ဇန်နဝါရီလ ၄ ရက်မှာ စစ်ကောင်စီက အကျဉ်းသား၊ အကျဉ်းသူ စုစုပေါင်း ၇,၀၁၂ ကို ရာဇဝတ်ကျင့်ထုံး ဥပဒေ ပုဒ်မ ၄၀၁၊ ပုဒ်မခွဲ (၁) အရ ဆိုကာ ပြန်လွှတ်ပေးခဲ့ရာမှာ နိုင်ငံရေး အကျဉ်းသား ၃၀၀ ဝန်းကျင်သာ လွှတ်မြောက်လာတာပါ။
လက်ရှိအချိန်ထိ ရရှိထားတဲ့ အချက်အလက်တွေ အရ အကျဉ်းထောင် ၁၉ ခုထက်မနည်းမှ နိုင်ငံရေး အကျဉ်းသား ၃၀၀ ဝန်းကျင် လွတ်မြောက်လာတာလို့ သိရပါတယ်။
အဲဒီ အကျဉ်းသားလွှတ်ပေးမှု ဖြစ်စဉ်မှ ပြန်လည် လွတ်မြောက်လာတဲ့ နိုင်ငံရေး အကျဉ်းသား ၁၉၃ ဦးကိုသာ ဒီကနေ့ အထိ မှတ်တမ်းပြုနိုင်ခဲ့သေးတယ်လို့ AAPP ကဆိုပါတယ်။
လွတ်မြောက်လာသူ ဦးရေ အတိအကျနဲ့ အမည်စာရင်းတွေ ချက်ချင်းရရှိဖို့ လက်လှမ်းမမီနိုင်တဲ့အတွက် အတည်ပြုဖို့ လိုအပ်နေဆဲဖြစ်ကာ အတည်ပြုနိုင်တဲ့ အမည်စာရင်းတွေကို ဆက်လက် ဖော်ပြမယ်လို့ AAPP က ပြောပါတယ်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့ မတရား စစ်အာဏာလုမှု ဖြစ်စဉ်ကို ဆန့်ကျင်ခဲ့ကြတဲ့ ဒီမိုကရေစီရေး လှုပ်ရှားသူတွေနဲ့ ပြည်သူတွေရဲ့ နွေဦးတော်လှန်ရေး ကာလအတွင်း ကျဆုံးခဲ့ရသူ စုစုပေါင်း ၂,၇၀၂ ဦး ရှိတယ်လို့ သိရပါတယ်။
အာဏာသိမ်းချိန်မှ ၂၀၂၃ ခုနှစ် ဇန်နဝါရီလ ၅ ရက်နေ့အထိ ဖမ်းဆီးချုပ်နှောင် ခံထားရသူ ၁၃,၂၈၄ ဦးရှိပြီး အဲဒီအထဲမှ ၁,၉၁၂ ဦးမှာ ထောင်ဒဏ်ချမှတ်တာ ခံထားရတယ်လို့ သိရပါတယ်။
၂၀၂၃ ခုနှစ်၊ ဇန်နဝါရီလ ၅ ရက်အထိ နွေဦးတော်လှန်ရေးနဲ့ ဆက်စပ်ပြီး သေဒဏ်ချမှတ်ခံထားရကာ အကျဉ်းထောင်တွေမှာ ထိန်းသိမ်းခံနေရသူ စုစုပေါင်း ၁၀၀ ဦး ရှိတယ်လို့ သိရပါတယ်။
မျက်ကွယ် ပြစ်ဒဏ်ချမှတ်တာ ခံရသူ ၁၂၁ ဦးထဲမှ မျက်ကွယ် သေဒဏ်ချခံရသူ ၄၂ ဦးရှိတာကြောင့် သေဒဏ်ချမှတ် ခံထားရသူ စုစုပေါင်းမှာ ၁၄၂ ဦးရှိပြီ ဖြစ်တယ်လို့ သိရပါတယ်။
အာမခံနဲ့ လွတ်မြောက်သူ ၂၄ ဦးရှိပြီး ပြန်လည်လွတ်မြောက်လာသူ ဦးရေမှာ ၃,၆၆၇ ဦး ရှိတယ်လို့ သိရပါတယ်။
အဲဒီ ကိန်းဂဏန်း တွေဟာ AAPP မှ ကောက်ယူရရှိထားတဲ့ အရေအတွက်သာ ဖြစ်ပြီး မြေပြင်မှာ ဖြစ်ပွားနေတဲ့ အချက်အလက်နဲ့ ကိန်းဂဏန်း အရေအတွက်တွေက အခုထက်ပိုမို များပြားနိုင်တယ်လို့ သိရပါတယ်။
