မဲခေါင်၊ ဇန်နဝါရီ ၂၇
ရှမ်းပြည်တောင်ပိုင်း၊ ဆီဆိုင်မြို့နယ်၊ ရေဖြူကျေးရွာနှင့် ကယန်းလေးရွာတို့တွင် ပအိုဝ်းပြည်သူ့စစ် – PNO နှင့် စစ်ကောင်စီတပ်သားများက ပြည်သူနေအိမ်များကို ဖျက်ဆီးပြီး အိမ်သုံးပရိဘောဂများကို ဖြုတ်ယူကာ မြို့ပေါ်တွင် ဈေးပေါပေါဖြင့် ပြန်လည် ရောင်းချနေကြောင်း ဒေသခံများထံမှ သိရသည်။
ပြီးခဲ့သည့် ၂ လကတည်းက ယင်းကဲ့သို့ စတင်ဖြုတ်ယူ ရောင်းစားနေပြီး မြကန်သာ (၅) ရပ်ကွက်ရှိ စစ်သားဇနီးက လက်ခံ ရောင်းချပေးနေကာ ဈေးတန်သောကြောင့် ဝယ်သူလည်း များပြားလျက်ရှိကြောင်း ဒေသခံများက ပြောသည်။
“ဗီရို၊ ဘုရားစင်၊ တိုင်၊ သစ်၊ သွပ်၊ တံခါး၊ ကျည်းခွေ ပြတင်းပေါက်တွေ အကုန်ယူ ပြန်ပြီးရောင်းနေတာ။ အသစ်စျေး ထက်တစ်ဝက်မက သက်သာတယ်။ စျေးပေါတော့ ဝယ်တဲ့လူ များတယ်။ စစ်သားနဲ့ PNO က လာပို့၊ သူတို့က ရောင်းပေး ၂ ရက် ၃ ရက် တစ်ခါ သယ်လာတယ်”ဟု ဒေသခံတစ်ဦးက မဲခေါင်သို့ ပြောသည်။
ယင်းကျေးရွာရှိ ဒေသခံများသည် စစ်ဘေးရှောင်နေရသည်မှာ တစ်နှစ်နီးပါး ရှိနေပြီဖြစ်ပြီး ဒေသခံများမရှိချိန် ယခုလို ပြည်သူပစ္စည်းများကို စစ်တပ်နှင့် PNO က ခိုးယူ ရောင်းချနေခြင်းဖြစ်ကြောင်း ၎င်းက ဆက်ပြောသည်။
ထို့ပြင် ရွာခံများ၏ နေအိမ် ဖျက်ဆီးခံရခြင်းအပြင် ကျေးရွာရှိ ခရစ်ယာန်ဘုရားကျောင်းနှင့် စာသင်ကျောင်းများပါ ဖျက်ဆီးခဲ့ကြောင်း ဒေသခံများက ပြောသည်။
ပြီးခဲ့သည့် ၂၀၂၅ ခုနှစ် ဇွန်လအတွင်း နေအိမ် ပြန်လာကြည့်သည့် ရေဖြူကျေးရွာခံ အမျိုးသားတစ်ဦးနှင့် အမျိုးသမီးတစ်ဦးကို PNO က ဖမ်းဆီး သတ်ဖြတ်ခဲ့သည့် ဖြစ်ရပ်လည်းရှိခဲ့ကြောင်း ဒေသခံများထံမှ သိရသည်။
#MeKongNews
#စစ်ကောင်စီ
#PNO
#ပြည်သူနေအိမ်
#ပရိဘောဂ
#ဖြုတ်ရောင်းစား
