မဲခေါင်၊ ဧပြီ ၈

အာဏာသိမ်းစစ်ကောင်စီခေါင်းဆောင် မင်းအောင်လှိုင်ဟာ နိုင်ငံဖြတ်ကျော် မီးခိုးမြူလျော့ပါးရေး ဟုဆိုကာ ထိုင်းဝန်ကြီးချုပ် ပရာယွတ်၊ လာအိုဝန်ကြီးချုပ် ဆစ်ဖန်ဒွန်း တို့နဲ့ ဧပြီလ ၇ရက် မနက်ပိုင်းက ဆွေနွေးခဲ့ကြတယ်လို့ ထိုင်းမီဒီယာတွေနဲ့ စစ်ကောင်စီလော်ဘီမီဒီယာတွေက ထုတ်ပြန်ပါတယ်။

ထိုင်ဝန်ကြီးချုပ် ပရာယွတ်က ဒီ ၃ နိုင်ငံစလုံးက ပြည်သူတွေရဲ့ ကျန်းမာရေးဟာ လေထုညစ်ညမ်းပြီး မီးခိုမြူတွေထူထပ်နေလို့ စိုးရိမ်စရာဖြစ်နေတဲ့အတွက် ပူးပေါင်းဆောင်ရွက်ခြင်း အကျိုးတရားနဲ့ အဖြစ်မှန်တွေက အရေးကြီးပါကြောင်း၊ ဒီပြဿနာကိုတိုက်ဖျက်ဖို့ တစ်နိုင်ငံကို တစ်နိုင်ငံက ပူးပေါင်းကူညီဖို့ လိုအပ်ကြောင်း၊ ဒါကြောင့် ကောင်းကင်သန့်စင်ရေးဗျူဟာ – Clear Sky Strategy ကို အဆိုပြုတင်ပြခဲ့တာဖြစ်တယ်လို့ Bangkok Post က ဖော်ပြပါတယ်။

မြန်မာအာဏာသိမ်းစစ်ခေါင်းဆောင် ဘက်ကတော့ ဘာတွေဆွေးနွေးတယ်ဆိုတာ အသေးစိတ်ဖော်ပြထားခြင်း မရှိပါဘူး။

အာဏာသိမ်းစစ်ခေါင်းဆောင် မင်းအောင်လှိုင်ဟာ မီးခိုးမြူနဲ့ လေထုညစ်ညမ်းမှုအတွက် နိုင်ငံအဆင့်ဆွေးနွေးမှု သွားလုပ်ပေမယ့် သူ့မှာ ဒီကိစ္စနဲ့ပတ်သက်လို့ ဘာမှ ထိထိရောက်ရောက် ကိုင်တွယ်ဖို့ စဉ်းစားထားတာ မရှိဘူးသလို ဒေသတွင်းအဆင့်မှာလည်း ဘာကာကွယ်တားဆီးမှုမှ လုပ်ထားတာ မရှိဘူးလို့ ရှမ်းပြည်နယ်က ပတ်ဝန်းကျင်ထိန်းသိမ်းရေး ပညာရှင်တစ်ဦးက ပြောပါတယ်။

“ဟိုက ဖိတ်ခေါ်လို့သာ လူရာဝင်ချင်လို့ သွားဆွေးနွေးတာပဲ ရှိတယ်။ သူ့မှာ (လေထုညစ်ညမ်းမှုနဲ့ ပတ်သက်လို့) ဘာ မဟာဗျူဟာ၊ နည်းဗျူဟာမှ မရှိဘူး။ လက်တွေ့ ဒေသတွင်းမှာ လုပ်နေတာလည်း ဘာမှမရှိဘူး။ အရင် NLD လက်ထက်တုန်းက စီစဉ်ခဲ့တာတွေအများကြီး။ အာဏာလည်းသိမ်းရော အကုန်သဲထဲရေသွန်ဖြစ်သွားရော” လို့ သူက ထောက်ပြပြောဆိုပါတယ်။

NLD အစိုးရလက်ထက်က မီးခိုးမြူလျော့ပါရေးအတွက် ရှမ်းပြည်နယ် သစ်တောသယံဇာတဝန်ကြီးကိုယ်တိုင် ဒေသတွင်းလှည့်လည် ပညာပေးဟောပြောတာ၊ တောမီးလောင်ကျွမ်းမှုစောင့်ကြည့်ဒရုန်းတွေ ထားရှိဖို့ စီစဉ်တာတွေ လုပ်ဆောင်ခဲ့ပါတယ်။

ဒါ့အပြင် မီးခိုးမြူဒဏ်ကို ဒေသတွင်းလူထုခံစားနေရချိန်မှာ သယံဇာတနဲ့ ပတ်ဝန်းကျင်ထိန်းသိမ်းရေး ပြည်ထောင်စုဝန်ကြီး ဦးအုန်းဝင်းကိုယ်တိုင် မြေပြင်ဆင်းပြီး မီးခိုးမြူရှောင်နေရာတွေစီစဉ်ပေးတာ၊ လေထုအရည်အသွေးတိုင်းစက် ချထားပေးတာတွေ လုပ်ဆောင်ပေးခဲ့ပါတယ်။

လေထုညစ်ညမ်းမှုနဲ့ မီးခိုးမြူထူထပ်မှုကို တာချီလိတ်ဒေသတွင်းမှာ နှစ်စဉ်လိုလို ခံစားရပေမယ့် ဒီနှစ်မှာတော့ ပိုမိုဆိုးရွားလာတယ်လို့ တာချီလိတ်ဒေသခံတစ်ဦးက မဲခေါင်ကို ပြောပါတယ်။ ဒီလိုဆိုးရွားတဲ့အခြေအနေပေါ်မှာ ဒေသတွင်းအာဏာပိုင်တွေရဲ့ ကိုင်တွယ်မှုက မရှိသလောက်ဖြစ်တယ်လို့ အဲဒီဒေသခံကပြောပါတယ်။

“ကားတစ်စီးနဲ့တော့ ရေဖျန်းတာတွေ့တယ်။​ ပြီးတော့ မက်စ်တပ်ဖို့ လိုက်ပတ်အော်တယ်။ ဒါပဲ။ အရင်တုန်းကလို ပြည်သူစိတ်ကျေနပ်အောင် အင်တိုက်အားတိုက်လုပ်တာ မရှိဘူး” လို့ သူက ပြောပါတယ်။

လက်ရှိမီးခိုးမြူထူထပ်မှုနဲ့ လေထုညစ်ညမ်းမှုတွေဟာ ဒေသတွင်း တောမီးလောင်ကျွမ်းမှုနဲ့ တောင်ယာမီးရှို့မှုတွေကြောင့် ဖြစ်ပေါ်နေတာဖြစ်ပြီး ဒီပြသနာကို ဖြေရှင်းနိုင်ဖို့ ကာလရှည်စီမံကိန်းချဆောင်ရွက်ရမှာဖြစ်တယ်လို့ ရှမ်းပြည်နယ်အခြေစိုက် ပတ်ဝန်းကျင်ထိန်းသိမ်းရေး ပညာရှင်က ပြောပါတယ်။

တောမီးလောင်ကျွမ်းမှုကို စနစ်တကျတားဆီးတာ၊ တောင်ယာမီးရှို့မှုနဲ့ပတ်သက်တဲ့ ပညာပေးလုပ်ငန်းစဉ်တွေလုပ်ဆောင်တာ၊ တောင်ယာကိုမီးမရှို့ဘဲ ပြန်လည်စိုက်ပျိုးနိုင်အောင် နည်းပညာနဲ့ ငွေကြေးကူညီပံ့ပိုးတာတွေ လုပ်ဆောင်ရမှာဖြစ်ပြီး ဒီလုပ်ငန်းစဉ်တွေဟာ ပြည်သူရွေးကောက်တင်မြှောက်ထားတဲ့ အစိုးရတွေသာ လုပ်ဆောင်နိုင်မှာဖြစ်တယ်လို့ သူက ပြောပါတယ်။

တာချီလိတ်ဒေသတဝိုက်မှာ ဒီကာလမှာ တောင်ယာမီးရှို့မှုတွေ အများအပြားရှိနေပြီး ဒါကို ဘယ်လိုမှ တားလို့မရဘူးလို့ နောက်ထပ်တာချီလိတ်ဒေသခံတစ်ဦးက မဲခေါင်ကို ပြောပါတယ်။

တာချီလိတ်ဒေသအပြင် ထိုင်းနိုင်ငံမြောက်ပိုင်း ချင်းမိုင်၊ ချင်းရိုင်ဒေသတွေမှာ မီးခိုးမြူထူထပ်မှုနဲ့ လေထုညစ်ညမ်းမှုကိုနှစ်စဉ်ခံစားရလေ့ရှိပေမယ့် ဒီနှစ်မှာတော့ ဆိုးဆိုးရွားရွားခံစားနေရပြီး ဒေသခံပြည်သူလူထုရဲ့ ကျန်းမာရေးကို အကြီးအကျယ်ခြိမ်းခြောက်နေတာဖြစ်ပါတယ်။

ပုံအညွှန်း – NLD အစိုးရလက်ထက် မီးခိုးမြူလျော့ပါးရေး ဝန်ကြီးများဆောင်ရွက်နေပုံနှင့် စစ်အာဏာရှင်၏ မီးခိုးမြူလျော့ပါးရေး ဆောင်ရွက်နေပုံ

MK – 004

#MeKongNews

#တာချီလိတ် #ရှမ်းအရှေ့ #လေထုညစ်ညမ်းမှု

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)