မဲခေါင်၊ ဇူလိုင် ၈
ကရင်နီပြည်နယ်၊ ဒီးမော့ဆိုမြို့နယ် အနောက်ခြမ်း စစ်ရှောင်ကျေးရွာတွေကို ပစ်မှတ်ထားပြီး စစ်ကောင်စီက ဒီကနေ့ မနက်ပိုင်းမှာ လက်နက်ကြီး ၃ လုံး အကြောင်းမဲ့ပစ်ခတ်တိုက်ခိုက်ခဲ့တယ်လို့ Job for Kayah အဖွဲ့ တာဝန်ခံက မဲခေါင်သတင်းကိုပြောပါတယ်။
ဒီကနေ့ ဇူလိုင်လ ၈ ရက် မနက် ၁၀ နာရီဝန်းကျင်ခန့်က လက်နက်ကြီးတွေနဲ့ စတင်ပစ်ခတ်ခဲ့တာဖြစ်ပြီး ဒါဟာ တစ်ပတ်အတွင်း ၂ ကြိမ်မြောက် စစ်ရှောင်ကျေးရွာတွေကို ဦးတည်တိုက်ခိုက်တာဖြစ်တယ်လို့ သူကပြောပါတယ်။
“ဒီမနက်ပစ်သွားတာက မိနစ်ပိုင်းပဲ ရှိသေးတယ်။ ဒီးမော့ဆိုအနောက်ခြမ်းက စစ်ရှောင်စခန်းတွေကို ဦးတည်တိုက်ခိုက်တာပါ။ အခုလေးတင်ဖြစ်သွားတာဆိုတော့ အခြေအနေတွေ ကျွန်တော်တို့ မသိရသေးပါဘူး။ နေ့လည်လောက်တော့ အခြေအနေတွေသိရမယ်ထင်ပါတယ်” လို့ Job for Kayah အဖွဲ့ တာဝန်ခံက ရှင်းပြပါတယ်။
ဒီးမော့ဆိုအနောက်ခြမ်းက စစ်ရှောင်စခန်းနဲ့စာသင်ကျောင်းနေရာကို ဇူလိုင် ၄ ရက် မနက် ၂ နာရီခန့် ကလည်း လေကြောင်းကနေ ပေါင် ၅၀၀ ဗုံး ၂ လုံး၊ ပေါင် ၁၀၀ ဗုံး ၂ လုံး ကြဲချတိုက်ခိုက်ခဲ့လို့ အသက် ၂ နှစ် ၁၀ လအရွယ်ကလေးငယ်တစ်ဦး နဲ့မိဘ ၂ ဦးထိခိုက်ဒဏ်ရာရရှိသွားပြီး စစ်ရှောင်တဲတစ်ချို့နဲ့ ယာယီ စာသင်ကျောင်း ပျက်စီးသွားတယ်လို့ KNDF တပ်သားတစ်ဦးက ပြောပါတယ်။
“အဲ့နေ့တုန်းက ကံသီလို့ပါ။ ဗုံးက တည့်တည့်တဲတွေပေါ်လာမကျလို့ ခံသာတာ။ ပေါင် ၅၀၀ ဗုံး ၂ လုံးဆိုတာ နည်းတဲ့ ပေါက်ကွဲအားမဟုတ်ဘူး။ မြင်သာအောင်ပြောရရင် ပဇီကြီးမှာ ကြဲခံလိုက်ရတာ ပေါင် ၅၀၀ ဗုံးပဲ။ ဆိုတော့ စစ်ကောင်စီက အစုလိုက်အပုံလိုက်သတ်ဖြတ်မှုတွေကို ထပ်ကျူးလွန်ဖို့ ဝန်မလေးဘူးဆိုတာပြနေတာနဲ့ တူတူပဲ။ ဒီလို ဖြစ်ရပ်တွေ ထပ်မဖြစ်လာဖို့တဲ့ စစ်ကောင်စီတပ်တွေကို အပြစ်ဖြတ်ချေမှုန်းမှ ရပ်တန့်သွားမှာဖြစ်တယ်” လို့ သူကပြောပါတယ်။
ကရင်နီပြည်နယ် ဒီးမော့ဆိုအရှေ့ခြမ်းနဲ့ ဖရူဆိုမြို့နယ်တွေမှာ စစ်ကောင်စီနဲ့ ကရင်နီတော်လှန်ရေးအင်အားစုတို့ တိုက်ပွဲတွေ ပြင်းထန်နေတာ လနဲ့ချီကြာမြင့်နေတာကြောင့် ဒေသခံပြည်သူအများစုဟာ ဒီးမော့ဆို အနောက်ခြမ်း စစ်ရှောင်စခန်းနဲ့ ကျေးရွာတွေ၊ ရှမ်းပြည်နယ်တောင်ပိုင်း၊ ဆီဆိုင်မြို့နယ်က စစ်ရှောင်စခန်းတွေနဲ့ ထိုင်း-ကရင်နီနယ်စပ်တွေမှာ ခိုလှုံနေကြရပါတယ်။
တိုက်ပွဲတွေကလည်း ဆက်လက်ပြင်းထန်နေတာကြောင့် စစ်ရှောင်ပြည်သူတွေဟာ နေရပ်မပြန်နိုင်သေးပဲ စစ်ရှောင်စခန်းတွေမှာ ဆက်လက်ခိုလှုံနေကြရပါတယ်။
ကရင်နီပြည်နယ်အနှံ့တိုက်ပွဲတွေ ဖြစ်ပွားနေတာကြောင့် ဒီးမော့ဆို အနောက်ခြမ်း စစ်ရှောင်စခန်းတွေမှာတင် ခိုလှုံနေရတဲ့ စစ်ရှောင်ပြည်သူတွေဟာ ၄,၀၀၀၀ ထက်မနည်းရှိပြီး တစ်နေ့ထက်တစ်နေ့ တိုးလာတဲ့ စစ်ရှောင်ပြည်သူတွေအတွက် စားနပ်ရိက္ခာပြတ်တောက်မှုတွေလည်းဖြစ်နေတယ်လို့ Job For Kayah အဖွဲ့တာဝန်ခံက ပြောပါတယ်။
ဒါ့အပြင် ဒီးမော့ဆို အနောက်ခြမ်းစစ်ရှောင်စခန်းတွေမှာ ခိုလှုံနေရတဲ့ ပြည်သူတွေဟာ စားနပ်ရိက္ခာပြတ်တောက်မှုကိုသာ ရင်ဆိုင်နေရတာမဟုတ်ဘဲ စစ်ကောင်စီက မကြာခဏလေကြောင်းကနေ ဗုံးလာကြဲတာ၊ လက်နက်ကြီးတွေနဲ့ ရမ်းကားပစ်တာတွေကြောင့် နေထိုင်ရတာလည်း လုံခြုံမရှိဘူးလို့ သူကပြောပြပါတယ်။
MK-007
ဓာတ်ပုံ-ပုံဟောင်း ဖြစ်ပါတယ်။
#MeKongNews
#ဒီးမော့ဆို
#စစ်ရှောင်စခန်း
#စစ်ကောင်စီ
#ဗုံးကြဲ
