မဲခေါင်၊ ဇန်နဝါရီ ၂၂
စစ်မှုထမ်းလူသစ်များကို လေ့ကျင်သင်ကြားပေးသည့် စစ်ကောင်စီ၏ ကျောင်းတစ်ကျောင်းဖြစ်သည့် ရှမ်းတောင်၊ ဟိုပုံးမြို့မှာရှိတဲ့ စစ်တပ် ကွန်ပျူတာနှင့် နည်းပညာသိပ္ပံကျောင်းမှ ကျောင်းအုပ်ကြီး ဗိုလ်မှူးချုပ်သန့်ထင်စိုးက ကျောင်းအတွင်း မုန့်ဆိုင်ဖွင့်ထားရာ ၎င်းလက်အောက်ရှိ စစ်တပ်အရာရှိငယ်အချို့က ကျောင်းအုပ်ကြီးရောင်းသည့် စမူဆာကို စစ်မှုထမ်းသင်တန်းသားများထံ လိုက်လံရောင်းချပေးနေရကြောင်း ဟိုပုံးကျောင်းနှင့် နီးစပ်သည့် သတင်းရင်းမြစ်များက ပြောသည်။
ကိုးကန့်တပ်ဖွဲ့ ဖမ်းဆီးခံရပြီး ပြန်လွတ်လာသည့် ဗိုလ်မှူးချုပ်သန့်ထင်စိုးသည် ကျောင်းအတွင်း စစ်မှုထမ်းသင်တန်းသားများ၏ လစာထဲမှ အားကစားဝတ်စုံ၊ အဝတ်အစား၊ ပေါက်တူး၊ ရေချိုးစီးဖိနပ်စသည့် ပစ္စည်းများ အကြောင်းပြကာ ဖြတ်တောက်နေသည့်အပြင် ကျောင်းအတွင်း မုန့်ဆိုင်ဖွင့်ပြီး ပေါင်မုန့်ကြက်ဥကြော်၊ ဂျုံလုံးကြော်စသည်တို့ကို မဝယ်မနေရ ရောင်းချကြောင်း သတင်းရင်းမြစ်တစ်ဦးက ပြောသည်။
“ကျောင်းအုပ်ကြီး စမူဆာ၊ ကျောင်းအုပ်ကြီး ပေါင်မုန့်ကြက်ဥကြော်၊ ကျောင်းအုပ်ကြီး ဂျုံလုံးကြော် ဆိုပြီး သူ့တပည့် အရာရှိတွေက မနက်ဆို သင်တန်းသားအိပ်ဆောင်တွေကိုလာပြီး မယူမနေရ လိုက်ပေးပါတယ်။ စစ်သား အရာရှိတွေ၊ ဗိုလ်လေးတွေ၊ ဆရာကြီးတွေလည်း အဆင့်နဲ့မှ မသင့်တော်ကျောင်းအုပ်ကြီး အတွက် စမူဆာပါတ်ရောင်းပေးနေရပါတယ်” ဟု ၎င်းကပြောသည်။
ယင်းအပြင် အရာရှိငယ်များ၏ ဇနီးများမှာလည်း ယင်းမုန့်ဆိုင်တွင် ဝိုင်းဝန်းကြော်လှော်ချက်ပြုတ်ပေးရကြောင်း၊ သင်တန်းသားများ၏ လစာကို အကုန်လိုချင်သည့်အတွက် ကျောင်းဆင်းပြီး တပ်အသီးသီးသွားတော့မည့် ကားများပေါ်အထိ ရေသန့်ဗူး၊ မုန့်၊ အချိုရည်နှင့် အခြားမလိုအပ်သည်များကို မယူမနေရ ရောင်းချကြောင်း နီးစပ်သူများထံမှ သိရသည်။
ဟိုပုံးကွန်ပျူတာနှင့် နည်းပညာသိပ္ပံကျောင်း၌ တပ်တွင်းလိုက်နေသည့် အရာရှိနှင့် အခြားအဆင့် ဇနီးသည်များအတွက် ထောက်ပံ့ကြေးကျပ်တစ်သိန်းကိုလည်း အသား၊ ငါး၊ အသီးအရွက်များကို ပြင်ပပေါက်ဈေးထက် ဈေးတင်ကာမယူမနေရ ရောင်းချပြီး ဖြတ်တောက်ကြောင်း၊ ဝက်ခြံတာဝန်ခံဗိုလ်ကြီးကိုလည်း ဝက်သေသည့်အတွက် ပါးရိုက်ကြောင်း တပ်တွင်း သတင်းရင်းမြစ်တစ်ဦးက ပြောသည်။
မကြာမီက ဖမ်းဆီးခံ၇သည့် ၎င်း၏တပည့်ဖြစ်သူ ဗိုလ်မှူးအေးမင်းထွန်းမှာ တပည့်အရင်းဖြစ်ပြီး ကုန်ကားများဖမ်းဆီးကာ ငွေရှာပေးနေသည်ကို တစ်တပ်လုံးသိကြောင်း၊ ပြသနာတက်မှသာ ဗိုလ်မှူးအေးမင်းထွန်းကို ထိုးကြွေးခြင်းဖြစ်ကြောင်း ယင်းတပ်တွင်း သတင်းရင်းမြစ်က ပြောသည်။
“ကျောင်းအုပ်ကြီးတစ်ယောက်အနေနဲ့ ဗိုလ်မှူးတစ်ယောက်က သေနတ်ထုတ်သွားတာ မသိဘူးလို့ ဖင်ပိတ်ငြင်းပြီး သူအရေးယူခံရမှာကြောက်လို့ အဲ့ဗိုလ်မှူးကို ထိုးကြွေးတာ” ဟု ၎င်းက ပြောသည်။
ယင်းအပြင် ကုန်ကားများထံမှ ငွေရှာလိုသည့်အတွက် ကျောင်းအုပ်ကြီး ဗိုလ်မှူးချုပ်သန့်ထင်စိုးဦးဆောင်ပြီး ဒုမှူးကြီး ညွှန့်သွင်၊ ဗိုလ်မှူး မိုးမင်းကို၊ ဗိုလ်မှူး အေးမင်းထွန်း၊ ဗိုလ်မှူး တင့်သူထက်၊ ဗိုလ်မှူး အောင်မွန်ဝင်း၊ ဗိုလ်မှူး အာကာမြင့်မောင် တို့ပါဝင်သည့် သီးသန့်အစည်းအဝေးလုပ်ကာ တပ်ရှေ့တွင် သီးသန့်ဂိတ်ထပ်ဖွင့်ကြောင်း ဟိုပုံကျောင်းနှင့် နီးစပ်သည့် သတင်းရင်းမြစ်တစ်ဦးက ပြောသည်။
“ကားသမားတွေက မကျေနပ်လို့ ရပခ ကိုတိုင်တော့ ခုနပြောတဲ့ သူ့တပည့်တွေကို တပ်ပြန်ခေါ်ပြီး သူအမြင်ကပ်တဲ့သူတွေကို အဲ့ဂိတ်တွေထည့်ပြီး ထိုးကြွေးပြီး အကျင့်ရုတ်သေးတာ။ သန့်ထင်စိုး ဗိုလ်မှူးကြီးတုန်းက လင်ခင်းဗျူဟာမှူး၊ သူ့ရဲ့စကားပြောစက်အခေါ်က အခုအထိလင်းခေး။ လင်းခေးဗျူဟာမှူးတုန်းက လင်းခေးဖြတ်ဖူးတဲ့ ကားသမားတိုင်းအကုန်သိတယ် ဘာလဲဆိုရင် “ကားဘီးတစ်ဘီးဆို တစ်သိန်း”၊ ခြောက်ဘီးကားမောင်းတယ် ကားပေါ်မှာ ဘာပစ္စည်းမှ မပါလဲ ခြောက်ဘီးကားဖြစ်နေတဲ့အတွက် ခြောက်သိန်းပေး၊ ဒါပဲ ဘာမှလာရှင်းပြမနေနဲ့။ ပစ္စည်းပါရင်တော့ အဲ့ထက်ပိုပြီပဲ။ ပရိုဘောက်လို လေးဘီးကားမျိုးဆို လေးသိန်း။ သူ့အဖေလောက်ရှိတဲ့ တပ်မတော်ကွန်ပျူတာနှင့်နည်းပညာသိပ္ပံရဲ့ စာပေညွှန်ကြားရေးမှူး၊ အပြင်တက္ကသိုလ်ဆိုရင် ပါမောက္ခချုပ် တစ်ယောက်ကို အစည်းအဝေးမှာ “ငါ—မသားကြီးလို့” ဆဲတာဗျာ” ဟု ယင်းသတင်းရင်းမြစ်က ပြောသည်။
လက်ရှိတွင် ယင်းတပ်အတွင်း ကျောင်းအုပ်ကြီးသန့်ထင်စိုးကို မကျေနပ်သူအလွန်များပြားနေပြီး PNO မှ လာတိုက်ပါစေဟုပင် ဆုတောင်းနေကြောင်း၊ PNO က သေနတ်တစ်ချက်ဖောက်သည်နှင့် တပ်တွင်း၌ ၎င်းကို ပြန်လုပ်ကြံမည့်သူအလွန်များပြားနေကြောင်း တပ်နှင့် နီးစပ်သူများထံမှ သိရသည်။
#MeKongNews
#ဟိုပုံး
#သန့်ထင်စိုး
#ဗိုလ်မှူးချုပ်သန့်ထင်စိုး
#စစ်မှုထမ်းလူသစ်
