မဲခေါင်၊ဖေဖော်ဝါရီ ၂၂
ကရင်လက်နက်ကိုင်တပ်အချင်းချင်း ပစ်ခတ်မှုတွေ ထပ်မံမဖြစ်ရေး ညှိနှိုင်းဆွေးနွေးကြဖို့ တနင်္သာရီတိုင်း အတွင်းရှိ ကရင်လူမျိုးတွေက ဖေဖော်ဝါရီ ၂၀ရက် နေ့စွဲနဲ့ စာတစ်စောင်ထုတ်ပြန်ပြီး တောင်းဆိုလိုက်ပါတယ်။
ကရင်လက်နက်ကိုင် တော်လှန်ရေး အဖွဲ့အစည်းတွေ ဖြစ်ကြတဲ့ တပ်မဟာ၄နဲ့ KTLA တို့အကြား လတ်တလော ဖြစ်ပေါ်လာတဲ့ တင်းမာမှုအပေါ် ငြိမ်းချမ်းတဲ့နည်းနဲ့ ဆွေးနွေးအဖြေရှာကြဖို့ တိုက်တွန်းစာတစ်စောင်ကို ဖေဖော်ဝါရီ ၇ရက်က ထုတ်ပြန်ခဲ့ပြီးနောက် အခုတစ်ကြိမ် ထပ်မံထုတ်ပြန်ခဲ့တာပါ။
ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၄ နဲ့ ကော်သူးလေတပ်မတော်(KTLA) အမည်နဲ့ ဖွဲ့ထားတဲ့ တပ်တို့ ဖေဖော်ဝါရီ ၁၅ရက်မှာ တိုက်ပွဲထပ်မံဖြစ်ပွားခဲ့ရာ အဲဒီဖြစ်ရပ်အပေါ် များစွာ စိတ်ထိခိုက်မိတယ်လို့ တနင်္သာရီတိုင်းရှိ ကရင်လူမျိုးတွေရဲ့ စာမှာ ဖော်ပြထားပါတယ်။
နောက်ဆက်တွဲဖြစ်ပေါ်လာမယ့် အခြေအနေတွေအပေါ်မှာလည်း များစွာစိုးရိမ်ပြီး ကရင်တစ်မျိုးသားလုံးနဲ့ မြန်မာတစ်နိုင်ငံလုံးရဲ့ ဘုံရန်သူကို အဓိက ပစ်မှတ်ထားရမယ့် အချိန်မှာ ကရင်လူမျိုးအချင်းချင်း တိုက်ခိုက်မှုတွေ ဖြစ်ပေါ်လာတဲ့အပေါ် များစွာဝမ်းနည်းမိတယ်လို့လည်း ဖော်ပြထားပါတယ်။
ဖေဖော်ဝါရီလဆန်းက KNU ဗဟိုမှတပ်မဟာ(၄) တပ်မဟာမှူးတာဝန်ကိုယူမယ့် ဗိုလ်မှူးချုပ်စေားလေးမူးကို စေလွှတ်ခဲ့ရာ ဗိုလ်မှူးချုပ်စောလေးမူးအနေနဲ့ ကရင် လက်နက်ကိုင်အဖွဲ့တွေအကြား ပြန်လည်စေ့စပ်နိုင်မယ့် လမ်းကြောင်းကိုအမြန်ဆုံးရှာဖွေပြီးထိပ်တိုက် ရင်ဆိုင်မှုတွေ နောင်မှာ မပေါ်ပေါက်လာစေဖို့ တာဝန်ယူမှု၊ တာဝန်ခံမှု ရှိရှိနဲ့ အလေးထား ဆောင်ရွက်ပေးဖို့လည်း တိုက်တွန်းထားပါတယ်။
KTLAနဲ့ KNLA ဘက်မှ အမြင့်ဆုံး တာဝန်ရှိ ပုဂ္ဂိုလ်တွေ အနေနဲ့ တွေ့ဆုံဆွေးနွေးမယ့် နည်းလမ်းနဲ့ အမြန်ဆုံးအဖြေရှာကြဖို့ အလေးထားတိုက်တွန်းတယ်လို့လည်း ဆိုပါတယ်။
KTLA အမြင့်ဆုံးပုဂ္ဂိုလ်မှာ ကရင်အမျိုးသားအစည်းအရုံး(KNU)၊ ကရင်အမျိုးသားလွတ်မြောက် ရေးတပ်မတော်(KNLA) တို့က အဖွဲ့မှ ထုတ်ပယ်ထားတဲ့ ဗိုလ်မှူးချုပ်စောနယ်ဒါးမြ ဖြစ်ပါတယ်။
ဗိုလ်မှူးချုပ်စောနယ်ဒါးမြဟာ ဝေါ်လေတိုက်ပွဲမှာ တံတား လုပ်ငန်းခွင်မှ အရပ်သား၂၀ ကျော်ကို သတ်ဖြတ်ခဲ့မှုနဲ့ ပတ်သက်ပြီး KNUရဲ့ စုံစမ်းစစ်ဆေးမှုကို လက်မခံခဲ့ရာ ကရင်အမျိုးသားကာကွယ်ရေးတပ်(KNDO) စစ်ဦးစီးချုပ်အဖြစ်မှ တာဝန်မှရပ်စဲခံရသူဖြစ်ပြီး နောက်ပိုင်းမှာ KTLA ဖွဲ့စည်းတာကြောင့် အဖွဲ့မှထုတ်ပယ်ခံခဲ့ရသူ ဖြစ်တယ်လို့ သိရပါတယ်။
KNU ဘိတ်ထားဝယ်ခရိုင်မှာ တပ်မဟာ ၄နဲ့ ပြဿနာဖြစ်ပွားနေတဲ့ KTLAမှ ဗိုလ်စောအယ်ခွီးဟာ ဗိုလ်မှူးချုပ်နယ်ဒါးမြလက်အောက်မှာ တာဝန်ယူနေသူဖြစ်ပါတယ်။
ဗိုလ်စောအယ်ခွီးဟာ ဗိုလ်ကော်လာဖိုး ဆိုကာ လူသိများပြီး သူဟာ စစ်အစိုးရထံ ၂ကြိမ် လက်နက်ချခဲ့သူဖြစ်ကာ အာဏာသိမ်းပြီးနောက် ပေါ်ပေါက်လာသူဖြစ်တယ်လို့ သိရပါတယ်။
တနင်္သာရီတိုင်းကရင်လူမျိုးတွေရဲ့ ထုတ်ပြန်ချက်မှာ ကရင်အမျိုးသားပြည်သူလူထုအနေနဲ့ မည်သည့် ကရင်လက်နက်ကိုင်အဖွဲ့အစည်းကို မဆို ရန်လိုတဲ့စိတ်၊ အနိုင်အထက် စီးနင်းလိုတဲ့စိတ်၊ ကရင်အမျိုးသားတွေနဲ့ မြန်မာပြည်သူတွေအားလုံးရဲ့ အကျိုးကို လစ်လျူရှုပြီး မိမိ ပုဂ္ဂလိက နဲ့ သက်ဆိုင်ရာ အဖွဲ့ငယ်တွေရဲ့ အကျိုးစီးပွားကိုသာ ကြည့်ရှုတဲ့ ခေါင်းဆောင်တွေကိုလည်း ပြင်းပြင်းထန်ထန် ရှုံချတယ်လို့ ထုတ်ပြန်စာမှာ ဖော်ပြထားပါတယ်။
MK-003
