မဲခေါင်၊ ဧပြီ ၇
ရှမ်းပြည်မြောက်ပိုင်း၊ ကွတ်ခိုင်မြို့နယ်အတွင်းရှိ တအာင်းကျေးရွာများ၏ ရွာအဝင် ဆိုင်းဘုတ်များတွင် ရေးသားထားသည့် တအာင်းစာများကို ကိုးကန့်တပ်ဖွဲ့ – MNDAA က ဆက်လက် ဖျက်ဆီးနေသည်ဟု ဒေသခံများက ပြောသည်။
တအာင်းတိုင်းရင်းသားများ၏ စာပေယဉ်ကျေးမှုများကို ဆက်တိုက် ဖျက်ဆီးနေသည့် MNDAA သည် ဧပြီ ၄ ရက်တွင် ကွတ်ခိုင်မြို့နယ်အတွင်းရှိ မန်ဘတ်၊ မန်နောင်၊ မန်တုံ၊ မန်ထန်၊ ဟွေခုတ်၊ ဟိုကျန့်၊ တုံဆင်လေး၊ တုံဆင်ကြီး၊ ဟိုနောင်၊ နမ့်လတ်၊ ကုန်ချမ်း၊ လွယ်ကန်၊ လုံကိန်၊ မန်မောဝ်၊ ပန်ကူ၊ နောင်ခွန် စသည့်ကျေးရွာများ၏ ရွာအဝင်ဆိုင်းဘုတ်များတွင် ရေးထားသည့် တအာင်းစာများကို MNDAA တပ်သားများ ကိုယ်တိုင် လာရောက် ဖျက်ဆီးသွားသည်ဟု သတင်းရင်းမြစ်များက ပြော သည်။
“သူတို့ တအာင်းအလံပုံစံတွေ ဖျက်ဖို့ပြောကတည်း က ကျမတို့ ဖျက်ထားတာပဲလေ။ အစည်း အဝေးမှာ သူတို့ရဲ့ တိုက်နယ်မှူးက တအာင်းစာရေးလို့ ရတယ်ပြောလို့ ကျမတို့က စာတွေချန်ထားတာလေ။ အခု သူတို့ စာတွေအကုန် လာဖျက်သွားတယ်။ အကုန်အဖြူရောင် လာသုတ်သွားတယ်”ဟု ဒေသခံတစ်ဦးက ပြောသည်။
တအာင်းကျေးရွာများ၏ ဆိုင်းဘုတ်များကို လာရောက် ဖျက်ဆီးသူများသည် ကိုးကန့်စစ်ဝတ်စုံကို ဝတ်ထားကြသည့် MNDAA တပ်သားများဖြစ်ပြီး အချို့သည် အရပ်ဝတ်ဖြင့် ဖြစ်သည်ဟု ဒေသခံများက ပြောသည်။
ပြီးခဲ့သည့် မတ် ၂၀ ရက်တွင် တအာင်းကျေးရွာတချို့ကို MNDAA က အစည်းအဝေးခေါ်ပြီး တအာင်းကျေးရွာရှိ စာသင်ကျောင်းများတွင် တအာင်းအလံ မထောင်ရန်နှင့် ရွာအဝင်ဆိုင်းဘုတ်များကို တအာင်းအလံပုံစံ ဆေးမချယ်ကြရန် ပြောခဲ့ပြီးနောက် ဒေသခံပြည်သူများက တအာင်းအလံပုံစံကို ဖျက်ပေးပြီး ဖြစ်သော်လည်း လက်ရှိတွင် ကိုးကန့်တပ်က တအာင်းစာများကိုပါ လိုက်ဖျက်နေခြင်း ဖြစ်သည်။
“ဒါတွေက ဒေသခံတိုင်းရင်းသားတွေရဲ့ အမှတ် သညာကို ဖျက်ဆီးပစ်ဖို့ ပေါ်တင်လုပ်တဲ့ လုပ်ရပ်ဖြစ်တယ်ဗျ။ တိုင်းရင်းသားတိုင်းဟာ ကိုယ့်ရဲ့ စာပေ၊ ယဉ်ကျေးမှုကို ထိန်းသိမ်းခွင့် ဖော်ထုတ်ခွင့် တိုးတက်အောင် လုပ်ခွင့်ရှိတယ်။ အခုလိုမျိုး ဖျက်ဆီးတယ် ဆိုတာကတော့ ကွတ်ခိုင်မှာ တအာင်းမရှိအောင် ဖျောက်ဖျက်ပစ်တဲ့ အောက်တန်းကျယုတ်မာတဲ့ လုပ်ရပ်လို့ ပြောလို့ရပါတယ်”ဟု ရှမ်းမြောက် သတင်းရင်းမြစ်တစ်ဦးက ပြောသည်။
ကွတ်ခိုင်မြို့နယ်ကို MNDAA က တအာင်းတပ်ဖွဲ့ထံ တိုက်ခိုက် သိမ်းယူပြီးသည့်နောက် တအာင်းစာပေများ တအာင်းအလံများ စသည့် တအာင်းလူမျိုးနှင့်ပတ်သက်သည့် ယဉ်ကျေးမှုများကို ဖျက်ဆီးကာ တရုတ်ယဉ်ကျေးမှုနှင့် အစားထိုးရန် လုပ်ဆောင်လျက်ရှိသည်ဟုလည်း ၎င်းသတင်းရင်းမြစ်ကဆိုသည်။
“တရုတ်ဇာတ်သွင်းတယ်လို့ ပြောရမှာပေါ့၊ အခုလည်း တအာင်းနဲ့ ပတ်သက်တဲ့ ယဉ်ကျေးမှုတွေကို ပိတ်ပင်ပြီး တရုတ်စာတွေကို မသင်မနေရ စလုပ်နေပြီလေ”ဟု ၎င်းက ပြောသည်။
ပြီးခဲ့သည့် မတ် ၂၂ ရက်နှင့်၂၃ ရက်တွင် MNDAA က ကွတ်ခိုင်မြို့နယ်အတွင်းရှိ ကျေးရွာများတွင် လူထုတွေ့ဆုံပွဲ ပြုလုပ်ကာ မည်သည့် ခွဲခြားမှုကိုမှ ပြုလုပ်မည် မဟုတ်ဘဲ တိုင်းရင်းသားစာပေများကို လွတ်လပ်စွာသင်ကြားနိုင်သည်ဟု အာမခံကြောင်း သတင်းထုတ်ပြန်ခဲ့သည်။
ထိုသို့ သတင်းထုတ်ပြန်ခဲ့သော်လည်း မြေပြင်တွင်မူ ဆက်တိုက်ဆိုသကဲ့သို့ တအာင်းစာပေနှင့် ယဉ်ကျေးမှုအမှတ် အသားများကို ဆက်လက် ဖျက်ဆီးနေဆဲ ဖြစ်သည်။
ယခင်တွင် ကွတ်ခိုင်မြိုနယ်အတွင်းရှိ ကျေးရွာဆိုင်းဘုတ်များကို သက်ဆိုင်ရာ လူမျိုးစုများက ၎င်းတို့၏ ရှမ်းစာ၊ ကချင်စာ၊ တအာင်းစာ၊ မြန်မာစာများဖြင့် ရေးသားခဲ့ခြင်းများ ရှိခဲ့ပြီး ယခု ကိုးကန့်တရုတ်များက မြန်မာပြည်ရှိ တိုင်းရင်းသားဘာသာ မဟုတ်သည့် တရုတ်စာများ အတင်းအကျပ် သုံးစွဲစေခြင်းမှာ တရုတ်ကိုလိုနီ ပြုခံရခြင်းဟု နိုင်ငံရေး လေ့လာသူများက ဝေဖန်လျက်ရှိသည်။
#MeKongNews
#ကွတ်ခိုင်
#ကျေးရွာ
#တအာင်းစာ
#MNDAA
#ဖျက်ဆီး
