မဲခေါင်၊ ဇူလိုင် ၃၀
ရှမ်းပြည်မြောက်ပိုင်း၊ မူဆယ်မြို့နယ်တွင် မြေသိမ်းသည့် မိုင်းယုကျေးရွာအုပ်စု အုပ်ချုပ်ရေးမှူး ဦးမောင်အေးကို အလိုမရှိဟု ဒေသခံပြည်သူများက ယမန်နေ့ (ဇူလိုင် ၂၉) တွင် ဆန္ဒပြကြသည်။
မိုင်းယုကျေးရွာအုပ်စု အုပ်ချုပ်ရေးမှူး ဦးမောင်အေးသည် အောက်နမ့်ဟွယ်ကျေးရွာပိုင်မြေကို သိမ်းသည့်အပြင် ကျေးရွာလူထုကိုပါ မူဆယ် ၁၀၅ မိုင်ရှိ ညီနောင်မဟာမိတ်အုပ်ချုပ်ရေးကော်မတီ တရားရုံးတွင် တရားစွဲဆိုခဲ့ခြင်းဖြစ်သည်။
ယင်းတရားစွဲဆိုမှုတွင်လည်း ညီနောင်မဟာမိတ်အုပ်ချုပ်ရေးကောမတီမှ ကိုးကန့်တပ်ဖွဲ့-MNDAA နှင့် အာရက္ခတပ်တော်-AAအဖွဲ့မှ တရားသူကြီးများက မြေသိမ်းအုပ်ချုပ်ရေးမှူးကို ဇူလိုင် ၂၈ ရက်တွင် အနိုင်ပေးခဲ့သည်။
ထိုသို့ အမိန့်ချသည်မှာ တရားမျှတမှု မရှိဟုဆိကာ ဒေသခံပြည်သူများက ဆန္ဒထုတ်ဖော်ခြင်းဖြစ်ပြီး ဆန္ဒထုတ်ဖော်မှုတွင် ကျေးရွာဘုံပိုင်မြေအား အတင်းအဓမ္မလုယူခြင်းကို ကန့်ကွတ်ရှုတ်ချသည်၊ ကျေးရွာအုပ်ချုပ်ရေးမှူး ဦးမောင်အေး အလိုမရှိ၊ မြေသူခိုး ဦးမောင်အေး အလိုမရှိ စသည့်ဆိုင်းဘုတ်များဖြင့် ဆန္ဒထုတ်ဖော်ခဲ့ကြသည်။
“မဟာမိတ်ကော်မတီရုံးချလိုက်တာလည်း ပြည်သူအပေါ် မျှတမှု ဝေးလေ ဝေး ဖြစ်နေတယ်။ ဥပဒေကိုသေချာနားလည်စွာ မလေ့လာပဲ အမှုကို ဒီတိုင်းလွယ်လွယ်လေးနဲ့ အမိန့်ချတာမျိုးဆိုတော့ မျှတမှုမရှိနိုင်ပါ။ လယ်ယာမြေနဲ့ပတ်သက်လို့ မည်သို့စာရွက်စာတမ်းရှိပါစေ မြေပိုင်ဆိုင်ကြောင်းဆိုလို့ မရနိုင်ပါ။ အရင်းအမြစ်ကိုသေချာလိုက်မှ အမှန်ကိုသိနိုင်ပါတယ်။ ပိုအရေးကြီးတာက လူအများနဲ့တစ်ဦးတစ်ယောက်ဖြစ်နေတယ်။ အများဘက်ကတရားမျှမှုကို မခံစားရသ၍တော့ တရားလိုကိုအမှုအနိုင်ချရင်လည်း အသုံးမဝင်ပါဘူး”ဟု ဒေသခံတစ်ဦးကပြောသည်။
တရားစွဲဆိုမှုအတွင်း တရားရုံးက ဖြစ်စဉ်ကို သေချာမစုံစမ်းပဲ ရုံးချိန်းသုံးခါသာခေါ်ပြီး အပြီးသတ်အမိန့်ကို ချမှတ်လိုက်ခြင်းဖြစ်သည်။ ထို့ကြောင့် ကျေးရွာပိုင်မြေကို ဦးမောင်အေးအား ပေးအပ်မည်မဟုတ်ဟုလည်း ဒေသခံများကပြောသည်။
“ရပ်ရွာပြည်သူဘက်ကတော့ ကျေနပ်မှုမရှိပါ။ ရပ်ရွာပြည်သူက မြေကိုလည်း တရားလိုထံ ပေးမယ်မဟုတ်ပါ”ဟု ဒေသခံ အမျိုးသားတစ်ဦးကပြောသည်။
မူဆယ် ၁၀၅ မိုင်၊ မိုင်းယုကျေးရွာအုပ်စု အုပ်ချုပ်ရေးမှူး ဦးမောင်အေးဆိုသူသည် ၁၀၅ မိုင်ဒေသ အောက်နမ့်ဟွယ်ကျေးရွာပိုင်မြေကို ၎င်းပိုင်သည်ဟု ဆိုကာ သိမ်းယူနေသည့်အပြင် ဒေသခံပြည်သူကိုပါ ၁၀၅ မိုင်ရှိ ကိုးကန့်နှင့်AA မဟာမိတ်ကော်မတီရုံးတွင် ဇူလိုင်လပထမပတ်အတွင်းက တရားစွဲဆိုခဲ့ခြင်းဖြစ်သည်။
ယင်းအမှုကို မဟာမိတ်ကော်မတီတရားရုံးက ဇူလိုင်လ ၂၈ ရက်တွင် အပြီးသတ် အမိန့်ချမှတ်ရာ မြေသိမ်းသည့် အုပ်ချုပ်ရေးမှူးကို အနိုင်ပေးလိုက်ခြင်းဖြစ်သည်။
“အုပ်ချုပ်ရေးမှူး ဦးမောင်အေးဟာ ရိုးသားဖြောင့်မတ်နိုင်တဲ့လူကြီး မဖြစ်နိုင်ပါ။ မြေယာနဲ့ပတ်သက်လို့ သူ့မကောင်းတဲ့ ကျောစောသတင်းများစွာရှိပါတယ်။ နောက်တခုက မြေယာပြဿနာနဲ့ပတ်သက်လို့ အုပ်ချုပ်ရေးမှူးအနေနဲ့ ဖြေရှင်းပေးနေတာ တခုမှမရှိခဲ့ပါဘူး။ ကျနော်တိုက တရွာတည်းပါပဲ။ ဒါပေမဲ့ သူက ကျနော်တို့ တရွာလုံးကို ဆန့်ကျင်ပါတယ်။ ကျနော်တို့ ဘုန်းကြီးကျောင်းကို မတက်ခဲ့ဘူး ကြာပီ ။ ကျနော်တိုရွာပန်းသကာကိုမသုံးခဲ့ပါ။ ကျေးရွာလူမျိုးဓလေ့အရ ဒီလိုလုပ်လိုမရပါဘူး။ အများက လူတစ်ယောက်ကို အနိုင်ကျင့်တာမျိုးမဟုတ်ပါဘူး သူဘက်က ရွာကိုစွန့်လွတ်တာဖြစ်ပါတယ်”ဟု ဒေသခံသတင်းရင်းမြစ်ကပြောသည်။
ထို့အပြင် ညီနောင်မဟာမိတ်တရားရုံးက ရွာ၏ ဓလေ့ထုံးတမ်း သတ်မှတ်ချက်ကို လစ်လျူရှုပြီး စစ်ကောင်စီ ဥပဒေဖြင့် ပြုလုပ်ထားသည့် သက်သေအထောက်အထားဖက်ကို အနိုင်ပေးလိုက်ခြင်းသည် စိတ်ပျက်စရာဖြစ်သည်ဟုလည်း ၎င်းကပြောသည်။
“စိတ်ပျက်စရာပဲ။ လူထုရဲ့ ထုံးစံ ဓလေ့က ရှုံးပြီး။ စစ်ကောင်စီအထောက်အထားက နိုင်တယ်ဆိုတာက တကယ်စိတ်ပျက်စရာပဲ။”ဟု ဒေသခံသတင်းရင်းမြစ်က ပြောသည်။
မူဆယ်မြို့နယ်၊ မိုင်းယု ၁၀၅ မိုင်မှ ကြူကုတ်(ပန်ဆိုင်း)သွားသည့် လမ်းမကြီးဘေးတွင်ရှိသည့် အောက်နမ့်ဟွယ်ကျေးရွာ၏ ကျေးရွာပိုင်ဘုံမြေကို ဒေသခံများက တရွာလုံး၏ သဘောတူညီချက်ဖြင့် ရွာရံပုံငွေရရှိရေး ကျောက်ထုတ်လုပ်ငန်း လုပ်ဆောင်ရန် ပြင်ဆင်နေချိန်တွင် ၁၀၅ မိုင် အုပ်ချုပ်ရေးမှူး ဖြစ်သူ ဦးမောင်အေးက ၎င်းပိုင်မြေဖြစ်ကြောင်း ပြောဆိုကာ ယခုအမှုကို တရားစွဲခဲ့ခြင်းဖြစ်သည်။
ဦးမောင်အေးသည် နမ့်ဟွမ်ကျေးရွာသားဖြစ်ပြီး စစ်ကောင်စီ ထိန်းချုပ်စဉ်ကလည်း အုပ်ချုပ်ရေးမှူးလုပ်ခဲ့သူ ဖြစ်ကာ ကိုးကန့်တပ်နှင့်အာရက္ခတပ်တော်က ထိန်းချုပ်သည့် အခါတွင်လည်း ဒေသခံများ၏ ရွေးချယ်မှုဖြင့် အုပ်ချုပ်ရေးမှူးတာဝန် ဆက်လက်ယူထားသူ ဖြစ်သည်။
တစ်ဧကခွဲ့ခန့်ရှိသည့် ယင်းမြေနေရာသည် လွန်ခဲ့သည့် နှစ်ပေါင်း ၃၀ ကျော်ကတည်းက ကျေးရွာပိုင်မြေဖြစ်ပြီး မည်သူကိုမှ ရောင်းချဖူးခြင်း မရှိကြောင်း ဒေသခံ သတင်းရင်းမြစ်များက ပြောသည်။
#MeKongNews
#ရှမ်းမြောက်
#မူဆယ်
#မိုင်းယု
#ဆန္ဒပြ
