မဲခေါင်၊ ဇန်နဝါရီ ၁၆

ကြံ့ခိုင်ရေးပါတီ ဥက္ကဋ္ဌ ဦးခင်ရီက တောင်ကြီးမြို့မှာ တိုင်းရင်းသား ယဉ်ကျေးမှုအဖွဲ့ ၈ ဖွဲ့နဲ့ တွေ့ဆုံပြီး ရွေးကောက်ပွဲ အတွက် စည်းရုံးခဲ့ရာမှာ ပအိုဝ်းနဲ့ ရှမ်းအဖွဲ့တွေ ဦးဆောင် တက်ရောက်ခဲ့တယ်လို့ သတင်းရင်းမြစ်တွေထံက သိရပါတယ်။

တောင်ကြီးမြို့ရှိ ရှမ်းပြည်နယ် ကြံ့ခိုင်ရေးတီရုံး ခန်းမမှာ ဇန်နဝါရီလ ၁၅ ရက်က ဦးခင်ရီ၊ ပြည်နယ်ပါတီ ဥက္ကဋ္ဌ ဦးစိုင်းလုံကျော်နဲ့ ပြည်နယ် အလုပ်အမှုဆောင်တွေဟာ ပအိုဝ်း၊ ရှမ်း၊ ကိုးကန့်၊ အင်း၊ တောင်ရိုး၊ ပလောင်၊ ယင်းကြား၊ မုန်းဝန်း စတဲ့ တိုင်းရင်းသားစာပေ ယဉ်ကျေးမှုအဖွဲ့ ၈ ဖွဲ့နဲ့ တွေ့ဆုံခဲ့တာ ဖြစ်ပါတယ်။

“မဲဆွယ်စည်းရုံးဖို့ လာတာပေါ့။ ဓနုကတော့ ဒီတစ်ခေါက်မှာ ထူးထူးဆန်းဆန်းမတက်ဘူး။ ပအိုဝ်းနဲ့ ရှမ်းက ဦးဆောင်ပြီး ကျန်အဖွဲ့‌တွေကို လာတက်ခိုင်းတာပေါ့။ တချို့အဖွဲ့တွေက တက်ချင်လို့ မဟုတ်ဘူး၊ အခြေအနေက ဖော်လိုလိုက်နေရလို့ လာတက်တာပေါ့”လို့ သတင်းရင်းမြစ် တစ်ဦးက ပြောပါတယ်။

အဲဒီ ဆွေးနွေးပွဲမှာ ဦးခင်ရီက တစ်နိုင်ငံတည်း တစ်မြေတည်းနေ တစ်ရေတည်း သောက်ကြတဲ့ တိုင်းရင်းသားတွေ ဖြစ်တဲ့အတွက် မလိုသူတို့ရဲ့ သွေးထိုးမှုတွေကို နားမယောင်ကြဖို့နဲ့ အချင်းချင်း သွေးစည်းညီညွတ်ကြဖို့၊ လာမယ့် ရွေးကောက်ပွဲ အောင်မြင်စွာ ကျင်းပနိုင်ဖို့ အတွက် စည်းလုံးညီညွတ်စွာနဲ့ ဝိုင်းဝန်း ဆောင်ရွက်ကြဖို့ ‌ပြောခဲ့တယ်လို့ သိရပါတယ်။

အခုလ အတွင်းမှာ ရှမ်းပြည်နယ် အတွင်း ပြည်နယ်ပါတီ ဥက္ကဋ္ဌ ဦးစိုင်းလုံကျော် ‌ဦးဆောင်ပြီး ကြံ့ခိုင်ရေးပါတီ အားကောင်းတဲ့ မြို့နယ်တွေနဲ့ လုံခြုံရေး ကောင်းတဲ့ မြို့နယ်တွေကို သွားရောက် တွေ့ဆုံ ဆွေးနွေး မဲဆွယ်မှုတွေ ပြုလုပ်နေတယ်လို့လည်း သိရပါတယ်။

MK-008

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)