မဲခေါင်၊ မတ် ၃
စစ်ကိုင်းမြို့နယ်၊ တာတိုင်ကျေးရွာကို စီးနင်း ဝင်ရောက်တဲ့ စစ်ကောင်စီတပ်တွေဟာ ရွာက ပြန်ထွက်စဉ် ဓားစားခံအဖြစ် ဖမ်းဆီးထားတဲ့ ပကဖ ရဲဘော် တစ်ဦးနဲ့ ပြည်သူ ၁၄ ဦးကို သတ်ဖြတ်ခဲ့တယ်လို့ ဒေသခံတွေထံက သိရပါတယ်။
မြင်းမူမြို့နယ်၊ ထီးဆောင်းကျေးရွာမှာ အထိုင်ချတဲ့ စစ်ကောင်စီတပ် အင်အား ၈၀ ဝန်းကျင်က ဧရာဝတီ မြစ်ကြောင်းမှ တာတိုင်ကျေးရွာကို မတ်လ ၁ ရက်နေ့က ဝင်ရောက်ခဲ့ပြီး မနေ့က မနက် ပြန်အထွက်မှာ ရွာသား ၁၈ ဦးကို ဖမ်းသွားတာ ဖြစ်ပါတယ်။
သတ်ဖြတ်ခံရသူတွေထဲမှာ ကိုကျော်ကျော်-၃၄ နှစ်၊ ကိုထွန်းထွန်း- ၃၅ နှစ်၊ ကိုကျော်စိုး- ၃၅ နှစ်၊ ကိုငလင်း-၄၅ နှစ်နဲ့ ကိုစိုးနိုင်-၄၇ နှစ်ကိုတော့ အတည်ပြုနိုင်ပြီး မြင်းမူမြို့နယ်၊ ညောင်ရင်းကျေးရွာ မရောက်ခင် သရက်ခြံထဲမှာ သတ်ဖြတ်ထားခဲ့တယ်လို့ သိရပါတယ်။
“ဓားစာခံတွေကိုတော့ သူတို့နဲ့အတူ ခေါ်သွားရင်း လမ်းမှာ သတ်ထားခဲ့တာ။ တနေရာတည်းမှာတော့ မဟုတ်ဘူးဗျ။ သေနတ်နဲ့ ခေါင်းတွေကို တေ့ပစ်သွားတာ။ ကျွန်တော်တို့ ဒီနေ့ ညနေပိုင်းမှာမှ DB (အလောင်း) တွေကို သယ်လာပြီး သင်္ဂြိုဟ်ခဲ့ရတာ” လို့ ဒေသခံ ကာကွယ်ရေးတပ်ဖွဲ့ဝင် တစ်ဦးက မဲခေါင်သတင်းကို ပြောပါတယ်။
အသတ်ခံရသူတွေဟာ အမျိုးသမီး ၃ ဦးနဲ့ အမျိုးသား ၁၁ ဦးဖြစ်ပြီး ဖမ်းဆီးခံထားရတဲ့ ဓားစာခံတွေထဲက တစ်ဦး လွတ်မြောက်လာကာ ကျန် ၂ ဦး ပျောက်ဆုံးနေဆဲ ဖြစ်တယ်လို့ သိရပါတယ်။
ဒါ့အပြင် တာတိုင်ကျေးရွာ ပြည်သူ့ကာကွယ်ရေးတပ်ဖွဲ့ဝင် ရဲဘော် မိုက်ကယ်(ခ) ကိုကျော်ဇော ကိုလည်း သတ်ဖြတ်ပြီး ခြေ၊ လက်၊ ခေါင်းတွေကို အပိုင်းပိုင်း ဖြတ်တောက်သွားတယ်လို့ ဒေသတွင်း သတင်းရင်းမြစ်တွေထံက သိရပါတယ်။
တာတိုင်ရွာမှာ အိမ်ခြေ ၇၈ လုံး၊ လူဦးရေ ၃၅၀ ဝန်းကျင် နေထိုင်ကာ ပြီးခဲ့တဲ့ ဖေဖော်ဝါရီလအတွင်း စစ်ကောင်စီတပ်က မီးရှို့တာ ခံခဲ့ရသေးတယ်လို့ ဒေသခံတွေက ပြောပြပါတယ်။
“ပထမတခါ ဝင်တာက အိမ်တွေမီးရှို့တာ ရွာတခြမ်းကျော် ပါသွားတယ်။ အိမ်မီးရှို့ခံရတဲ့ သူတွေက နေစရာမရှိ။ အိမ်ရှိတဲ့ သူတွေကျ အသတ်ခံရ၊ အဲ့လိုမျိုးတွေ ဖြစ်နေတာ” လို့ ဒေသခံ တစ်ဦးက ဆိုပါတယ်။
လက်ရှိ တာတိုင်ရွာ အပါအဝင် ပန်းချီ၊ မြင်းဆည်၊ ထားဝယ်တဲ၊ ဥယျဉ် စတဲ့ ရွာက ဒေသခံတွေ ထွက်ပြေး တိမ်းရှောင်နေဆဲ ဖြစ်တယ်လို့ ဒေသခံတွေထံက သိရပါတယ်။
စစ်တပ်အာဏာသိမ်းပြီးနောက် ဖမ်းဆီး သတ်ဖြတ်မှုတွေကြောင့် သေဆုံးသူ ပြည်သူ ၃,၀၇၅ ဦးရှိနေပြီလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း-AAPP က မတ်လ ၂ ရက်နေ့မှာ ထုတ်ပြန်ထားပါတယ်။
MK-009
