မဲခေါင်၊ ဇူလိုင် ၁၃
ကချင်ပြည်နယ်၊ ဗန်းမော် ဘက်က စစ်ကြောင်းထိုးလာတဲ့ စစ်ကောင်စီတပ်နဲ့ KIA တို့ ခါ့လားယန် အနီး ဒီကနေ့ ဇူလိုင် ၁၃ ရက်နေ့ မနက်က တိုက်ပွဲ ပြင်းပြင်းထန်ထန် ဖြစ်ပွားပြီး စစ်ကောင်စီရဲ့ လက်နက်ခဲယမ်း ပစ္စည်းတွေ သိမ်းဆည်းရရှိတယ်လို့ KIA ရှေ့တန်းနဲ့ နီးစပ်သူတွေဆီက သိရပါတယ်။
စစ်ကောင်စီတပ်ဟာ ဗန်းမော်-မြစ်ကြီးနား လမ်းကနေ KIO/KIA ဌာနချုပ် ရှိရာ လိုင်ဇာမြို့အနီးရှိ နမ်ဆန်ယန် ဘက်ကို အင်အားဖြည့် စစ်ကြောင်းထိုးလာတာလို့ KIA ရှေ့တန်း သတင်းရင်းမြစ်က ပြောပါတယ်။
“ဒီမနက် ၅ နာရီခန့်ကစ တိုက်ပွဲဖြစ်တာ ၇ နာရီ မိနစ် ၅၀ လောက်ထိ ဟုတ်တယ်” လို့ သူက ပြောပါတယ်။
ဗန်းမော်-ဒေါ့ဖုန်းယန် ကနေ နမ်ဆန်ယန်ဘက် အင်အားဖြည့်လာတဲ့ စစ်ကောင်စီ ခလရ (၅၆) နဲ့ (၇၇) ပူးပေါင်း စစ်ကြောင်းနဲ့ KIA တပ်ရင်း (၁၄) တို့ ခါ့လားကုန်းစောင်းအောက်၊ နမ်တုတ်တောင် လမ်းဆုံမှာ တိုက်ပွဲ ၃ နာရီ ခန့်ကြာ ပြင်းထန်ခဲ့တယ်လို့ ဆိုပါတယ်။၊
“စစ်ကောင်စီဘက်က လက်နက်ခဲယမ်း ပစ္စည်း အချို့ သိမ်းဆည်းရမိတယ်လို့ ကြားတယ်။ ဒီမနက် ၅ နာရီ ဝန်းကျင်ခန့်ကစ ဒေါ့ဖုန်းယန်၊ ခါ့လားယန် တကြော တိုက်ပွဲ အရမ်းပြင်းထန်းနေတာ” လို့ KIA ရှေ့တန်းနဲ့ နီးစပ်သူ တစ်ဦးက ပြောပါတယ်။
ဒီမနက်ပိုင်းမှာ ဒေါ့န်းယန်၊ ဒိန်ဂါ၊ ခါ့လား တကြော တိုက်ပွဲ ပြင်းပြင်းထန်ထန် ဖြစ်ပွားတယ်လို့ ဆိုပါတယ်။
နမ်ဆန်ယန်နဲ့ မဒီးယန်ကြား ဇူလိုင်လ ၈ ရက်နေ့၊ ည ၉ နာရီ ခန့်က စစ်ကောင်စီ ဂျက်ဖိုက်တာနဲ့ ဗုံးကြဲ တိုက်ခိုက်ပေမယ့် လေးလုံ စစ်ကောင်စီတပ်မှာ ဗုံးပြန်ကျခဲ့တယ်လို့ KIA ရှေ့တန်း သတင်းရင်းမြစ်တွေက ပြောပါတယ်။
ဇူလိုင်လ ၃ ရက်နေ့ကစပြီး နမ်ဆန်ယန်အနီး စစ်ကောင်စီနဲ့ KIA တိုက်ပွဲ ပြင်းထန်လာရာ စစ်ကောင်စီဘက်က ဗန်းမော်လမ်းကြောနဲ့ မြစ်ကြီးနား လမ်းကြောတွေဘက်က အဆက်မပြတ် အင်အားဖြည့် စစ်ကြောင်းထိုး နေတယ်လို့ သိရပါတယ်။
ဓာတ်ပုံ-ဇွန်လ ၁၆ ရက်နေ့က နမ်ဆန်ယန်တိုက်ပွဲမှာ KIAက သိမ်းဆည်းရမိတဲ့ လက်နက်များ။ ပုံဟောင်း။
CJ-008
#MekongNews
#ခါ့လားယန်
#KIA
#လက်နက်ခဲယမ်း
