မဲခေါင်၊ မတ် ၁၉
ရန်ကုန်မှာ သင်္ကြန်မဏ္ဍပ်တွေနဲ့ ပြည်သူရင်ပြင်မှာ လမ်းလျှောက်သင်္ကြန် ကျင်းပဖို့ စီစဉ်နေပြီး စည်ပင် ဝန်ထမ်းတွေ အနေနဲ့ မဖြစ်မနေ ပါဝင်ရမယ်လို့ စစ်ကောင်စီက ညွှန်ကြားတဲ့စာ ထွက်ထားတယ်လို့ စည်ပင်ဌာနမှ အမည်မဖော်လိုသူ သတင်းရင်းမြစ်ထံက သိရပါတယ်။
ရန်ကုန် သင်္ကြန် စည်ကားဖို့ ရန်ကုန် အစိုးရ မဏ္ဍပ်၊ မြို့တော်ဝန် မဏ္ဍပ်၊ ဌာနဆိုင်ရာနဲ့ ခရိုင်အလိုက် မဏ္ဍပ်တွေ ဆောက်ဖို့ ပြင်ဆင်နေပြီ ဒီမဏ္ဍပ်တွေ လူစည်ကားဖို့ စည်ပင် ဝန်ထမ်းတွေ မဖြစ်မနေ ပါဝင်ရမယ်လို့ စစ်ကောင်စီက ညွှန်ကြားထားတာပါ။
“ပြည်သူရင်ပြင်ထဲ လမ်းလျှောက်သင်္ကြန် လုပ်ဖို့ တစ်ဌာနကို ဘယ်နှစ်ယောက်ဆိုပြီး အင်အားဖြည့်ခိုင်းတဲ့ သဘော။ အရင်နှစ်တွေတုန်းက လိုပဲ။ လုပ်နေကြပဲလေ သူတို့က။ လုံခြုံရေးအရတော့ ဝန်ထမ်းတွေပဲ ဝင်ခိုင်းမယ့် သဘောရှိတယ်။ လူစည်ကားတယ် ဆိုတာ ပြချင်တဲ့ ပွဲတော်တော်များများကို အပြင်လူ မထည့်တာ များတယ်” လို့ သတင်းရင်းမြစ်က ဆိုပါတယ်။
စစ်အာဏာသိမ်းပြီး နောက်ပိုင်း ရိုးရာ ပွဲတော်တွေ စည်ကားမှုရှိအောင် ကြိုးစားနေပေမယ့် ပြည်သူ အများစုက စစ်ကောင်စီ လုပ်တဲ့ သင်္ကြန် ဖျော်ဖြေရေးနဲ့ ပျော်ပွဲရွှင်ပွဲ အစီအစဉ်တွေမှာ ပူးပေါင်းပါဝင်မှု နည်းပါးနေတာ ဖြစ်ပါတယ်။
ရန်ကုန်မြို့တော် စည်ပင်သာယာရေး ကော်မတီကတော့ သင်္ကြန်မဏ္ဍပ် ဆောက်လုပ်လိုသူတွေ အနေနဲ့ မတ်လကုန်ထိ လျှောက်ထားနိုင်တယ် ဆိုပြီးတော့ ကြေညာထားပါတယ်။
“သင်္ကြန်မဏ္ဍပ် ဆောက်လုပ်ဖို့က အရင်လို အမြတ်ဆိုတာ မကျန်နိုင်တာ လူတိုင်း အသိပဲလေ။ ဆောက်လုပ်ရေး ပစ္စည်းဈေးတွေနဲ့ လူမဝင်ရင် ကန်ထရိုက်က ရှုံးမှာပဲ။ စီးပွားဖြစ် မဏ္ဍပ်ကတော့ မရှိသလောက်ကို နည်းမှာပါ” နှစ်ပေါင်းများစွာ အင်းယားလမ်းမှာ သင်္ကြန်မဏ္ဍပ် ဆောက်လုပ် စီးပွားရှာခဲ့သူ တစ်ဦးက ဆိုပါတယ်။
သင်္ကြန်ကာလ အတွင်း စစ်ကောင်စီ ပြုလုပ်မယ့် ပျော်ပွဲရွှင်ပွဲတွေမှာ ပူးပေါင်းပါဝင်မှု မလုပ်ကြဖို့ ရန်ကုန် မြို့ပြပြောက်ကျားတပ်ဖွဲ့တွေနဲ့ တော်လှန်ရေး အင်အားစုတွေက တိုက်တွန်းထားပါတယ်။
စစ်တပ် အာဏာမသိမ်းမီ ကာလက ရန်ကုန်မြို့မှာ နှစ်စဉ် ပုဂ္ဂလိက ရေကစားမဏ္ဍပ် ၁၀၀ ကျော် ဆောက်လုပ် သင်္ကြန်ပွဲ ဆင်နွှဲလေ့ရှိခဲ့ပြီး ၂၀၂၀ ခုနှစ် ကိုဗစ် စတင် ဖြစ်ပွားကတည်းက စီးပွားဖြစ် သင်္ကြန်မဏ္ဍပ် ဆောက်လုပ်မှုတွေ ရပ်နားထားခဲ့တာ ဖြစ်ပါတယ်။
MK-006
