မဲခေါင်၊ ဇူလိုင် ၂

ရှမ်းပြည်အရှေ့ပိုင်း၊ တာချီလိတ်မြို့တွင် ၂ နိုင်ငံနယ်စပ် မယ်ဆိုင်ချောင်း ရေမြင့်တက်လာသဖြင့် တာချီလိတ်မြို့၊ တာလော့စျေးထဲတွင်ရေကြီးရေလျှံ လာနေကြောင်း ဒေသခံများထံမှ သိရသည်။

ဇွန် ၂၈ ရက်ညနေပိုင်းမှ စတင်ရွာသွန်းခဲ့သည့်မိုးကြောင့် ဇူလိုင် ၁ရက် နံနက်ပိုင်းအထိ နမ့်ယဠန်းချောင်း တောင်ကျရေကျ ဆင်းမှုကြောင့် ဝမ်ကောင်း၊ ဆန်ဆိုင်း၊ ပုန်းထွန်စသည့် အနိမ့်ပိုင်းရပ်ကွက်များ ရေကြီးရေလျှံမှု ဖြစ်ပွားခဲ့ပြီးနောက် ယခု ဇူလိုင် ၂ ရက် နံနက်ပိုင်းတွင် မယ်ဆိုင်ချောင်းရေ မြင့်တက်လာကာ တာချီလိတ်မြို့တွင်း ဝင်ရောက်လာခြင်းဖြစ်ကြောင်းသိရသည်။

“နမ့်ယွန်းချောင်းရေ ကျသွားလို့ တင်ကျန်ခဲ့တဲ့ နုန်းတွေ ရှင်းလို့ မပြီးသေးဘူး၊ ခု မယ်ဆိုင်ချောင်း ထပ်ကြီးလာတာ၊ ချောင်းကာတာလည်းမထိရောက်ဘူးပေါ့။ စိတ်ညစ်တယ်”ဟု ပုန်းထွန်ရပ်နေသူတစ်ဦးက ပြောသည်။

မယ်ဆိုင်ချောင်းရေသည် ယမန်နေ့ ဇူလိုင် ၁ ရက်က ရေတိုးလာခြင်းမရှိဘဲ ယနေ့မှသာ တောင်ကျရေများ ကျဆင်းလာနေခြင်း ဖြစ်ကြောင်း သိရသည်။

တာချီလိတ်မြို့တွင်း ဖြတ်သန်းစီးဆင်းနေသည့် ရေကြီးရေလျှံ ဖြစ်ပေါ်စေသည့် အဓိကချောင်း ၄ ချောင်းဖြစ်သည့် နမ့်ယွန်းချောင်း၊ မယ်ခေါင်ချောင်း၊ ဆန်ဆိုင်းချောင်းနှင့် နိုင်းနိုင်းချောင်း ဆယ်ယူခြင်း လုပ်ငန်းများအား လုပ်ဆောင်ခဲ့သည်ဟု စည်ပင်က ဆိုထားသကဲ့သို့ မြန်မာ – ထိုင်း ၂ နိုင်ငံ သဘောတူညီမှုဖြင့် မယ်ဆိုင်ချောင်းတစ်လျှောက် အရှည် ၁၂၈ ကီလိုမီတာရှိသော ကမ်းပါးရံ ယာယီမြေသားတံတိုင်းများနှင့် သဲအိတ်ကြီးများကို အရေးပေါ် ပြုပြင်ခြင်း၊ ဖာထေးခြင်းများ ပြုလုပ်လျက်ရှိသည်ဟု သိရသည်။

ထိုင်းနိုင်ငံအနေဖြင့် မြစ်ကြောင်းပိတ်ဆို့နေသည့်အဆောက်အအုံ ၁၄ ခုကိုလည်း ဒေသခံများနှင့် ညှိနှိုင်းကာ ဖယ်ရှား ရှင်းလင်းလျက်ရှိကြောင်း သိရသည်။

#MeKongNews
#မယ်ဆိုင်ချောင်း
#ရေတက်
#တာချီလိတ်
#ရေကြီးရေလျှံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)