မဲခေါင်၊ မေ ၂၁
ကျောင်းသားဦးရေ အနည်းဆုံး ၅၀ ရှိမှသာ ကျောင်းဖွင့်ခွင့်ပေးသည့် မူဝါဒကို ကွတ်ခိုင်ခရိုင်အတွက် ဖြေလျှော့ပေးထားပြီး ကျောင်းသားဦးရေ ရှိသလောက်ဖြင့် ကျောင်းဖွင့်ခွင့် ပြန်လည်ပေးထားသည်ဟု ကိုးကန့်တပ်ဖွဲ့ – MNDAA က ယမန်နေ့တွင် သတင်းထုတ်ပြန်သည်။
ကနဦးတွင် ကျောင်းသားဦးရေ ၅၀ မပြည့်လျှင် ကျောင်းဖွင့်ခွင့်မပေးဟု ကိုးကန့်တပ်ဖွဲ့က ဆိုသဖြင့် ပြည်သူများက အပြင်းအထန် ဝေဖန်ပြီးနောက် ကျောင်းသားဦးရေ ၅၀ မပြည့်လည်း ကျောင်းဖွင့်ခွင့်ပေးမည်ဟု ကိုးကန့်တပ်ဖွဲ့က ပြန်လည် ထုတ်ပြန်လာခြင်း ဖြစ်သည်။
သို့သော် ကျောင်းသားဦးရေ ၅၀ မပြည့်သဖြင့် ကိုယ်ထူကိုယ်ထ ဖွင့်လှစ်သည့် ကျောင်းများအနေဖြင့် ဆရာ ဆရာမများကို အနည်းဆုံး ၁၀ တန်းအောင်ပြီးသည့်သူများသာ ခန့်ထားရမည်ဖြစ်ပြီး ၎င်းခန့်ထားသည့် ဆရာ ဆရာများသည်လည်း ကိုးကန့်တပ်ဖွဲ့က ဖွင့်လှစ်ထားသည့် အထူးဒေသ – ၁ ပညာရေးကောလိပ်သို့ မဖြစ်မနေ ဆက်လက်တက်ရမည်ဟု ကိုးကန့်တပ်ဖွဲ့က ပြောသည်။
“ကိုယ်ထူကိုယ်ထကျောင်းများ အနေဖြင့်လည်း မိမိတို့ကျောင်းတွင် သင်ကြားမည့် ဆရာ၊ ဆရာမများကို အနည်းဆုံး ၁၀ တန်း အောင်မြင်သူများကိုသာ စတင်ခန့်ထားရမည်ဖြစ်ပြီး ခန့်အပ်ပြီးပါက ၎င်းတို့အနေဖြင့် အရည်အသွေး မြင့်မားစေရန် အထူးဒေသ(၁) ပညာရေးကောလိပ်သို့ မဖြစ်မနေ ဆက်လက် တက်ရောက် သင်ယူကြရမည် ဖြစ်သည်”ဟု ကိုးကန့်တပ်ဖွဲ့က ဆိုသည်။
ကွတ်ခိုင်မြို့နယ်တွင် ယခင်နှစ်က တအာင်းပြည်ပညာရေးကောင်စီ – TLEC က တာဝန်ယူပြီး ဖွင့်လှစ်ထားသည့် ကျောင်းပေါင်း ၁၃၀ ကျော်ရှိရာ ယင်းကျောင်းများသည် လက်ရှိတွင် ပိတ်ပင်ထားရဆဲဖြစ်သည်။
ကိုးကန့်တပ်ဖွဲ့က ကျောင်းဖွင့်လှစ်နိုင်ခြင်းမရှိသည့် နေရာများတွင် TLEC က ကျောင်းပြန်ဖွင့်လှစ်ခွင့် တောင်းဆိုထားရာ ကိုးကန့်တပ်က အကြောင်းပြန်ကြားခြင်း မရှိသေးကြောင်းလည်း သတင်းရင်းမြစ်များထံမှ သိရသည်။
ကိုးကန့်တပ်ဖွဲ့အနေဖြင့် စာသင်ကျောင်းများတွင် ကျောင်းသား၊ ကျောင်းသူများ၏ ဝါသနာနှင့် ရွေးချယ်မှုအပေါ်မူတည်၍ နိုင်ငံတကာတွင် အသုံးများသည့် အင်္ဂလိပ်နှင့် တရုတ်ဘာသာစကားများကို သင်ကြားပေးသွားမည်ဟုလည်း ထုတ်ပြန်ချက်တွင်ဖော်ပြသည်။
သို့သော် လက်ရှိမြေပြင်တွင် ထုတ်ပြန်ချက်ကဲ့သို့ မဟုတ်ပဲ မနက်ပိုင်းတွင် တရုတ်စာကို ကိုးကန့်တပ်ဖွဲ့က မဖြစ်မနေ သင်ခိုင်းနေသည်ဟု ကွတ်ခိုင်မြို့ရှိ ကလေးမိဘများကပြောသည်။
“မြို့ပေါ်က ကိုယ်ပိုင်ကျောင်းကအစ မနက်ပိုင်းဆို တရုတ်စာကို မဖြစ်မနေ သင်ခိုင်းတယ်ရှင့်၊ ကျောင်းပြဌာန်းစာကို နေ့လည်မှ သင်ရတယ်ရှင့်၊ ထုတ်ပြန်ချက်မှာက ဝါသနာပါမှ သင်လို့ရတယ်ဆိုပေမယ့် လက်တွေ့က မဖြစ်မနေ သင်ရတယ်ရှင့်။”ဟု ကျောင်းသားမိဘတစ်ဦးကပြောသည်။
ယခုနှစ် ပညာရေးကဏ္ဍတွင် ကချင်၊ ရှမ်း၊ တအာင်း၊ လားဟူ စသည့် ဒေသအလိုက် တိုင်းရင်းသား ဘာသာစကား များကိုလည်း တက်ရောက်သင်ယူလိုသည့် ကျောင်းသားများအတွက် အထူးအလေးပေး စီစဉ် သင်ကြား ပေးသွားမည်ဟု ကိုးကန့်တပ်ဖွဲ့ကပြောသည်။
ထိုသို့ ထုတ်ပြန်နေသော်လည်း ကွတ်ခိုင်မြို့နယ်အတွင်းရှိ မြေပြင်တွင် တအာင်းစာပေ၊ အလံ၊ ဆိုင်းဘုတ်များကို ကိုးကန့်တပ်ဖွဲ့က ဖျက်ဆီးပြီး တရုတ်ဘာသာစကားဖြင့် အစားထိုးလျက်ရှိသည်။
စာသင်ကျောင်းများကို လာမည့် ဇွန်လတွင် ပြန်လည် ဖွင့်လှစ်သွားမည်ဖြစ်ပြီး မေ ၂၅ ရက်မှ စတင်ကာ ကျောင်းအပ်နှံမှုများကို လက်ခံသွားမည်ဟုလည်း ကိုးကန်တပ်ဖွဲ့၏ ထုတ်ပြန်ချက်တွင် ဖော်ပြသည်။
#MeKongNews
#ကွတ်ခိုင်
#ကျောင်းသား
#ကျောင်းဖွင့်ခွင့်
#ကိုးကန့်တပ်ဖွဲ့
