မဲခေါင်၊ ဧပြီ ၁၁
ချင်းပြည်နယ်၊ ဖလမ်းမြို့နယ်မှာ ပြည်သူတွေ နေထိုင်တဲ့ မြို့တွင်းနဲ့ ကျေးရွာတွေထဲကို စစ်တပ်က ဗုံးကြဲ တိုက်ခိုက်လို့ ပြည်သူ ၉ ဦး ထက်မနည်း သေဆုံးခဲ့တယ်လို့ ချင်းအမျိုးသား အဖွဲ့ချုပ်/ ချင်းအမျိုးသား ကာကွယ်ရေးတပ်ဖွဲ့-CNO က ဒီနေ့ ဧပြီ ၁၁ ရက်မှာ ထုတ်ပြန်ပါတယ်။
မနေ့က ဧပြီ ၁၀ ရက်နေ့ မနက် ၁၁ နာရီဝန်းကျင်မှာ ဖလမ်းမြို့နယ်၊ ဝေဘူလမြို့ကို တိုက်လေယာဉ်နဲ့ ၂ ကြိမ် ဗုံးကြဲတာကြောင့် ပျက်စီး ဆုံးရှုံးမှုတွေ ဖြစ်ခဲ့ပါတယ်။
ဒါ့အပြင် ဂျက်လေယာဉ်နဲ့ ဗာရ်ရွာနဲ့ ကြောင်ဟင်ရွာကြားကို ဗုံး ၆ လုံး ကြဲချခဲ့တာကြောင့် ဗာရ်ကျေးရွာက အသက် ၄၉ နှစ်အရွယ် ဦး Hramhu သေဆုံးခဲ့ရပြီး ဒေသခံ ပြည်သူတွေ ဘေးလွတ်ရာ ထွက်ပြေး တိမ်းရှောင်ခဲ့ရတယ်လို့ ချင်းရေးရာအဖွဲ့ချုပ်-ICA က ပြောပါတယ်။
အလားတူ မနေ့က နေ့လယ် ၂ နာရီခွဲ ဝန်းကျင်မှာ ဖလမ်းမြို့နယ်၊ ရမ်ထလိုကျေးရွာ အနီးတဝိုက်ကို တိုက်လေယာဉ်နဲ့ ၆ ကြိမ်ထက်မနည်း ဗုံးကြဲရာ ဗုံး ၄ လုံးက ရွာထိပ် တောင်ကုန်းပေါ် ကျရောက်ခဲ့ပြီး ကျန်တဲ့ ၂ လုံးကတော့ ရမ်ထလိုကျေးရွာတွင်း ကျရောက်ပေါက်ကွဲခဲ့ကာ ပြည်သူတွေကတော့ ဘေးလွတ်ရာ ရှောင်တိမ်းနိုင်ခဲ့တာကြောင့် ထိခိုက်မှု မရှိခဲ့ဘူးလို့ ချင်းရေးရာ အဖွဲ့ချုပ် – ICA လက်ထောက်ညွှန်ကြားရေးမှူး Salai Van Sui San က ပြောပါတယ်။
“တစ်ရက်တည်းတွင် ဖလမ်းမြို့နယ်၊ နေရာ ၃ နေရာမှာ လေကြောင်း တိုက်ခိုက်မှုကနေ အပြစ်မဲ့ပြည်သူ ၁၁ ဦးကို သတ်ဖြတ်တယ်။ ဗုံး ၁၄ လုံးတိတိကို ပစ်ချခဲ့ရုံသာမက အပြစ်မဲ့ ပြည်သူတွေကို စိတ်ခြောက်ခြားအောင် လက်နက်ကြီးနဲ့ ချိန်ရွယ်ထားတဲ့ စစ်ကောင်စီတပ်ကို Institute of Chin Affairs – ICA အနေဖြင့် အပြစ်တင်ရှုံ့ချပါတယ်” လို့ သူက ပြောပါတယ်။
စစ်ကောင်စီတပ်ဟာ ဖလမ်းမြို့ Vankau တောင်ထပ်မှာ နေရာယူထားပြီး CNO ကဖွင့်လှစ်ထားတဲ့ စာသင်ကျောင်းတွေ၊ စာသင်ကြားရေး နေရာတွေ၊ ပြည်သူတွေ စုဝေးနိုင်တဲ့ နေရာတွေနဲ့ CNDF တပ်သားတွေ ခြုံခိုနိုင်တဲ့ နေရာတွေကို ပစ်မှတ်ထားပြီး လက်နက်ကြီးတွေနဲ့ ချိန်ရွယ်ထားတယ်လို့ ချင်းရေးရာအဖွဲ့ချုပ်ရဲ့ ထုတ်ပြန်ချက်မှာ ဖော်ပြထားပါတယ်။
မနေ့က ဧပြီ ၁၀ ရက် မနက် ၅ နာရီခွဲမှာပဲ ဖလမ်းမြို့နဲ့ ၁၂ မိုင်ခန့်ကွာတဲ့ ဗာရ်ကျေးရွာ စစ်ကောင်စီ တပ်စခန်းကို တိုက်ခိုက် သိမ်းပိုက်ရာ စစ်သား ၂၅ ဦးအနက် ၁၁ ဦး တိုက်ပွဲ အတွင်း သေဆုံးခဲ့ပြီး ၁၄ ဦးကို အရှင်ဖမ်းဆီးနိုင်ခဲ့တယ်လို့ CNDF က ထုတ်ပြန်ထားပါတယ်။
MK – 009
#MeKongNews
