မဲခေါင်၊ ဇွန် ၄
တအာင်းတပ်ဖွဲ့ – TNLAထိန်းချုပ်ထားသည့် နမ့်ခမ်းမြို့နယ်၊ ကောင်းတပ်ကျေးရွာတွင် ဖြစ်ပွားသည့် ယမ်းသိုလှောင်ရုံ ပေါက်ကွဲမှုအတွင်း ပြည်သူများ၏ ရွှေငွေ စာရင်းအင်းများကို ရှာဖွေကာ ပိုင်ရှင်ထံ ပြန်လည်အပ်နှံခဲ့သည်ဟု မြေပြင်ကယ်ဆယ်ရေး လုပ်ဆောင်နေသူတစ်ဦးကပြောသည်။
ပိုင်ရှင်များ၏ အကူအညီ တောင်းခံမှုအရ ကယ်ဆယ်ရေးအဖွဲ့များက ပြန်လည်ရှာဖွေပေးခြင်းဖြစ်ပြီး ရှာဖွေမှုအတွင်း ရွှေ၊ ငွေကြေးများနှင့် အိမ်ထောင်စုဇယား စသည်များကို တွေ့ရှိခြင်းဖြစ်ကြောင်း ၎င်းသတင်းရင်းမြစ်က ပြောသည်။
“ပျက်စီးသွားတဲ့ အိမ်တွေ ပြိုလဲထားတဲ့ အိမ်တွေပေါ့။ လူက ဘေးကင်းတဲ့အိမ်တွေက မိသားစုဝင်တွေက အကူအညီတောင်းတယ်။ အိပ်ရာ ဒီနား ဒီနားလေးမှာရှိတယ်။ ကျနော်တို့ရဲ့ ဖုန်းတွေ ရွှေတွေ ငွေတွေ အိမ်ထောင်စုတွေ ကျန်ခဲ့တယ်ပေါ့၊ တချို့က ပလတ်စတစ်နဲ့ လောင်းထားတယ်။ ကျနော်တို့ ရှာဖွေပေးပြီးတော့ အိမ်ထောင်စုတွေ ရွှေတွေ ငွေတွေ စမတ်ကတ်တွေ အနည်းအများဖြစ်ဖြစ် တွေ့ရှိလာတာတွေကို မိသားစုဝင်တွေကို ပြန်လည်အပ်နှံပေးတာရှိပါတယ်”ဟု မြေပြင်ကယ်ဆယ်ရေးလုပ်ဆောင်နေသူတစ်ဦးက ပြောသည်။
သို့သော် အချို့နေအိမ်များမှာ မြေကြီးဖုံးသွားသဖြင့် ရှာဖွေရခက်ခဲခြင်း၊ မိုးရွာသဖြင့် အချို့ အိမ်ရှင်များ၏ စာရွက်စာတမ်းများမှာ ပျက်စီးသွားခြင်းလည်းရှိကြောင်း ၎င်းကပြောသည်။
“တချို့အိမ်ကတော့ မြေကြီးဖုံးသွားတော့ ရှာဖွေမရတာတွေ ရှိသေးတယ်။ ပြီးတော့ ရှာဖွေတွေ့ရှိတဲ့ ဟာတွေလည်း မိုးတွေရွာထားတော့ အိမ်ထောင်စုဇယားတွေ စာချုပ်စာတန်းတွေကို ပလတ်စတစ် မလောင်းထားတော့ ပျက်စီးသွားတဲ့ဟာတွေလည်း ရှိတယ်။ ရှာဖွေတွေ့ရှိတဲ့ ခန့်မှန်းခြေ တန်ဖိုးတွေကိုတော့ ကျနော်တို့လည်း မပြောပြတတ်၊ မတွက်တတ်ဘူး”ဟု ၎င်းက ပြောသည်။
ထို့ပြင် ဆုံးရှုံးမှုများသည့် ယင်းပေါက်ကွဲမှုအတွင်း ထိခိုက်ခံစားရသည့် ပြည်သူများအား ပြန်လည် ထူထောင်ပေးရန် အကူအညီများလည်း လိုအပ်နေသည်ဟု ဆိုသည်။
ကောင်းတပ်ကျေးရွာတွင် သိုလှောင်ထားသည့် ယမ်းပျော့များ ပေါက်ကွဲမှုကြောင့် သေဆုံးသူ ၄၃ ဦးနှင့် ထိခိုက်ဒဏ်ရာရရှိသူ ၁၁၂ ဦးရှိသည်ဟု တအာင်းတပ်ဖွဲ့ – TNLA က ယမန်နေ့ညတွင် သတင်းထုတ်ပြန်ထားပြီး လက်ရှိတွင် သေဆုံးသူတစ်ဦး ထပ်မံ တွေ့ရှိသဖြင့် သေဆုံးသူ အရေအတွက်လည်း တိုးလာလျက်ရှိသည်။
နမ့်ခမ်းမြို့ကပ်လျက်တွင် တည်ရှိသည့် ကောင်းတပ်ကျေးရွာတွင် မိုင်းတွင်းကျောက်ထုတ်လုပ်ရေးလုပ်ငန်း၌ အသုံးပြုရန် သိုလှောင်ထားသည့် TNLA စီးပွားရေးဌာနပိုင် ယမ်းပျော့များ မေ ၃၁.ရက်တွင် ပေါက်ကွဲမှု ဖြစ်ပွားရာ ထိခိုက်သေဆုံးမှု အများအပြားရှိနေခြင်း ဖြစ်သည်။
ယင်းအလွန်ပြင်းထန်သည့် ယမ်းပျော့များ ပေါက်ကွဲမှုကြောင့် ကောင်းတပ်ကျေးရွာ တစ်ခုလုံးနီးပါး ပျက်စီးသွားပြီဖြစ်ပြီး ပြန်လည် ထူထောင်ရေးအတွက် အကူအညီများစွာ လိုအပ်နေသည်ဟုလည်း မြေပြင်တွင် ကူညီရေးလုပ်ငန်း ဆောင်ရွက်နေသူများကပြောသည်။
#MeKongNews
#ကောင်းတပ်ရွာ
#ပေါက်ကွဲမှု
#ပြည်သူများ
#ကယ်ဆယ်ရေးအဖွဲ့များ
