မဲခေါင် ၊ ဧပြီ ၂၉
ကိုးကန့်တပ်ဖွဲ့-MNDAA က ပြည်သူများအပေါ် လူ့အခွင့်အရေး ချိုးဖောက်မှုများနှင့် ဌာနေတိုင်းရင်းသားများ၏ ဝိသေသလက္ခဏာများကို ဖျက်ဆီးဖျောက်ဖျက်နေမှုအပေါ် တာဝန်ယူဖြေရှင်းပေးရန် တအာင်းအရပ်ဘက်အဖွဲ့အစည်းများကွန်ယက်-TCSN က တောင်းဆိုလိုက်သည်။
ယမန်နေ့ ဧပြီ၂၈ရက်ညတွင် ထုတ်ပြန်ကြေညာသည့် ယင်းကြေညာချက်တွင် ကိုးကန့်တပ်ဖွဲ့-MNDAAက ကွတ်ခိုင်မြို့ကို တိုက်ခိုက်စဉ်အတွင်း အရပ်သားပြည်သူများအား ဖမ်းဆီးသတ်ဖြတ်ခြင်း၊ အရပ်သား နေအိမ် ၊ ဘုန်းကြီးကျောင်းများကို ဖျက်ဆီးခြင်းနှင့် တအာင်းတိုင်းရင်းသားစာပေ ယဉ်ကျေးမှုအား ဖျက်ဆီးဖျောက်ဖျက်ခြင်း အခြေအနေများကို ဖော်ပြထားသည်။
ထို့သို့သော ချိုးဖောက်မှုများအပေါ် ကိုးကန့်တပ်ဖွဲ့-MNDAA အနေဖြင့် တာဝန်ယူဖြေရှင်းပေးရန် အချက် ၈ ချက်ကို TSCNက ထုတ်ပြန်ချက်တွင် တောင်းဆိုးထားသည်။
ယင်းအချက်များမှာ ဒရုန်းတိုက်ခိုက်မှု အသက်ဆုံးရှုံးရသော ပြည်သူများအတွက် တရားမျှတမှုနှင့် ကုစားမှုပေးရန်၊ အတင်းအဓမ္မ တပ်သားစုဆောင်းခြင်းမပြုရန်၊ ပျက်စီးဆုံးရှုံးမှုအတွက် ပြန်လည်တည်ဆောက်ပေးရန်၊ လူမျိုးကြီးဝါဒ ကျင့်သုံးခြင်းမပြုရန်၊ ကျေးရွာဆိုင်းဘုတ်ဖျက်ဆီးခြင်းအပေါ် ပြန်လည်တာဝန်ယူ တည်ဆောက်ရန်၊ ဆိုင်းဘုတ်များတွင် တရုတ်စာဖြင့် မရေးရန် တိုင်းရင်းသားစာပေများကို လေးစားမြတ်နိုးရန်၊ ပြစ်မှုကျူးလွန်သည့် MNDAAတပ်ဖွဲ့ဝင်များ အရာရှိများကို အရေးယူရန် စသည်တို့ဖြစ်သည်။
ကွတ်ခိုင်မြို့ကို သိမ်းပိုက်သည့် တိုက်ခိုက်မှုအတွင်း MNDAA တိုက်ခိုက်မှုကြောင့် သေဆုံးရသည့် အရပ်သားပြည်သူများမှာ အသက်၅နှစ်အရွယ် လွေးအီမိုခမ်း၊ အသက် ၆ နှစ်အရွယ် လွေးအီဝင်း၊ အသက် ၂၄ နှစ်အရွယ် မိုင်းထွန်းလှ၊ အသက် ၃၇ နှစ်အရွယ် တားနိုင်ကိန်၊ အသက် ၄၈ နှစ်အရွယ် ယာလွေး၊ အသက် ၅၃ နှစ်အရွယ် ယာမာခင်အေးနှင့် နမ့်ဖက်ကာရှိ ကိုနိုင်ထွန်းတို့ဖြစ်သည်။
ထို့အပြင် ကိုးကန့်တပ်ဖွဲ့၏ ဒရုန်းဗုံးများကြောင့် ဘုန်းကြီးကျောင်း ၃ ကျောင်းပျက်စီးခဲ့ကာ ကလေးများအပါအဝင် ရွာခံ ၆ ဦးထက်မနည်း ထိခိုက်ဒဏ်ရာရရှိခဲ့ကြောင်း၊ တိုက်ပွဲဖြစ်ပွားချိန်အတွင်း ဒေသခံများ၏ နေအိမ်များကို ဝင်ရောက်မွှေနှောက်ခြင်း၊ ဒေသခံများကို ဖမ်းဆီးခြင်းများလည်း MNDAAက လုပ်ဆောင်ခဲ့ပြီး ဒေသခံ ၁၁ ဦးထက်မနည်း ဖမ်းဆီးခံရကာ အချို့မှ လက်ရှိအချိန်ထိ ပြန်မလွတ်လာသေးကြောင်း TSCNကပြောသည်။
MNDAA တပ်ဖွဲ့သည် ကွတ်ခိုင်မြို့ကို သိမ်းပိုက်ပြီးသည့် နောက်တွင်လည်း မြို့နယ်အတွင်းရှိ တအာင်းဝိသေသလက္ခဏာပါရှိသည့် တအာင်းအလံနှင့်တအာင်းစာပေဖြင့် ပြုလုပ်ထားသည့် ကျေးရွာအဝင် ဆိုင်းဘုတ်များကိုလည်း ဖျက်ဆီးခဲ့သည်ဟု TSCNက ထုတ်ပြန်ချက်တွင်ပြောသည်။
ထို့အပြင် ကွတ်ခိုင်နှင့် မူဆယ် ၁၀၅ မိုင်တွင်လည်း တအာင်းပြည်ပညာရေးကောင်စီက ဖွင့်လှစ်ထားသည့် ကျောင်းပေါင်း ၃၀၀ ကျော်ကို ကိုးကန့်တပ်ဖွဲ့က ပိတ်ပစ်လိုက်ပြီး တရုတ်စာသင်ကြားရန် ပြင်ဆင်မှုလုပ်ဆောင်နေသည်ဟုလည်း ထုတ်ပြန်ချက်တွင်ဖော်ပြသည်။
ယခုအစီရင်ခံစာပါ အချက်အလက်များသည် ကွတ်ခိုင်မြို့နယ်အတွင်း MNDAAက ကျူးလွန်သည့် အရာများကို လက်လှမ်းမှီသမျှ စာရင်းကောက်ယူထားခြင်းသာဖြစ်ပြီး မြေပြင်တွင် ယခုထက် ပိုမိုများပြားနိုင်သည်ဟု တအာင်းအရပ်ဖက်အဖွဲ့အစည်းများကွန်ယက်-TSCNက ပြောသည်။
#MeKongNews
#ရှမ်းမြောက်
#ကိုးကန့်တပ်ဖွဲ့
#လူ့အခွင့်အရေး
#ဌာနေတိုင်းရင်းသား
