မဲခေါင်၊ ဇန်နဝါရီ ၁၆
ရှမ်းပြည်နယ် ထွက်သီးနှံတွေ ကုန်အဝင်နည်းချိန်မှာ ကုန်ရှားပါးကာသီးနှံစျေးနှုန်းတွေ ပြန်တက်လာတယ်လို့ သီရိမင်္ဂလာဈေး ကုန်စိမ်းလက်ကားအရောင်းဒိုင်များက စုံစမ်းသိရပါတယ်။
ပြီးခဲ့တဲ့ ၂ လနီးပါးက ရှမ်းပြည်နယ် စိုက်ပျိူးတောင်သူတွေဟာ သီးနှံအထွက်နှုန်းနည်းတာ၊ သွင်းအားစုဈေးမြင့်တက်တာ၊ လောင်စာဆီ ဈေးတက်တာတွေကြောင့် သယ်ယူပို့ဆောင်စရိတ် ကြီးမြင့်ပြီးထွက်ရှိတဲ့ သီးနှံတွေအတွက် တွက်ချေမကိုက် ဖြစ်နေသလို၊ စားသုံးသူတွေဘက်မှာလဲ စျေးကြီးမြင့်မှုတွေ ရှိနေတာပါ။
“ရှမ်းကုန်တွေကဒိုင်တွေမှာလည်း တချိူ့ဟာတွေ ပစ္စည်းပြတ်နေတာ၊ ဈေးအတက်အကျရှိနေပေမယ့် အလုပ်သမားစရိတ်တွေ၊ ကားခတွေကတက်တော့ ဈေးထဲမှာ လျော့ရောင်းလို့မရဘူး။ ဆိုင်ခန်းခ၊ စည်ပင်ကိုပေးရတဲ့ အခတွေက တက်သထက်တက်လာတော့ ဈေးကို အတက်အကျအရင်လိုညှိရောင်းလို့မရဘူးလို့” တာမွေဈေးရှိ လက်လီ ကုန်စိမ်းရောင်းချသူတစ်ဦးက ဆိုပါတယ်။
လက်ရှိအချိန်ဟာ ပြည်နယ်နဲ့ တိုင်းအလိုက်သီးနှံမျိုးစုံ ပေါ်ချိန်ဖြစ်ပြီး လွန်ခဲ့တဲ့ ၂ နှစ် အရင်ကနဲ့ယှဉ်ရင် ရောင်းအားအခြေနေမှာ ထက်ဝက်ကျော် ကျဆင်းမှုရှိတယ်လို့လည်း သိရပါတယ်။
“အရင် ဆိုပွင့်လင်းရာသီပွဲလမ်းသဘင်ပေါများတယ်။ အခုက ပုံမှန်ခပ်အေးအေးပဲ အရောင်းအဝယ်လုပ်နေကတယ်လို့” သီရိမင်္ဂလာဈေး ကုန်စိမ်း လက်ကားအရောင်း ဒိုင်ပိုင်ရှင်က ဆိုပါတယ်။
ရှမ်းပြည်နယ်တောင်ပိုင်းရှိ အောင်ပန်း၊ ပင်လောင်၊ ကလော၊ ညောင်ရွှေနဲ့ အစရှိတဲ့မြို့နယ်တွေမှာ ခရမ်းသီး၊ ခရမ်းချဥ်သီး၊ မုန့်ညှင်းထုပ် နဲ့ ဂေါ်ဖီစိုက်ပျိူးထုတ်လုပ်တဲ့ တောင်သူအများစုလာမယ့်နှစ်မှာ စိုက်ပျိူး ထုတ်လုပ်မှု လျော့ကျနိုင်ခြေ ရှိနေပါတယ်။
လက်ရှိမှာ အောင်လံခရမ်းချဥ်သီး လက်ကားစျေး တစ်ပိဿာကို ၁၈၀၀ နီးပါးစျေးရှိပြီး ပန်းဂေါ်ဖီတစ်ထုပ် ၉၀၀ ကျော် စျေးရှိနေပါတယ်။
MK-006
