မဲခေါင်၊ ဇူလိုင် ၁၄

ရှမ်းအရှေ့မြို့နယ်အချို့ရှိ ဆီပန့်ဆိုင်များတွင် ဆီကို အကန့်အသတ်ဖြင့်သာ ထည့်ပေးလာပြီး စျေးနှုန်းများ မြင့်တက်လာကြောင်း ဒေသထံများထံမှ သိရသည်။

ထိုင်းဘက်မှ တာချီလိတ်သို့ စက်သုံးဆီတင်သွင်းမှု လျော့နည်းလာသည့် သတင်းပြန့်လာပြီးနောက် ယခုလို ဖြစ်လာခြင်းဖြစ်ကြောင်း သိရသည်။

ယနေ့ ဇူလိုင် ၁၄ ရက်တွင် တာချီလိတ်၊ မိုင်းယွန်း ဆီပန့်ဆိုင်တွင် ဆိုင်ကယ်တစ်စီးလျှင် ဓာတ်ဆီ တစ်လီတာ ဘတ် ၄၀ မှ ဘတ် ၈၀ ဖိုးအထိသာ ရောင်းချပေးပြီး အခြားဆီပန့်များတွင်လည်း ပုံးဖြင့် ရောင်းချပေးခြင်း မရှိတော့ကြောင်း သိရကာ ပြင်ပတွင် တစ်လီတာ ဘတ် ၆၀ အထိ ဖြစ်လာနေကြောင်း သိရသည်။

ကျိုင်းတုံ တွင် ယမန်နေ့က ဓာတ်ဆီ တစ်လီတာ ၅ ထောင်ကျပ်မှ ယနေ့ ဇူလိုင် ၁၄ ရက်တွင် ၇ ထောင်ကျပ်အထိ စျေးခုန်တက်သွားကြောင်း သိရသည်။

မိုင်းဆတ်နှင့် မိုင်းတုံတွင် ယနေ့ ဆီပန့်စျေး ၅၂၀၀ ကျပ်နှင့် ပြင်ပစျေး ၅၅၀၀ ကျပ်ရှိနေကာ ဆိုင်ကယ်တစ်စီး ၂ လီတာသာ ထည့်ပေးကြောင်း သိရသည်။

ဒီဇယ်စျေးမှာ ဓာတ်ဆီထက် ၂ ဘတ်ခန့်သာ လျော့နည်းသော်လည်း ကားဖြင့်သာ လိုသလောက် ထည့်ပေးပြီး ပုံးဖြင့် ဝယ်၍မရဟု ဆိုသည်။

တာချီလိတ် တစ်ဖက်ကမ်း ထိုင်းနိုင်ငံ မယ်ဆိုင်မြို့တွင် ပြီးခဲ့သည့်ရက်ပိုင်းက မူးယစ်ဂိုဏ်းများ၏ ငွေကြေးခဝါချမှုများကို စုံစစ်ဆေးနေသည့်အတွက် ငွေလုံးငွေရင်းလွှဲပြောင်းမှု များပြားသည့် လောင်စာဆီ ဝယ်ယူမှုကို ထိုင်းအစိုးရက စစ်ဆေးနေဆဲတွင် မြန်မာသို့ မဲခေါင်မြစ်မှတစ်ဆင့် ပို့ဆောင်နေသည့် ဆီတင်သင်္ဘောစီးရေကို တစ်ပတ်လျှင် ယခင်က ၅ စီးဖြင့် လိုသလောက် ပို့ဆောင်နေရာမှ ယခုအခါ ၃ စီးသို့ လျှော့ချခဲ့သည့် သတင်းကြောင့် ဆီပြတ်လပ်မည်ကို စိုးရိမ်သည့် ပြည်သူများက ဝယ်ယူနေကြခြင်း ဖြစ်သည်။

တာချီလိတ်အပါအဝင် ဒေသအတွင်း မိုင်းဆတ်၊ မိုင်းတုံ၊ မိုင်းဖြတ်မြို့များသာမက ရှမ်းတောင် မိုင်းပန်၊ လင်းခေး နမ့်စန်မြို့များအထိ ထိုင်းနိုင်ငံမှ လစဉ် လောင်စာဆီ လီတာ ၄ သိန်းကျော် ဝယ်ယူ ရောင်းချနေကြရကြောင်း သိရသည် ။

ထိုင်းအစိုးရကမူ နယ်စပ်ဒေသများ၌ လောင်စာဆီတင်ပို့မှုကို တင်းကျပ်ထားခြင်းသည် အွန်လိုင်းလိမ်လည်ဂိုဏ်းများ အပါအဝင် နိုင်ငံဖြတ်ကျော် ရာဇဝတ်မှုကွန်ရက်များဆီ လောင်စာဆီ မရောက်ရှိစေရန် ရည်ရွယ်ခြင်းဖြစ်ကြောင်း ပြောကြားထားသည်။

#MeKongNews
#ရှမ်းအရှေ့
#မြို့နယ်အချို့
#စက်သုံးဆီ
#စျေးနှုန်းများ
#မြင့်တက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)