မဲခေါင်၊ မေ ၂၅
တရားမဝင် တရုတ်ကုန်စည်မှောင်ခိုင်ပို့ဆောင်မှုမှ ရရှိသည့် ဆက်ကြေးငွေများ အဝေမတည့်သဖြင့် စစ်ကောင်စီလက်အောက်ခံ PNO ပြည်သူ့စစ် သယ်လာသည့် မှောင်ခိုကုန်ကားများကို PNO နှင့် ရပခတို့ ပေါင်းကာ ပြန်လည်ခဲ့ကြောင်း သတင်းရင်းမြစ်များထံမှ သိရသည်။
တောင်ကြီးမြို့နယ်၊ ဘန့်ကွေးကျေးရွာရှိ PNO ပြည်သူ့စစ်စခန်းကို ဗဟိုအဖွဲ့က စစ်ကောင်စီနှင့်အတူ ပြန်လည် ဝင်ရောက်ဖမ်းဆီးခဲ့ခြင်းဖြစ်ပြီး မှောင်ခိုပစ္စည်းများ သယ်ဆောင်သည့် ၁၂ ဘီးကာ ၁၂ စီးကို သိမ်းဆည်းသွားခဲ့သည်ဟု ဖြစ်စဉ်ကိုသိရှိသည့် သတင်းရင်းမြစ်တစ်ဦးကပြောသည်။
ပြီးခဲ့သည့်မေလ ၂၂ နေ့တွင် ရပခ တိုင်းမှူးနှင့် ပီအဲန်အို အသွင်ပြောင်း ပြည်သူ့စစ်ကွပ်ကဲရေးမှူးချုပ် ဗိုလ်မှူးကြီးမြင့်အောင်၊ ဗိုလ်မှူးကြွယ်တို့ ပါဝင်သည့် ပူးပေါင်းအဖွဲ့က ယင်းသို့ သွားရောက်သိမ်းဆည်းခြင်းဖြစ်ပြီး ၁၂ဘီးကား ၁၂စီး ကနဦးသိမ်းဆည်းခံလိုက်ရကြောင်းကြားသိရကြောင်း သတင်းရင်းမြစ်ကဆိုသည်။
“ဗိုလ်မှူးအဆင့်တွေက မှောင်ခိုပစ္စည်းတွေကို လက်ခံပြီး သယ်ယူပေးနေတာကို အရင်ကတည်းက လုပ်နေကြတာပါ။ အခုက ဆက်ကြေးကိစ္စအဝေမတည့်လို့ ထင်တယ်။ စစ်တပ်နဲ့ ဗဟိုကလူတွေ ပြန်လာဖမ်းတာ ၁၂ဘီးကားတွေ ၁၀ စီးကျော်နဲ့ တရုတ်ကလာတဲ့ မှောင်ခိုပစ္စည်းတွေ အကုန်သိမ်းသွားတယ်”ဟု ၎င်းသတင်းရင်းမြစ်ကပြောသည်။
ယင်းဖမ်းဆီးမှုအတွင်း ၁၂ဘီး ၁၂ စီး၊ စခန်းအတွင်းသိမ်းထားသည့် မှောင်ခိုပစ္စည်းများနှင့် လူအချို့ အဖမ်းခံရသည်ဟု သတင်းရရှိသော်လည်း အဖမ်းခံရသည့် လူဦးရေအတိအကျကိုမူ မသိရသေးပေ။
“ရှမ်းမြောက်က လာတဲ့ တရုတ်ကုန်စည်တွေကို PNOက ရပ်စောက်၊ ဖာလိုင်ဖက်ကနေ တောင်ကြီး၊ အောင်ပန်းကို ဆက်ကြေးယူပြီး လမ်းကြောင်းရှင်းပေးတယ်။ ကိုယ်တိုင်လည်း ကယ်ရီယူပြီး ပို့ပေးတာမျိုးလုပ်တာ ၂၀၂၃ကတည်းကပဲ။ ၁၂ ဘီးကာတစ်စီးကို သိန်း ၃၀၀ နဲ့အထက် ဆက်ကြေးရတယ်။ ရတဲ့ဆက်ကြေး အဝေမတည့်လို့ အခုက ရက် ၁၀၀ နဲ့ ရောကြိတ်လိုက်ကြတာ”ဟု သတင်းရင်းမြစ်ကပြောသည်။
ဘန့်ကွေးစခန်းသည် ကုန်သည်များ၏ တရားမဝင်ကုန်သွယ်မှုမှ ကုန်စည်များကို ခေတ္တ သိုလှောင်သိမ်းဆည်းရာ နေရာဖြစ်ပြီးကုန်သည် များမှ အခွန်အခများကို ပေးဆောင်ရာနေရာလည်း ဖြစ်ကြောင်း ဒေသခံများထံမှ သိရသည်။
“ကားဆရာတွေထံက သိရသမျှ တရားမဝင်ကုန်သွယ်ရေးလမ်းကြောင်းကနေမှ ရတဲ့ ဆက်ကြေးတွေ၊ ခရီးတစ်ခေါက်၊ ကားတစ်စီးကနေ ပေးရတဲ့ အခွန်တွေကလည်း တစ်ရက်၊ တစ်ရက် နည်းတာမှမဟုတ်ပဲကိုး” ဟု နောက်ထပ် ဒေသခံသတင်းရင်းမြစ်က ဆိုသည်။
လားရှိုး မှ တောင်ကြီးမြောက်ဘက် ဖာလိုင်ကျေးရွာ စခန်းအထိ ဆက်ကြေးငွေ ကျပ်သိန်း ၃၀၀ ကျပ်၊ ဖာလိုင် မှ အောင်ပန်း လမ်းကြောင်းသို့ ဆတ်ကြေး ၁၂ ဘီးကားတစ်စီးလျှင် ကျပ် သန်း ၂၈၀ မှ ၃၀၀ ကြား၊ ဖာလိုင် မှ တောင်ကြီးမြို့သို့ (လမ်းကြောင်း) ဆက်ကြေး ၁၂ ဘီးကားတစ်စီးလျှင် ကျပ် သန်း ၁၄၀ မှ ၁၆၀ ကြား၊ ဖာလိုင်ရွာ မှ တောင်ကြီး အေးသာယာအထိ ဆက်ကြေး ၁၂ ဘီးကားတစ်စီးလျှင် ကျပ် သန်း ၁၉၀ မှ ၂၀၀ ကြားပေးရသည့်အတွက် လားရှိုးမှ အောင်ပန်း အထိ လမ်းကြေး/ဆက်ကြေး ၁၂ ဘီးကားတစ်စီးလျှင် ကျပ် သန်း ၈၀၀ မှ ၁၀၀၀ ကြား ကုန်ကျကြောင်း သိရသည်။
စားသောက်ကုန်၊ လူသုံးကုန်၊ အာလူး၊ ဟင်းချိုမှု့ သယ်ပါက သိန်း ၇၀၀ နှင့် ၈၀၀ လောက်ထိ ပေးရပြီး အခြားကုန်စည်များ (လျှပ်စစ်
ပစ္စည်း)ဖြစ်ပါက သိန်း ၁၀၀၀ အခွန် ဆက်ကြေးပေးရကြောင်း၊ ယင်းဒေသတွင် ကြီးစိုးသည့် လက်နက်ကိုင်အဖွဲ့အစည်းထံ ပေးဆောင်ရကြောင်း ကုန်သည်များထံမှ သိရသည်။
လက်ရှိတွင် စစ်ကောင်စီတပ်က ရှမ်းမြောက်မှ တဆင့်ဝင်လာသည့် တရုတ်ကုန်စည်များကို ရပ်စောက်၊ ဟိုပုံး၊ တောင်ကြီး မြို့နယ်အဝင်များတွင် စစ်ဆေးဖမ်းဆီးလျက်ရှိရာ ကုန်သည်အချို့က စစ်ကောင်စီနှင့် PNO ပြည်သူ့စစ်အပါအဝင် လက်နက်ကိုင်အဖွဲ့များအား ဆက်ကြေးပေးကာ တောလမ်းနှင့်ကွင်းလမ်းမှ တဆင့် သယ်ယူကြသည်။
စစ်ကောင်စီလက်အောက်ခံ PNOပြည်သူ့စစ်သည် ယခင်က တော်လှန်ရေးတပ်ဖွဲ့ဖြစ်ဖူးသော်လည်း ၂၀၀၉ ခုနှစ်မှ စတင်ကာ စစ်တပ်လက်အောက်ခံ ပြည်သူ့စစ်အဖြစ်ပြောင်းလဲဖွဲ့စည်းခဲ့သည်။
ပြည်သူ့စစ်အသွင်ပြောင်း PNO သည် စစ်ကောင်စီလက်အောက်ခံဖြင့် ယင်းကဲ့သို့ တရားမဝင်အခွန်ငွေကြေးများ ရရှိနေသော် လည်း ပအိုဝ်းလူထုအတွက် ထိရောက်သည့် ကျန်းမာရေး၊ လူမှုရေးစသည့် အကူအညီများ ကူညီထောက်ပံမှုမရှိသည့်အပြင် အခွန်အခအမျိုးမျိုးကောက်ခံ၍ ဖိနှိပ်နေသဖြင့် ပအိုဝ်းလူထုက အကြောက်တရားအောက်၌ ဒုက္ခဆင်းရဲကြီးစွာခံနေရသည်ဟု ပအိုဝ်းလူငယ်အများစုပါသည့် လူထုကဝေဖန်ကြသည်။
#MeKongNews
#PNO
#ပြည်သူ့စစ်
#ရှမ်းတောင်
#မှောင်ခို
#ရပခ
