မဲခေါင်၊ ဇူလိုင် ၂၇
အာဏာသိမ်းစစ်ကောင်စီ ထုတ်ဝေမယ့် နှစ်သောင်းကျပ်တန် ငွေစက္ကူများကို တရားမဝင်ငွေစက္ကူများအဖြစ် သတ်မှတ်တယ်လို့ အမျိုးသားညီညွတ်ရေးအစိုးရ NUG က ဒီနေ့ ထုတ်ပြန်ကြေညာပါတယ်။
တရားမဝင်အာဏာသိမ်း စစ်ကောင်စီရဲ့ လက်အောက်ခံအဖွဲ့အစည်းဖြစ်တဲ့ ဗဟိုဘဏ်က နှစ်သောင်းကျပ်တန် ငွေစက္ကူ အမျိုးအစားသစ်ကို ၂၀၂၃ ခုနှစ်၊ ဇူလိုင်လ ၃၁ ရက်နေ့မှစပြီး ရိုက်နှိပ်ထုတ်ဝေမယ်လို့ စစ်ကောင်စီက ဇူလိုင် ၂၃ ရက်မှာ ကြေညာထားတာပါ။
စစ်ကောင်စီအနေနဲ့ ၎င်းတို့သက်ဆိုးရှည်စေဖို့ ပြည်သူလူထုအပေါ် ရက်စက်စွာ ဆင်နွှဲလျက်ရှိတဲ့ အကြမ်းဖက်တိုက်ခိုက်မှုတွေ စဉ်ဆက်မပြတ်ကျူးလွန်ဖို့ လိုအပ်နေတဲ့ဘဏ္ဍာငွေကို ငွေစက္ကူအမျိုးအစားသစ် စတင်ရိုက်ထုတ်ခြင်းနဲ့ ဖြည့်တင်းနိုင်ရေး အားထုတ် ဆောင်ရွက်မှုသာဖြစ်တယ်လို့ ဆိုထားပါတယ်။
တရားမဝင် အာဏာသိမ်းစစ်ကောင်စီကဖြစ်စေ၊ ယင်းအားဆက်ခံသော အဖွဲ့အစည်းတခုခုကဖြစ်စေ၊ လက်အောက်ခံ အဖွဲ့အစည်းတခုခုကဖြစ်စေ ငွေစက္ကူအမျိုးအစားသစ် ရိုက်နှိပ်ထုတ်ဝေခြင်းဟာ တရားဝင်မှု အလျဉ်းမရှိသော လုပ်ရပ်ဖြစ်တယ်လို့လည်း ဖော်ပြထားပါတယ်။
ပြည်သူအပေါ် ဒုက္ခအကြပ်အတည်း ရောက်စေမယ့် ငွေစက္ကူသစ် ရိုက်နှိပ်ထုတ်ဝေခြင်းဟာ လက်ခံနိုင်ဖွယ်မရှိသော လုပ်ရပ်ဖြစ်နေတာကြောင့် တရားမဝင်ငွေစက္ကူများအဖြစ် သတ်မှတ်ကြေညာတယ်လို့ အမျိုးသားညီညွတ်ရေးအစိုးရ၊ ကြားကာလဗဟိုဘဏ် ဥက္ကဋ္ဌ ဦးတင်ထွန်းနိုင် လက်မှတ်ရေးထိုးကာ ထုတ်ပြန်ထားပါတယ်။
MK-006
#MeKongNews
#နှစ်သောင်းတန်
#NUG
#စစ်ကောင်စီ
