မဲခေါင်၊ ဇူလိုင် ၂၆

စစ်ကောင်စီရဲ့ နှစ်သောင်းတန် (၂၀၀၀၀) ငွေစက္ကူသစ် ရိုက်နှိပ်ထုတ်ဝေမယ်လို့ကြေညာပြီးနောက် အိမ်ခြံမြေကဏ္ဍနဲ့ ကားဈေးကွက်အတွင်း ရင်းနှီးမြုပ်နှံမှုတွေကြောင့် ဈေးနှုန်းများအဆမတန်မြင့်တက်နေပြီး ဈေးကွက်ပျက်နေတဲ့ အနေအထားရှိနေတယ်လို့ ဈေးကွက်အတွင်း စုံစမ်းသိရှိရပါတယ်။

ငွေစက္ကူသစ် ရိုက်နှိပ်ထုတ်ဝေမယ်ဆိုတာကြောင့် ငွေကြေးဖောင်းပွမှုပိုမိုဆိုးရွားလာပြီး၊ ငွေကိုင်ဆောင်ထားသူတွေက အခိုင်အမာရှိတဲ့ အိမ်ခြံမြေ၊ တိုက်ခန်းနဲ့ ကားဈေးကွက်တွေအပေါ် အလုံးအရင်းနဲ့ကို ရင်းနှီးမြုပ်နှံလာတာပါ။

“စစ်ကောင်စီ ဘာမှကြိုတင်ပြောတာမရှိဘူး၊ အခု၂သောင်းတန်ထုတ်တာလည်း လူတိုင်းအသိဘဲ၊ သူတို့ငွေကြေးအကြပ်အတည်းကို ဖြေရှင်းတဲ့သဘောပေါ့၊ ငွေတန်ဖိုးကကျပြီလေ၊ အဲ့တော့ အခိုင်အမာရှိတဲ့ဟာကိုစဉ်းစားတော့လည်း ရွှေ၊ ဒေါ်လာက အဖမ်းဆီးရှိတော့၊ အိမ်ခြံမြေနဲ့ကားဈေးကွက်ထဲ ရောက်လာတာ၊ ဈေးနှုန်းတွေက ပါးစပ်ဈေးနှုန်းတွေ ဖြစ်ကုန်တာပေါ့၊ ဈေးကွက်ပျက်နေပြီ” လို့ ရန်ကုန်မြို့ရှိ အိမ်ခြံမြေအရောင်းအဝယ်ပြုလုပ်သူ လုပ်ငန်းရှင် တစ်ဦးကဆိုပါတယ်။

လက်ရှိမှာတော့ ရန်ကုန်မြို့ရှိ အိမ်ခြံမြေ၊တိုက်ခန်းဈေးနှုန်းများမှာ အရင်က ပေါက်ဈေး သိန် း၅၀၀ ရှိတဲ့ မြေကွက်မှာ ၂ ဆနီးပါးဈေးတင်ရောင်းချမှုတွေရှိနေပြီး ကြိုက်ရောင်းကြိုက်ဝယ်အနေအထားဖြစ်နေတယ်လို့ ဆိုပါတယ်။

“စီးပွားရေးကောင်းလို့ ဈေးတက်တာမဟုတ်ဘူး၊ နိုင်ငံရေးကယက်ကြောင့် စီးပွားရေးကိုရိုက်ခတ်မှုတွေနဲ့ကြုံနေရတာ၊ ပေါ်လစီကြောင့်အခက်ခဲတွေ၊ ပြီးတော့ စစ်ကောင်စီက စတော့အိတ်စ်ချိန်းလို၊ ဘဏ်တွေကုမ္မဏီတွေမှာ ရင်းနှီးမြုပ်နှံလို့ရတဲ့ အော်ပရှင်း မရှိတော့ အိမ်ခြံနဲ့ ကားဈေးကွက်တွေဆီမှာ အလုံးအရင်းအလိုက်ဝင်လာတာ၊ အခုဆိုကြည့် အခွန်ရုံးတွေက အိမ်ရှင်တွေကို ဝင်ငွေခွန်လိုက်နေပြီး ဒီပုံစံအတိုင်းသာဆိုမကြာဘူး ပြိုလဲကုန်လိမ့်မယ်” လို့ အိမ်ခြံမြေဈေးကွက် လေ့လာသူတစ်ဦးက ပြောပါတယ်။

ရွှေ၊ဒေါ်လာ၊ ကား၊ အိမ်ခြံမြေ အရောင်းအဝယ် ၇၀ ရာခိုင်နှုန်းနီးပါးခန့် ယာယီဈေးကွက်ပိတ်ကာ စောင့်ကြည်နေတဲ့ အခြေအနေရှိတယ်လို့ သိရပါတယ်။

မော်တော်ကားဈေးကွက်မှာ ကားအမျိုးအစားပေါ်လိုက်ကာ၊ ဈေးနှုန်းများထက်ဝက်ခန့်မြင့်တက်ခဲ့ပြီး ယနေ့မှာတော့ အနည်းငယ်ပြန်လည်ကြဆင်းမှုရှိနေတယ်လို့ မော်တော်ယာဉ်တင်သွင်းရောင်းချသူများအသင်း တာဝန်ရှိသူတစ်ဦးက ပြောပါတယ်။

“၂သောင်း တန်ထုတ်မယ့် သတင်းကြောင့်ကားဈေးကကြောက်စရာကောင်းလောက်အောင် တက်သွားတာ၊ ကြိုက်ရောင်းကြိုက်ဝယ် အနေအထားပေါ့၊ ကားစီနိုင်တဲ့သူတိုင်းက ကားပွဲစားဖြစ်နေတာ၊ သိန်း၂၀၀ တန်ကားက ၄၀၀ လောက်ဖြစ်သွားတော့ အကုန်ဝင်လာတာ၊ ဒီနေ့ဝယ် မနက်ဖြန်ရောင်းတွေဖြစ်ကုန်တာ၊ ဒီနေ့တော့နည်းနည်းကျလာပြီး ၊ နောက်၂ ပတ်လောက်ဆို ကားဈေးနည်းနည်း ထပ်ကျနိုင်တယ်” လို့ တာဝန်ရှိသူက ပြောပါတယ်။

ပြည်ပက ကားတင်သွင်းမှုကို စစ်ကောင်စီက ဝန်ထမ်းများကိုကားပါမစ်ပေးကတည်းက တင်သွင်းခွင့်ပိတ်ထားပြီး၊ လက်ရှိမှာပြည်တွင်းကားထုတ်လုပ်မှုကလည်း ရပ်ဆိုင်းထားတာကြောင့် ဈေးကွက်ထဲရှိကားများသာ အရောင်းအဝယ်လုပ်နေရတဲ့အတွက် ဈေးနှုန်းများမှာ မြင့်တက်နေရတယ်လို့ သိရပါတယ်။

စစ်ကောင်စီက အခုလို ၂ သောင်းတန်ကျပ်ငွေ ထုတ်ဝေရတာဟာ တိုင်းပြည်လို ငွေပြနေလို့ဖြစ်ပြီး၊ စီးပွားရေးနဲ့ပတ်သက်လို့ မကျွမ်းကျင်တဲ့မူဝါဒတွေကြောင့် ငွေကြေးဖောင်းပွနှုန်းထိန်းသိမ်းနိုင်ခြင်းမရှိတော့ဘူးလို့ ပညာရှင်များက သုံးသပ်ပြောကြားပါတယ်။

ကမ္ဘာဘဏ်က မြန်မာနိုင်ငံရဲ့ ငွေကြေးဖောင်းပွမှုနှုန်း ကနှစ်ကုန်ပိုင်းမှာ ၁၄ ရာခိုင်နှုန်းကျဆင်းဖွယ်ရှိပြီး၊ ပြည်တွင်းအသားတင် ထုတ်လုပ်မှုတန်ဖိုး ၃ရာခိုင်နှုန်း တိုးလာနိုင်တယ်လို့ ဆိုထားပေမယ့် GDP တိုးတက်မှုနှုန်း နှေးနေအုံးမယ်လို့လည်း ပညာရှင်များကပြောပါတယ်။

MK-006

#MeKongNews

#နှစ်သောင်းတန်

#ကားဈေး

#အိမ်ခြံမြေ

#ဈေးကွက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)