မဲခေါင်၊ ဇူလိုင် ၃

ကရင်နီပြည်၊ မယ်စဲ့မြို့နယ်၊ ဟိုစဲ့ကျေးရွာ အနီးဝန်းကျင်မှာ ခိုလှုံနေတဲ့ ဒေသခံ စစ်ဘေးရှောင် ၃,၀၀၀ ဝန်းကျင် အတွက် စားနပ်ရိက္ခာနဲ့ နေရာထိုင်ခင်း အခက်တွေ့နေတယ်လို့ ကလလတ ခေါင်းဆောင် တစ်ဦးက မဲခေါင်သတင်းဌာနကို ပြောပါတယ်။

စစ်ကောင်စီတပ်တွေနဲ့ ဒေသခံ တော်လှန်ရေး ပူးပေါင်းတပ်တွေ ဇွန်လ အတွင်း တိုက်ပွဲတွေ ပြင်းထန်ခဲ့တဲ့ အဆိုပါ ဒေသမှာ ဒေသခံ ၆,၀၀၀ ဝန်းကျင် နေရပ်စွန့်ခွာ ထွက်ပြေးနေရတာပါ။

“စစ်ရှောင်ကတော့ ခုလောလောဆယ် ကျွန်တော်တို့ဆီမှာ နေရာတောင် မလောက်ဘူးဗျ။ ကျွန်တော်တို့က ထိုင်းဘက်ကို ပို့တာ ထိုင်းက ၃ ထောင်ကျော် လက်ခံထားတယ်။ ကျန်တဲ့ ၃ ထောင်နီးနီးက ကျွန်တော်တို့ ဘက်ခြမ်းမှာ ရှိသေးတယ်။ စစ်ရေးအရ ပိုပြီးတော့ ပြင်းထန်လာရင် စစ်ရှောင်တွေ အတွက်လည်း စိုးရိမ်ရပါတယ်” လို့ ကလလတ ခေါင်းဆောင်က ဆိုပါတယ်။

အဆိုပါ စစ်ရှောင်တွေဟာ မယ်စဲ့၊ ဖားဆောင်း၊ ဘောလခဲ စတဲ့ မြို့နယ်တွေက တိမ်းရှောင်လာတာ ဖြစ်ပြီး တောတောင်တွေထဲမှာ ကိုယ့်အစုနဲ့ကိုယ် အဆင်ပြေသလို နေထိုင်ကြရတယ်လို့လည်း သိရပါတယ်။

“မိုးကာတွေ လိုတယ်။ စားနပ်ရိက္ခာတွေ လိုတယ်။ အခု မိုးရာသီ ဆိုတော့ ရေတော့ ရပေမယ့် လုံလောက်မှု မရှိသေးဘူးပေါ့နော်။ နောက်တစ်ခုက ကရင်နီက စစ်ရှောင် ပြည်သူတွေက စစ်ကောင်စီဘက်က ပစ်တဲ့ လက်နက်ကြီးနဲ့ လေကြောင်း တိုက်ခိုက်မှုတွေကို စိုးရိမ်ရတဲ့ အခြေအနေ ဖြစ်တယ်” လို့ ကရင်နီပြည်နယ်တွင်း စစ်ရှောင် ကူညီနေသူ တစ်ဦးက ပြောပါတယ်။

ကရင်နီပြည်နယ်တွင်းမှာ လမ်းပန်း ဆက်သွယ်ရေး အခက်အခဲတွေ ရှိနေပြီး လက်ရှိ ဖုန်းလိုင်း၊ အင်တာနက်လိုင်း ဖြတ်တောက် ခံထားရတာကြောင့် တစ်နေရာနဲ့ တစ်နေရာ ဆက်သွယ်သွားလာဖို့ ပိုမို ခက်ခဲလာကာ စစ်ရှောင်တွေကို ကူညီနိုင်ဖို့ ခက်လာတယ်လို့ စစ်ရှောင် ကူညီနေသူတွေက ဆိုပါတယ်။

ပြီးခဲ့တဲ့ ဇွန်လ ၂၃ ရက်နေ့ကစပြီး ရွာသစ်မြို့ဘက်ကို စစ်ကောင်စီတပ်တွေ အင်အား အလုံးအရင်းနဲ့ စတင် စစ်ကြောင်းထိုးခဲ့တာကြောင့် ဒေသခံ တော်လှန်ရေးပူးပေါင်းတပ်ဖွဲ့တွေက အပြင်းအထန် ခုခံနေရပြီး တိုက်ပွဲတွေ ပြင်းထန်လာတယ်လို့ ဒေသတွင်း သတင်းရင်းမြစ်တွေက ဆိုကြပါတယ်။

လက်ရှိအချိန်ထိ တိုက်ပွဲတွေ ပြင်းထန်နေပြီး နှစ်ဖက်ထိခိုက် ကျဆုံးမှုတွေ ရှိနေပေမယ့် အရေအတွက် အတည်မပြုနိုင်သေးဘူးလို့ သတင်းရင်းမြစ်က ဆိုပါတယ်။

ဇွန်လ ၃၀ ရက်နေ့မှာတော့ မြေပြင် တိုက်ပွဲ ပြင်းထန်နေစဉ် စစ်ကောင်စီဘက်က တိုက်လေယာဉ် တစ်စီးကို စုပြုံပစ်ခတ်ရာ မြေပြင်ကို ထိုးကျ ပျက်စီးသွားခဲ့တယ်လို့ ကလလတ အဖွဲ့ဝင် တစ်ဦးက ပြောဆိုထားပါတယ်။

မယ်စဲ့၊ ဘောလခဲနဲ့ ဖားဆောင်းမြို့နယ်အနီး တိုက်ပွဲတွေမှာ ကလလတ နဲ့အတူ KNU၊ KNPP၊ အလယ်ပိုင်းတိုင်း PDF ၊ လွိုင်ကော် PDF နဲ့ KRU တပ်ပေါင်းစု အစရှိတဲ့ ကရင်နီပြည်နယ်တွင်းက တော်လှန်ရေးတပ်ဖွဲ့ အများစု ပူးပေါင်း ပါဝင်နေတယ်လို့ သိရပါတယ်။

စစ်အာဏာသိမ်းပြီးနောက် အခုနှစ် မတ်လ ၃၁ ရက်နေ့ထိ ၂ နှစ်ကျော် ကာလအတွင်း နိုင်ငံတဝှမ်း တိုက်ပွဲပေါင်း ၈,၇၂၁ ကြိမ် ဖြစ်ပွားခဲ့တယ်လို့ ISP Myanmar က ထုတ်ပြန်ထားတာပါ။

အာဏာသိမ်းကာလမှာ လက်ရှိအချိန်ထိ လက်နက်ကိုင် ပဋိပက္ခတွေကြောင့် နေရပ်စွန့်ခွာရတဲ့ ပြည်သူ ၁ ဒဿမ ၈ သန်းကျော်နေပြီလို့ ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းရေးရုံး-UNOCHA ရဲ့ အချက်အလက်တွေအရ သိရပါတယ်။

MK-009

#MekongNews

#မယ်စဲ့

#စစ်ဘေးရှောင်

#ကလလတ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)