မဲခေါင်၊ ဖေဖော်ဝါရီ ၂၂
ရှမ်းပြည်တောင်ပိုင်း၊ တောင်ကြီးမြို့၊ ကံသာရပ်ကွက်တွင် ရဲသတင်းပေးများက မူးယစ်ဆေးဝါးများ ပေါ်တင် ရောင်းချနေပြီး မတရား ငွေညှစ်မှုများလည်း လုပ်နေကြောင်း ဒေသခံ ပြည်သူများထံမှ သိရသည်။
ကံသာရပ်ကွက် အနောက်ကုန်းနေ မုန်လာဥ၊ ပထမ်းနှင့် မွန်နား ဆိုသူတို့သည် စစ်ကောင်စီ ရဲများ၊ အုပ်ချုပ်ရေးမှူးများနှင့် ပူးပေါင်းပြီး မူးယစ်ဆေဝါးများ ပေါ်တင် ရောင်းချနေသည်ကို သက်ဆိုင်ရာ ရဲတပ်ဖွဲ့က အရေးမယူသည့်အပြင် မူးယစ်ဆေး ဝယ်သူများအား ရဲသတင်းပေးများနှင့် ပေါင်းကာ ထောင်ဖမ်းပြီး ငွေညှစ်နေကြသည်ဟု သတင်းရင်းမြစ်များက ပြောသည်။
“တောင်ကြီးပဲ မဟုတ်ဘူး ဆီဆိုင်၊ ရပ်စောက် စရဖကို ငါပိုင်တယ်ဆိုပြီး ရပ်ကွက်ထဲမှာ အပြစ်မရှိ လူငယ်တွေကို ညအချိန် ပေါ် တာဆွဲ ဖမ်းဆီးပြီး မတရား ငွေညှစ်နေတယ်။ သက်ဆိုင်ရာ ရဲတွေကလည်း သူတို့နဲ့ပေါင်းပြီး ဆေးပြားဝယ်တဲ့ လူတွေကို ပြန်ထောင်ဖမ်းပြီး ငွေညစ်တာတွေ လုပ်နေတယ်” ကံသာရပ်ကွက် ပြည်သူတစ်ဦးက ပြောသည်။
ထို့ပြင် မုန်လာဥ ဆိုသူသည် ဆီဆိုင်၊ ရပ်စောက်ဖက်တွင် ကုန်ကားများထံမှ သိမ်းယူထားသည့် ပစ္စည်းအချို့ကို ရပ်ကွက်ထဲရှိ ဆိုင်များတွင် လိုက်သွင်းနေသည်ဟုလည်း သတင်းရင်းမြစ်များက ပြောသည်။
“ငါ စရဖ ပိုင်တယ်၊ ဘာဖြစ်လဲ ဆိုတဲ့ ပုံစံနဲ့ တော်တော်လေးကို ဒုက္ခပေးနေပါတယ်။ ကျမတို့ ရပ်ကွက်က မရှိဆင်းရဲသား ရပ်ကွက်ပါ။ အခုလို အခြေအနေတွေကြောင့် ကံသာရပ်ကွက်မှာ အလွန်အမင်း စိတ်သောက ရောက်နေပါတယ်။ သက်ဆိုင်ရာကိုလည်း စစ်ဆေး အရေးယူစေချင်ပါတယ်” ဟု နောက်ထပ် ရပ်ကွက်နေ ပြည်သူတစ်ဦးကလည်း ဆိုသည်။
စစ်ကောင်စီက အာဏာသိမ်းပြီးနောက် တောင်ကြီးမြို့တွင် ရပ်ကွက်အုပ်ချုပ်ရေးမှူးများ၊ ရာအိမ်မှူးများနှင့် ရဲသတင်းပေးများသည် စစ်ကောင်စီနှင့် ပူးပေါင်းကာ ပြည်သူများအား မတရားငွေညှစ်ခြင်း၊ ပေါ်တာဆွဲခြင်း စသည်များကို မကြာခဏ လုပ်ဆောင်နေသည်။
တောင်ကြီးမြို့တွင် ယခုလ အတွင်း၌ပင် လူငယ်၊ လူလတ်ပိုင်း ပြည်သူများကို အဓိကထား၍ စစ်ကောင်စီမှ ပေါ်တာဆွဲ ဖမ်းဆီးခံရသူများ ၅၀ ဦးကျော်အထိရှိပြီး ဖမ်းဆီးခံရသူအချို့ကို ရပ်စောက်မြို့နယ်ရှိ ဗထူးသင်တန်းကျောင်းသို့ ပို့ဆောင်ထားကြောင်းလည်း သတင်း ရရှိထားသည်။
#MeKongNews
#တောင်ကြီး
#ရဲသတင်းပေး
#မူးယစ်ဆေး
#ပေါ်တင်ရောင်း
#ငွေညှစ်
