မဲခေါင်၊ မေ ၃
ရှမ်းပြည်တောင်ပိုင်း၊ ပင်လောင်းမြို့နယ်မှာ ဆန်၊ ဆေးဝါးနဲ့ လူသုံးကုန်ပစ္စည်း သယ်ဆောင်လာပါက စစ်ကောင်စီဂိတ်က သိမ်းဆည်းမှုတွေ ပြုလုပ်နေတယ်လို့ ဒေသခံတွေက ပြောပါတယ်။
အောင်ပန်း- ပင်လောင်း လမ်းမ တစ်လျှောက်ရှိ စစ်ကောင်စီ စစ်ဆေးရေးဂိတ်တွေမှာ ကားတွေကို တင်းတင်းကြပ်ကြပ် စစ်ဆေးနေပြီး ဆန်နဲ့ဆေးဝါး ပါလာပါက သိမ်းဆည်းနေတာ ဖြစ်တယ်လို့ ပင်လောင်း ဒေသခံ တစ်ဦးက ပြောပါတယ်။
“သူတို့ အဓိက သိမ်းတာ ဆန်နဲ့ဆေးဝါး တွေပေါ့။ တစ်ကိုယ်ရည်သုံး တစ်မိသားစုစာ အဲ့လောက်ပဲ ပေးသယ်တယ်။ ဆေးတွေက အဖါလိုက် ပါလာတာမျိုး ဆိုင်မှာ ပြန်တင်ရောင်းဖို့လိုမျိုးဆို စစ်ကောင်စီတွေက သိမ်းပစ်တယ်ဗျ။ ဆန်ဆိုလည်း သုံးလေးအိတ်ပဲ အများဆုံး ပေးသယ်တယ်။ အဲ့ဒါလည်း ပိုက်ဆံပေးစားရတယ်။ အဲ့ထက်ပိုများရင် သူတို့ သိမ်းတယ်” လို့ ဆန်အိတ် အသိမ်းခံခဲ့ရတဲ့ ပင်လောင်း ဒေသခံက ပြောပါတယ်။
အခုနောက်ပိုင်း စစ်ကောင်စီက အဝတ်အထည်တွေကို အိတ်လိုက် သယ်လာတာတွေ့ရင် သိမ်းဆည်းလာ တယ်လို့လည်း နောက်ထပ် ပင်လောင်း ဒေသခံ တစ်ဦးက ပြောပါတယ်။
“သာမန် အဝတ်အထည်တွေတောင် သိမ်းချင်ရင် သိမ်းနေတာဗျ။ အကြောင်းပြတာတော့ ကရင်နီ စစ်ဘေးရှောင်ကို ကူညီဖို့ ပစ္စည်းတွေ ဖြစ်နိုင်လို့ သိမ်းတာတဲ့။ အမှန်တော့ သူတို့ ပိုက်ဆံ တောင်းစားချင်တာပါ။ လူစိတ်ရှိရင် တစ်ကယ် စစ်ဘေးရှောင်ကို ကူညီတဲ့ အဝတ်အစားဖြစ်လည်း ဂိတ်ပေးဖြတ်သင့်တာပေါ့၊ အခုက ဓာတ်မြေဩဇာ သယ်တာတောင်မှ ပေးစားရတယ်” လို့ သူကပြောပါတယ်။
အဲဒီလို စစ်ကောင်စီဂိတ်က တာဆီး သိမ်းယူမှုတွေကြောင့် ပင်လောင်းမြို့မှာ ကုန်ပစ္စည်းတွေ အရင်ကထက် ဈေးပိုကြီးလာတယ်လို့ ဒေသခံတွေက ပြောပါတယ်။
“ဆေးတွေ ဆန်တွေက အစ ဈေးပိုကြီးလာတယ်ရှင့်။ အရင် တစ်အိမ် ၄ သောင်းလောက် ပေးရတဲ့ ဆန်က အခု ၅ သောင်းကျော်ကုန်ပြီရှင့်။ ဆေးတွေဆိုလည်း အရင်လို လိုအပ်သလောက် ဝယ်မရတော့ဘူး။ အရေးပေါ် ဆေးဆို ဒီအတိုင်း ဝယ်လို့ မရတော့ဘူး။ ထောက်ခံချက်ပါမှတဲ့၊ စစ်ကောင်စီက ဆေးဆိုင်တွေကို အဲ့လို ပြောထားလို့တဲ့ရှင့်” လို့ ပင်လောင်း ဒေသခံ အမျိုးသမီးက ပြောပါတယ်။
အဲ့ဒီလို သယ်ယူ ပစ္စည်း သိမ်းယူတာတွေကို အောင်ပန်း-ပင်လောင်း လမ်းမပေါ်ရှိ အောင်ပန်းဂိတ်၊ တီကျစ်ဂိတ် နဲ့ ပင်လောင်းဂိတ်တွေက ပြုလုပ်တာ ဖြစ်တယ်လို့ ဒေသခံတွေက ပြောပါတယ်။
အခုလို ဒေသခံ လူထု အခက်အခဲ တွေ့နေပေမယ့် PNO ပါတီနဲ့ ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦးစီး အဖွဲ့က တစ်စုံတစ်ရာ ဖြေရှင်းပေးတာ မရှိဘူးလို့ ဒေသခံတွေက ပြောပါတယ်။
“PNO မြို့နယ်မှူးတွေဆီကနေ ကျွန်တော်တို့ အခု အခက်အခဲကို ပြောပြပေမယ့် ဖြေရှင်းပေးတာ မတွေ့ရဘူး။ အခု ပင်လောင်းမှာ စစ်ရှောင်လာတာကလည်း ပအိုဝ်းလူမျိုးတွေပဲလေ။ ဒါပေမယ့် သူတို့ မဖြေရှင်းပေးဘူး။ သူတို့လည်း ဗမာစစ်တပ်(စစ်ကောင်စီ)ကို မပြောရဲလို့ ထင်တယ်” လို့ ပင်လောင်းဒေသခံ ခွန်တဝမ်းက ပြောပါတယ်။
စစ်ကောင်စီက ဆန်၊ ဆေးဝါး၊ အဝတ်အထည်တွေ ဖမ်းဆီး သိမ်းဆည်းနေတာကြောင့် ဒေသခံလူထု အခက်အခဲ တွေ့နေရတဲ့ အပေါ် ဖြေရှင်းပေးနိုင်မှု ရှိမရှိ မေးမြန်းဖို့ စစ်ကောင်စီ အဖွဲ့ဝင် PNO ပါတီ ဥက္ကဋ္ဌ ခွန်စံလွင် ကို ဆက်သွယ်ပေမယ့် လက်ခံ ဖြေကြားတာ မရှိပါဘူး။
လက်ရှိ ပင်လောင်းမြို့နယ် တောင်ပိုင်းမှာ ရေရှားပါးပြီး စစ်ရှောင်တွေ များပြားနေတာကြောင့် အရေပြား ရောဂါ၊ ရေယုန်၊ ဝမ်းလျှောဝမ်းပျက်တာတွေ ဖြစ်ပွားနေပြီး ဆေးဝါး မပြည့်စုံတာကြောင့် လုံလောက်တဲ့ ဆေးကုသမှု မရရှိကြဘူးလို့ သိရပါတယ်။
CJ-002
#MeKongNews
#ပင်လောင်းမြို့နယ်
#စစ်ဘေးရှောင်
#PNO
