မဲခေါင်၊ ဇူလိုင် ၁
ရှမ်းပြည်နယ် တောင်ပိုင်း၊ လဲချားမြို့နယ်မှာ ဒီကနေ့ ဇူလိုင်လ ၁ ရက်က စစ်တိုက်လေယာဉ် ပျံဝဲနေပြီး SSPP ဌာနချုပ်သွားရာ လမ်းကြောင်းဖြစ်တဲ့ မိုင်းနောင်နဲ့ ဝမ်ဟိုင်းကြားမှာ စစ်တပ် စစ်ဆေးရေး ဂိတ်တွေ ပိုများလာတယ်လို့ ဒေသခံ တစ်ဦးက မဲခေါင်သတင်းဌာနကို ပြောပါတယ်။
လဲချားမြို့နယ်ထဲမှာ ဒီကနေ့ မနက်ပိုင်းက စစ်တိုက်လေယာဉ် ပျံဝဲနေတာဖြစ်ပြီး SSPP ဌာနချုပ်သွားတဲ့ လမ်းပေါ်မှာ စစ်တပ်ဂိတ် အများအပြား ချလာတာဟာ စစ်ကောင်စီနဲ့ SSPP တပ်ဖွဲ့ စစ်ရေးတင်းမာမှုကို ရည်ညွှန်းနေတယ်လို့ စစ်ရေးလေ့လာ သုံးသပ်သူ တစ်ဦး ပြောပါတယ်။
“ဒီလို အခြေအနေက SSPP နဲ့ စစ်တပ်ကြား စစ်ရေး အခြေအနေ တင်းမာလာတာကို ပြတာပဲ။ အဲ့နားမှာ အရင် ကတည်းက ဂိတ်တွေ ရှိတာတော့ရှိတယ်၊ အခုလောက်တော့ မများဘူးပေါ့လေ။ ဒီရက်ပိုင်း သိသိသာသာ များလာတယ်လို့ ကျွန်တော်လည်း ကြားပါတယ်။ မိုင်းနောင်မြို့ကဆို SSPP ဌာနချုပ်ရှိတဲ့ ဝမ်ဟိုင်းနဲ့ မိုင် ၂၀ ကျော်လောက်ပဲ ဝေးတာလေ” လို့ သူကပြောပါတယ်။
မိုင်းနောင်-ဝမ်ဟိုင်း လမ်းပိုင်းအပြင် ရှမ်းတောင်-မြောက်နယ်စပ် ဒေသတွေမှာလည်း စစ်ကောင်စီက စစ်ဆေးဂိတ်တွေ အရင်ထက် ပိုချထားပြီး လုံခြုံရေး တင်းကြပ်ထားတယ်လို့ ဒေသခံ တစ်ဦးက ပြောပါတယ်။
“ဒီရက်ပိုင်း ဂိတ်တွေ၊ စစ်ဆေးရေးဂိတ်တွေ ပိုများလာတယ်။ ရှမ်းတောင်-မြောက်ဆက်ထားတဲ့ ကောင်းလန် တံတား၊ မိုင်းရယ်နဲ့ ကျေးသီးကြားပေါ့။ ဂိတ်တွေ ပိုများလာတယ်။ အစစ်အဆေးလည်း ပိုကြမ်းလာတယ်။ မိုင်းနောင်နဲ့ ဝမ်ဟိုင်း ကြားမှာလည်း အတူတူပဲ” လို့ သူကပြောပါတယ်။
ပြီးခဲ့တဲ့ ဇွန်လလယ်က လဲချားမြို့နယ်ရှိ SSPP တပ်စခန်း ၁၀ ခုကို စစ်ကောင်စီက ပြန်ဆုတ်ခိုင်းရာ SSPP က ပယ်ချခဲ့မှုကြောင့် စစ်ရေး တင်းမာလာတာ ဖြစ်ပါတယ်။
ဒီလို စစ်ကောင်စီဘက်က စစ်ရေးလှုပ်ရှားမှုတွေနဲ့ ပတ်သက်ပြီး SSPP တပ်ဖွဲ့ ပြောရေးဆိုခွင့်ရှိသူ ဗိုလ်မှူးကြီး စိုင်းဖုန်းဟန်၊ ဗိုလ်မှူးကြီးစိုင်းစု နဲ့ ဗိုလ်ကြီးသီဟရာဇာ တို့ကို မဲခေါင်သတင်းဌာန အနေနဲ့ ဆက်သွယ်နေပေမဲ့ ဖုန်းလက်ခံ ဖြေကြားမှု မပြုသေးပါဘူး။
စစ်ကောင်စီရဲ့ ခိုလမ် တိုင်းစစ်ဌာနချုပ်ရဲ့ လုံခြုံရေး အတွက် အရေးပါသလို SSPP ဌာနချုပ်ကို စစ်ရေးအရ တိုက်ရိုက် ခြိမ်းခြောက်နိုင်တဲ့ လဲချားမြို့နယ်ထဲက SSPP တပ်စခန်းတွေ ပြန်မဆုတ်ပေးနိုင်ဘူးလို့ တရားဝင် အကြောင်းပြန်ထားရာက စစ်ရေးတင်းမာနေတာဖြစ်လို့ အချိန်မရွေး တိုက်ပွဲတွေ ဖြစ်လာနိုင်တယ်လို့ ရှမ်းပြည်နယ် အခြေစိုက် စစ်ရေး လေ့လာသူက သုံးသပ်ထားပါတယ်။
MK-007
#MekongNews
#လဲချားမြို့နယ်
#စစ်တိုက်လေယာဉ်
#SSPP
