီး ကိုယ်ဝန် ၃ လရှိနေတဲ့ အသက် ၂၀ နှစ်အရွယ် နန်းလောဝ် (အမည်လွဲ) ကို စစ်တပ်က ဖမ်းဆီး ခေါ်ဆောင်သွားပြီး ရင်သားကို ဆုပ်နယ်တာ၊ အမျိုးသမီး အင်္ဂါကို မဖွယ်မရာ ပြုလုပ်တာတွေ ကျူးလွန်ခဲ့တယ်လို့ သိရပါတယ်။

ဒါ့အပြင် အခြား စစ်ကောင်စီတပ်သား ၂ ဦးကလည်း ဆွန်လုံကျေးရွာထဲက ကလေး ၂ ဦး မိခင် နန်းထွေး (အမည်လွဲ) ကို တစ်လှည့်စီ အဓမ္မပြုကျင့်ခဲ့တယ်လို့ SHRF ရဲ့ ထုတ်ပြန်ချက်မှာ ဆိုထားပါတယ်။

စစ်ကောင်စီတပ်တွေဟာ ၎င်းတို့ကျူးလွန်ခဲ့တဲ့ စစ်ရာဇဝတ်မှုတွေ အပါအဝင် အရပ်သား ပြည်သူ သတ်ဖြတ်မှု တွေ၊ အဓမ္မကျင့်မှုတွေနဲ့ ပတ်သက်ပြီး သတင်းထွက်ရင် ဒါမှမဟုတ် သတင်းမီဒီယာတွေကို ဖြေရင် ကျေးရွာကို လက်နက်ကြီးနဲ့ ပစ်ခတ်မယ်လို့ ခြိမ်းခြောက်ခဲ့တယ်လို့ သိရပါတယ်။

ရှမ်းပြည်နယ်ဟာ စစ်တပ် အာဏာသိမ်းချိန် မတိုင်ခင် ကတည်းက ခေတ်အဆက်ဆက်မှာ အရပ်သား သေဆုံးတဲ့ ပစ်ခတ်မှုတွေ၊ လူ့အခွင့်အရေး ချိုးဖောက်မှုတွေနဲ့ စစ်ဘေးရှောင်တွေ ရှိခဲ့တာလို့ SHRF က မဲခေါင်သတင်းဌာနကို ပြောပါတယ်။

“အာဏာ မသိမ်းခင်ရော အာဏာသိမ်းပြီးရော ကျွန်မတို့ဆီမှာ သိပ်ပြီး မထူးခြားဘူးလို့ ထင်တယ်။ ဘယ်တုန်းကမှ ရှမ်းပြည်ရဲ့ လူ့အခွင့်အရေး အခြေအနေက အကောင်းဘက်မှာ ရှိခဲ့တာ မဟုတ်ဘူး။ အာဏာ မသိမ်းခင်ကတော့ ထိန်းကျောင်းလို့ရတယ်။ အာဏာသိမ်းပြီးတဲ့ အခါမှာ ထိန်းကျောင်းလို့ မရတော့ဘူး။ ပြောဆိုလို့ မရဘူးပေါ့။ အဲ့လောက်ပဲ ကွာခြားသွားပါတယ်” လို့ ရှမ်းလူ့အခွင့်အရေး မဏ္ဍိုင်အဖွဲ့ ပြန်ကြားရေး တာဝန်ခံ ယိင်းလျန်းဟန် က ရှင်းပြပါတယ်။

အာဏာမသိမ်းခင် ကာလမှာ တိုင်းရင်းသား လက်နက်ကိုင် အချင်းချင်း တိုက်ပွဲတွေ ဖြစ်ပေမယ့် လက်ရှိကာလမှာ တိုင်းရင်းသား လက်နက်ကိုင် အချင်းချင်း တိုက်ပွဲတွေ ငြိမ်နေပြီး ရှမ်းပြည်နယ်တွင်းက လူ့အခွင့်အရေး ချိုးဖောက်မှုတွေကို စစ်ကောင်စီက အများဆုံး ပြုလုပ်နေတယ်လို့ သူက ဆက်ပြောပါတယ်။

အမျိုးသား ညီညွတ်ရေး အစိုးရ-NUG၊ လူ့အခွင့်အရေးဆိုင်ရာ ဝန်ကြီးဌာနရဲ့ အခုနှစ် ဩဂုတ်လ ၁ ရက်နေ့ ထုတ်ပြန်ထားတဲ့ အချက်အလက်တွေအရ စစ်ကောင်စီတပ်ရဲ့ အစုလိုက်အပြုံလိုက် သတ်ဖြတ်မှုတွေကြောင့် ရှမ်းပြည်နယ်အတွင်းက အရပ်သား ၆၆ ဦး သေဆုံးထားတာ ဖြစ်ပါတယ်။

အခုလ ၂ ရက်နေ့ မနက်ပိုင်းမှာတော့ မူဆယ်မြို့နယ်၊ စယ်လန့်ကျေးရွာ၊ လွယ်တေးမိန်း တောင်ခြေမှာ ဖယ်ခုံ အခြေစိုက် စကခ (၇) လက်အောက်ခံ စစ်တပ်နဲ့ TNLA တို့ တိုက်ပွဲ ဖြစ်ပွားခဲ့ရာ အဲ့ဒီနေ့လယ်က စတင်ပြီး ၁၀၅ မိုင် အခြေစိုက် စစ်တပ်က စယ်လန့်ရွာထဲကို လက်နက်ကြီးနဲ့ ဆက်တိုက် ပစ်ခတ်ခဲ့တာကြောင့် နေအိမ် ၆ လုံး ပျက်စီးပြီး အသက် ၉ နှစ်အရွယ် ကလေးတစ်ဦးနဲ့ အခြား အမျိုးသမီး တစ်ဦးတို့ ဒဏ်ရာရခဲ့တယ်လို့ သိရပါတယ်။

စစ်တပ်ရဲ့ လက်နက်ကြီး ဆက်တိုက် ပစ်ခတ်မှုကြောင့် စယ်လန့်ကျေးရွာ ဒေသခံတွေဟာ မူဆယ်၊ နမ့်ခမ်းမြို့ တွေက ဆွေမျိုးအိမ်တွေနဲ့ လွယ်တေးမိန်း ကမ္မဌာန်းကျောင်းဘက် ထွက်ပြေး တိမ်းရှောင် နေရပါတယ်။

ကွတ်ခိုင်နဲ့ မူဆယ်မြို့နယ်တွေမှာ ဇူလိုင် နောက်ဆုံးပတ်ကနေ ဩဂုတ်လ ပထမ တစ်ပတ် အတွင်း စစ်တပ်ရဲ့ ထိုးစစ်ဆင် တိုက်ခိုက်မှုတွေ အတွင်း တရားလက်လွတ် သတ်ဖြတ်မှုနဲ့ အုပ်စုဖွဲ့ အဓမ္မကျင့်မှုတွေ အပါအဝင် လေကြောင်း ဗုံးကြဲမှုတွေကြောင့် ဒေသခံ ပြည်သူ ၅ ဦးသေဆုံးပြီး ၉ ဦး ဒဏ်ရာရခဲ့တယ်လို့ သိရပါတယ်။

လက်ရှိ ရှမ်းမြောက်မှာသာမက ရှမ်းပြည်တောင်ပိုင်း မိုးဗြဲ၊ ဖယ်ခုံနဲ့ ပင်လောင်းမြို့နယ်တွေမှာ လူ့အခွင့်အရေး ချိုးဖောက်ခံရမှုတွေ၊ လက်နက်ကြီး ပစ်ခတ်မှုနဲ့ အရပ်သား သေဆုံးမှုတွေ ဆက်တိုက် ဖြစ်နေတယ်လို့ SHRF က ဆိုပါတယ်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ အာဏာသိမ်းပြီးချိန်ကစပြီး လက်ရှိ ၂ နှစ်ကျော် နွေဦးတော်လှန်ရေး ကာလ အတွင်း ရှမ်းပြည်နယ်မှာ ဒီမိုကရေစီအရေး လှုပ်ရှားသူတွေ အပါအဝင် ပြည်သူလူထု သေဆုံးသူ စုစုပေါင်း ၁၁၆ ဦး ရှိပြီလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်းက ဩဂုတ်လ ၈ ရက်မှာ ထုတ်ပြန်ထားပါတယ်။

MK-009

#MekongNews

#ရှမ်းလူ့အခွင့်အရေးမဏ္ဍိုင်

#TNLA

#မူဆယ်မြို့နယ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)