မဲခေါင်၊ ဧပြီ ၄
ရှမ်းပြည်တောင်ပိုင်း၊ ဟိုပုံးမြို့နယ် ညောင်ဗက်ကျေးရွာအား ဖျက်သိမ်းပေးမည်ဟု လက်မှတ်ထိုးမှ ဖမ်းထားသူများကို ပြန်လွှတ်ပေးမည် ဖြစ်ကြောင်း PNO တပ်ဖွဲ့ဝင် မြေပွဲစားများက ဖိအားပေး ခြိမ်းခြောက်သဖြင့် လက်မှတ်ထိုးပေးခဲ့သော်လည်း ဖမ်းဆီးခံရသည့် ဒေသခံများ ယနေ့အထိ ပြန်မလွတ်လာသေးကြောင်း သတင်းရင်းမြစ်များထံမှ သိရသည်။
မတ် ၃၀ ရက်တွင် PNO တပ်ဖွဲ့ဝင် မြေပွဲစားများဖြစ်သည့် ဦးခွန်အုန်း၊ ခွန်လကျော်၊ ခွန်မောင်ဟန်၊ ခွန်စင်ခံထွက်ပေ၊ ခွန်မောင်နီ၊ ခွန်မောင်မြတို့က စစ်ကောင်စီ ရဲတပ်ဖွဲ့များနှင့် PNO ပြည်သူ့စစ်များကို ခေါ်ဆောင်လာကာ ညောင်ဗက် ရွာသူကြီးအပါအဝင် ၁၀ ဦးကို ဖမ်းဆီးသွားခဲ့ခြင်း ဖြစ်သည်။
ယင်းသို့ဖမ်းဆီးပြီးနောက် ရွာအား ဖျက်သိမ်းပေးမည်ဟု လက်မှတ်ရေးထိုးမှသာလျှင် ပြန်လွှတ်ပေးမည် ဖြစ်ကြောင်း ဖိအားပေးသဖြင့် ဒေသခံ ၆၀ ကျော်မှာ လက်မှတ် ထိုးပေးခဲ့သော်လည်း ဖမ်းဆီးထားသည့် ရွာသူကြီးအပါ ဒေသခံ ၁၀ ဦးကိုမူ ယနေ့အထိ ပြန်မလွှတ်ပေးဘဲ ဆက်လက် ဖမ်းဆီးထားခြင်း ဖြစ်သည်။
“သူတို့ ခြိမ်းခြောက်တာကို ကြောက်လို့ ဒေသခံ ၆၆ ယောက်က လက်မှတ် သွားထိုးပေးတာ၊ ဒါပေမယ့် အခုထိ ပြန်မလွတ်လာသေးဘူး။ လက်မှတ်ထိုးတဲ့ လူတိုင်းကိုလည်း သူတို့က ဓာတ်ပုံရိုက်ထားတယ်။ အခုလည်း ရဲတွေ စစ်သားတွေက ခဏခဏ ရွာထဲလာပြီး စစ်ဆေးတာတွေ လုပ်နေတယ်”ဟု ဒေသခံ အမျိုးသားတစ်ဦးကပြောသည်။
ရှမ်းပြည်တောင်ပိုင်း၊ ဟိုပုံးမြို့ နောင်တောင်းဘုန်းကြီးကျောင်း တောင်ဘက်တွင်ရှိသည့် ညောင်ဗက် ကျေးရွာသည် PNO အဖွဲ့အစည်း မပေါ်ခင်ကတည်းက ရွာတည်ရှိခဲ့ရာ သက်တမ်း နှစ် ၅၀ ကျော်ပြီ ဖြစ်သည်။
သို့သော် ယင်းကျေးရွာသည် စစ်တပ်ပိုင်မြေပေါ် တည်ရှိသည်ဟုဆိုကာ ယခင်ကတည်းက ဒေသခံများကို အကြိမ်ကြိမ် နှင်ထုတ်ဖူးသည်။
“ကျနော်တို့က မြေယာရှိမှ ခြံရှိမှ စိုက်ပျိုးစားလို့ ရမှာလေ အခုက ဧက ၁၄၀၀၀ ကျော်ကို သူတို့ အ ကုန်ယူပြီး ကျနော်တို့ တစ်ယောက်ကို ပေ၂၀ – ၄၀ ရှိတဲ့ တစ်ကွက်ပဲ ပြန်ပေးမယ်ဆိုတော့ ကျနော်တို့ တောင်သူလယ်သမားက ဘာလုပ်စားတော့မှာလဲဗျာ”ဟု ဒေသခံ သတင်းရင်းမြစ်တစ်ဦးက ပြောသည်။
PNO မြေပွဲစားများက ရွာသားများကို ပြောင်းရွှေ့ခိုင်းသည့် နေရာသည် ဘုရားဖြူကျေးရွာသားများ ပိုင်ဆိုင်သည့် မြေနေရာသာဖြစ်ပြီး ယင်းမြေနေရာကို ပြောင်းရွှေ့လျှင်လည်း မြေကွက်တစ်ကွက်လျှင် ၂၅ သိန်းကျပ်မှ သိန်း ၅၀ ထိ ပေးသွင်းခိုင်းနေခြင်း ဖြစ်သည်။
“အခုဆို သူတို့က ဟိုပုံး – နောင်တောင်းလမ်းမ အရှေ့ဘက်မှာရှိတဲ့ အိမ်တွေကို အကုန် ပြန်ဖျက် ခိုင်းနေတာ၊ အိမ်ခြေ ၂၇၀ ကျော် ၃၀၀ နီးပါးရှိတယ်။ အကုန်လုံး ဒေသခံ ပအိုဝ်းတွေကြီးပဲ”ဟု ဒေသခံတစ်ဦးက ပြောသည်။
ညောင်ဗက်ကျေးရွာ၏ မြေယာအရေးနှင့် ပတ်သက်ပြီး အကြိမ်ကြိမ် စာတင်ဖူးသော်လည်း စစ်ကောင် စီတပ်က ယင်းမြေနေရာသည် တပ်နှင့် မဆိုင်တော့ကြောင်း ၂၀၁၅ ခုနှစ်ကတည်းကပင် နိုင်ငံတော်မှ တစ်ဆင့် ဒေသခံများအား ပြန်ပေးရန် PNO ပါတီက ဥက္ကဌနေရာယူပြီး ဦးဆောင် ဖွဲ့စည်းထားသည့် ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့ကို လွှဲပြောင်းခဲ့ပြီ ဖြစ်ကြောင်း အကြိမ်ကြိမ် ပြန်လည် ပြောဆိုခဲ့သည်ဟု ဒေသခံများက ပြောသည်။
ဟိုပုံး – လွိုင်လင် ကားလမ်းမကြီး မြောက်ဘက်ရှိ မြေဧက ၁၄၀၀၀ ကျော်ကို စစ်တပ်က ၁၉၉၂ ခုနှစ်တွင် သိမ်းဆည်းခဲ့ပြီး ၂၀၁၅ ခုနှစ်၊ ဖေဖော်ဝါရီတွင် နိုင်ငံတော်မှတဆင့် ဒေသခံများအား ပြန်ပေးရန် ပြန်လည် အပ်နှံခဲ့သည်။
နိုင်ငံတော်မှ ဒေသခံများ လက်ဝယ်အရောက် ပြန်ပေးရန် ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦး စီး အဖွဲ့ကို တာဝန်ပေးအပ်ခဲ့ရာ PNO ဥက္ကဌ ခွန်စံလွင် ခေါင်းဆောင်သည့် ပအိုဝ်း ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့က ဒေသခံများကို မြေပြန်မပေးဘဲ မြို့ရပ်ကွက် တိုးချဲ့မည်ဟုဆိုကာ PNO ကို ပြန်ချပေးပြီး မတရား သိမ်းဆည်းခဲ့သည့်မြေ ဖြစ်ကြောင်း သိရသည်။
#MeKongNews
#ဖိအားပေး
#ခြိမ်းခြောက်
#ညောင်ဗက်ရွာ
#ဒေသခံများအား
#PNO
