မဲခေါင်၊ ဖေဖော်ဝါရီ ၂

ရှမ်းပြည်တောင်ပိုင်း၊ ရွာငံမြို့နယ်တွင် တောင်သူများ စိုက်ခင်းခြံသွားချိန်ကို စစ်ကောင်စီက နံနက် ၁၀ နာရီမှ ညနေ ၃ နာရီအထိ ကန့်သတ်ထားသဖြင့် တောင်သူများ အခက်ခဲဖြစ်နေကြောင်း ဒေသခံများထံမှ သိရသည်။

အချိန် အကန့်အသတ်ဖြင့် သွားရသည့်အပြင် ခြံမသွားခင်နှင့် ခြံမှ ပြန်လာလျှင်လည်း စစ်ကောင်စီထံ သတင်းပို့ပြီး လက်မှတ်ထိုးရသဖြင့် တောင်သူများအတွက် ဝန်ထုပ်ဝန်ပိုး ပိုဖြစ်စေကြောင်း ဒေသခံများက ပြောသည်။

“စစ်တပ်က ရွာထဲ တပ်စွဲနေတာ။ သူတို့ သတ်မှတ်ထားတဲ့ အချိန်ကျော်သွားရင် ဟောက်တယ်။ တချို့ဆို ရွာထဲတောင် ပေးမဝင်တော့ဘူး။ ရွာသားတွေ တော်တော်ဒုက္ခရောက်တယ်။ အလုပ်လည်း ကောင်းကောင်း မလုပ်ရဘူး။ သူတို့ ဒီလိုလုပ်တာ တစ်လကျော်ပြီ “ဟု ဒေသခံတစ်ဦးက မဲခေါင်သို့ ပြောသည်။

ထို့ပြင် ရွာတွင် တပ်စွဲထားသော စစ်ကောင်စီ တပ်သားများအတွက် ရွာသားများက အလှည့်ကျဖြင့် နေ့စဉ် ထမင်းချက်ပို့နေရကြောင်း ၎င်းက ဆက်ပြောသည်။

ယင်းကျေးရွာဘက်တွင် တိုက်ပွဲဖြစ်ပွားမှု မရှိ‌သော်လည်း ရွာသူကြီး၊ အုပ်ချုပ်ရေးမှူးများ မကြာခဏ လုပ်ကြံ သတ်ဖြတ်ခံရသောကြောင့် စစ်ကောင်စီ တပ်သားများက လုံခြုံရေးအတွက် လာရောက် တပ်စွဲနေခြင်း ဖြစ်ကြောင်း ဒေသခံများထံမှ သိရသည်။

ပြီးခဲ့သည့် ဇန်နဝါရီ ၂၁ ရက်တွင်လည်း မြေနီကုန်းကျေးရွာ အုပ်ချုပ်ရေးမှု ဦးမြင့်ဌေးကို အမည်မသိ လက်နက်ကိုင်အဖွဲ့က လာရောက်လုပ်ကြံသတ်ဖြတ်သေးကြောင်း ဒေသခံများထံမှ သိရသည်။

#MeKongNews
#ရွာငံ
#စစ်ကောင်စီ
#ကန့်သတ်
#တောင်သူများ
#အခက်ကြုံ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)