မဲခေါင်၊ စက်တင်ဘာ ၂၉
PRF ထောက်ပို့တပ်သားများ၏ အချက်အလက်များကို ဖော်ထုတ်ရရှိထားသည်ဟု စစ်ကောင်စီဝါဒဖြန့်မှုသည် အရပ်သားများ အစုလိုက် အပြုံလိုက် ဗုံးကြဲသတ်ဖြတ်သည့် ၎င်းတို့၏ ပြစ်မှုများကို ဖုံးကွယ်ရန် လုပ်ကြံဝါဒဖြန့်ခြင်းသာဖြစ်သည်ဟု တော်လှန်ရေးသတင်းရင်းမြစ်များက ပြောသည်။
စစ်ကောင်စီ၏ ယနေ့ထုတ်ပြန်ချက်တွင် Wave Pay ဖြင့် PRF သို့ထောက်သို့သူ ၇၀၀ ခန့်၊ NUGpayဖြင့် ထောက်ပို့သူ ၁၀၀၀ ခန့်၊ SDB ဖြင့် ထောက်ပို့သူ ၁၀၀၀ ခန့်၏ ကိုယ်ရေးအချက်အလက်များကို ရရှိထားပြီး ၂၁ ဦးကို ဖမ်းဆီးထားသည်ဟု ဖော်ပြသည်။
သို့သော် PRF ထောက်ပို့များအနေဖြင့် တော်လှန်ရေးကို ထောက်ပို့ရာတွင် အမည်ဝှက်နှင့် Email သာ လိုအပ်သဖြင့် စစ်ကောင်စီထုတ်ပြန်သကဲ့သို့ ပုံနှင့်တကွ PRF မှ ကိုယ်ရေးအချက်အလက်ကို ရရှိသည်ဟုဆိုခြင်းသည် လိမ်လည်ခြင်းသာဖြစ်သည်ဟု PRF ထောက်ပို့တပ်သားတစ်ဦးကပြောသည်။
“ဒါက သူတို့ ရခိုင်မှာရော ကရင်နီမှာရော အရပ်သားကို ဗုံးကြဲတိုက်ခိုက်ပြီးမှ အဲ့သတင်းတွေကို ဖုံးချင်လို့ လုပ်ကြံဝါဒဖြန့်တာပဲလို့ ပြတ်ပြတ်သားသားပြောချင်ပါတယ်။ PRFကနေ ထောက်ပို့ကူတယ်ဆိုတာ ကိုယ့်ရဲ့ကိုယ်ရေးအချက်အလက်အစစ်အမှန်ကို ဘာမှ မပေးရပါဘူး၊ အဲ့ဒါကို PRFကနေ အချက်အလက်ရထားတယ်ဆိုတာ ယုတ္တိမရှိပါဘူး။”ဟု ၎င်းသတင်းရင်းမြစ်ကပြောသည်။
စစ်ကောင်စီသည် ရခိုင်ပြည်နယ် ကျောက်တော်မြို့ရှိ လူစည်ကားရာ ဈေးအနီးသို့ ယမန်နေ့တွင် ဗုံးကြဲတိုက်ခိုက်ခဲ့ရာ ပြည်သူလူထု ၄၉ ဦးထက်မနည်း သေဆုံးပြီး ၆၀ နီးပါး ထိခိုက်ဒဏ်ရာရရှိသည်ဟု AAက သတင်းထုတ်ပြန်ထားသည်။ ထို့အပြင် ကရင်နီပြည် ဒီမော့ဆိုမြို့နယ် အနောက်ခြမ်းရှိ အရပ်သားနေထိုင်ရာနေရာ ၂ခုကိုလည်း စစ်ကောင်စီက ယမန်နေ့တွင် ဗုံးကြဲတိုက်ခိုက်ရာ ပြည်သူ ၅ ဦးထက်မနည်းထိခိုက်ဒဏ်ရာရရှိခဲ့သည်။
ထိုသတင်းများ ပျံ့နှံ့ပြီးနောက် ယနေ့တွင် စစ်ကောင်စီက PRFမှတဆင့် တော်လှန်ရေးအား ထောက်ပို့နေသူများကို ဖမ်းဆီးရမိကြောင်း၊ အချက်လက် ၂၇၀၀ ကျော်ရရှိထားကြောင်း သတင်းထုတ်ပြန်လာခြင်းဖြစ်သည်။
“PRFမှာပါဝင်ဖို့က အမည်ဝှက်နဲ့ အီးမေးလိပ်စာပဲလိုပါတယ်။ လူပုံတွေ နေရပ်လိပ်စာတွေ မလိုပါဘူး။ ပြီးတော့ PRF ဝက်ဆိုက်ဒ်ကနေတဆင့် Kpay Wave Pay နဲ့လည်း ငွေထည့်ဝင်လို့မရပါဘူး။ ဝက်ဆိုက်ဒ်မှာမရှိတဲ့ လူပုံ နေရပ်လိပ်စာတွေက ဝက်ဆိုက်ဒ်ကနေပေါက်ကြားတယ်ဆိုတာ ယုတ္တိမရှိသလို မဖြစ်နိုင်ပါဘူး။ ဒါကြောင့် စစ်ေ-းထုတ်ပြန်ချက်က စိတ်ဓာတ်စစ်ဆင်ရေး လုပ်တာ သက်သက်ပါပဲ။”ဟု PRFကိုယ်စားလှယ်တစ်ဦးကပြောသည်။
ထို့အပြင် တော်လှန်ရေးအောင်မြင်ရန်အတွက် အရေးကြီးကဏ္ဍတွင်ရှိနေသည့် ထောက်ပို့တပ်သားများကို ဆက်လက်ထောက်ပို့ခြင်းမပြုရဲရန် စစ်ကောင်စီက စိတ်ဓာတ်စစ်ဆင်ရေးပြုလုပ်ကာ ခြိမ်းခြောက်နေခြင်းသာဖြစ်သည်ဟုလည်း NUGpay ကိုယ်စားလှယ်တစ်ဦးကပြောသည်။
“PRF ကြီးထွားလာမှာကို ကြောက်လို့ ခြောက်နေတာလို့ပဲ ပြောချင်ပါတယ်။ ဒါပေမယ့် ပြည်တွင်းမှာနေတဲ့ သူတွေအတွက်ကတော့ Nugpay SDBbank ဆော့ဝဲလ်တွေကို ခရီးသွားတဲ့အခါ ဖျက်ချထားဖို့ လိုပါတယ်။ အဲ့ဒီဆော့ဝဲလ်တွေကို မြင်ရင် စစ်ကောင်စီက ဖမ်းဆီးတာမျိုး လုပ်နေလို့ပါ”ဟု ၎င်းကပြောသည်။
ထို့အပြင် လစဉ်ထောက်ပို့နေသည့် PRFတပ်သား သောင်းနှင့်ချီရှိသော်လည်း စစ်ကောင်စီက အချက်အလက် ၂၇၀၀ ကျော်ရရှိသည်ဟုဆိုသဖြင့် မှားယွင်းနေသည်ကိုတွေ့မြင်ရသည်ဟု ၎င်းကဆိုသည်။
“ပေါက်ကြားတယ်ဆိုရင် အကုန်ပေါက်ကြားမှာပေါ့။ အခုဟာက ဝက်ဆိုက်ဒ်မှာမရှိတာကို ဝက်ဆိုက်ဒ်ကနေ ရတယ်လို့ပြောလိုပြော သောင်းနဲ့ချီရှိတာကို ၂ထောင်ကျော်ရတယ်လို့ ပြောလိုပြောနဲ့ သူတို့လိမ်နေတာ အသိသာကြီးပါ”ဟု ၎င်းကဆိုသည်။
စစ်ကောင်စီက ထုတ်ပြန်သည့် အချက်အလက်တွင် အဖမ်းခံရသည်ဟု ဆိုသူများအနက် လားရှိုးမြို့မှ မေရီဆန်စင်ဆိုသည့် အမျိုးသမီးကို ဖမ်းဆီးခြင်းသည် ပြီးခဲ့သည့် စစ်တင်ဘာ ၁၄ ရက်တွင် ဖမ်းဆီးခဲ့ခြင်းဖြစ်ပြီး ထိုအချိန်တွင်လည်း စစ်ကောင်စီက အွန်လိုင်းမှတစ်ဆင့် CRPH ကို ထောက်ခံသည့် ဝါဒဖြန့်ခြင်းများ ပြုလုပ်သဖြင့် ဖမ်းဆီးသည်ဟုဆိုကာ သတင်းထုတ်ပြန်ပြီးဖြစ်သည်။ သို့သော် လက်ရှိတွင်မူ ပေါက်ကြားလာသည့် PRF အချက်အလက်မှ တဆင့် ဖမ်းမိသည်ဟု သတင်းထဲတွင် တစ်ခါထည့်သွင်းကာ ထပ်မံ ထုတ်ပြန်လာသည်။
ကချင်၊ ရခိုင်၊ ကရင်နီပြည်တွင် စစ်ရေးအရ ရှုံးနိမ့်နေသည့် စစ်ကောင်စီသည် ယမန်နေ့တွင် ဗန်းမော်၊ မိုးမိတ်၊ ဒီမော့ဆို၊ ကျောက်တော်မြို့နယ်များရှိ အရပ်သားများနေရာကို ပစ်မှတ်ထားကာ ဗုံးကြဲတိုက်ခိုက်မှုပြုလုပ်ခဲ့သည်။
#MeKongNews
#PRF
#စစ်ကောင်စီ
#တော်လှန်ရေး
#ဝါဒဖြန့်
