မဲခေါင်၊ ဇန်နဝါရီ ၂၁
ရှမ်းပြည်တောင်ပိုင်း၊ တောင်ကြီးမြို့နယ်၊ နောင်ကား ကျေးရွာအုပ်စုတွင် စစ်ကောင်စီ လက်အောက်ခံ PNO – ပြည်သူ့စစ်က တစ်အိမ် ၅ သောင်းကျပ်မှ ၂ သိန်းကျပ်မထိ ဆက်ကြေး ထပ်မံ ကောက်ခံနေကြောင်း ဒေသခံများက ပြောသည်။
စစ်ကောင်စီနှင့် PNO အတွက် စစ်စရိတ်ဟုဆိုကာ ဆက်ကြေးကောက်ခြင်း ဖြစ်ပြီး မနက်ဖြန် ဇန်နဝါရီ ၂၂ ရက် နောက်ဆုံးထား အပြီးထည့်ရမည်ဟု နောင်ကား ဒေသခံတစ်ဦးက ပြောသည်။
“ပုံမှန်ကောက်တဲ့ ၅ သောင်းကတော့ ၃ သောင်းက PNO အတွက် ၂ သောင်းက စစ်တပ်အတွက်လို့ ပြောပြီး ကောက်တယ်။ တချို့ရွာကျတော့ ၂ သိန်းကောက်တယ်။ ဒီလ ၂ သိန်းထည့်ရတဲ့ရွာက နောက်လဆို ၅ သောင်းပဲ အဲလိုပေါ့။ ၅ သောင်းကတော့ လတိုင်း ထည့်ရပြီးတော့ ၂ သိန်းကိုတော့ ရွာတိုင်း အလှည့်ကျတဲ့။ ၂ သိန်း ကောက်တာ ရှေ့တန်းသမားတွေ ဟင်းဖိုးအတွက်လို့ ပြောတယ်”ဟု ၎င်းက ပြောသည်။
ဆက်ကြေး မထည့်သူများကို ရွာမှ ထုတ်ပယ်ရမည် သာရေးနာရေး မကူညီရဟု PNO က ခြိမ်းခြောက်သဖြင့် မဖြစ်မနေ ရှာကြံထည့်နေရကြောင်း ဒေသခံများက ဆိုသည်။
“ကျနော်တို့ရွာတော့ ဒီလက ၄ သောင်းခွဲ ထည့်ရတယ်ဗျ။ ပုံမှန်ကောက်တာ သူများရွာက ၅ သောင်းလို့ ပြောတယ်။ ကျနော်တို့ရွာက အိမ်ခြေတွေကို လျော့ပြီး တင်ထားတော့ တစ်အိမ် ၄ သောင်းခွဲကျတာပ။ ပြည်ပမှာ သားသမီးရှိတဲ့သူက ထည့်ဖို့ သိပ်မခက်ပေမယ့် ရွာမှာပဲ ရှာစားနေရတဲ့ သူတွေကျတော့ အကြွေးယူပြီး ထည့်ကြရတာများတယ်။ ညီညွတ်ရေးဆိုတော့ ထည့်ရတာပဲ”ဟု နောင်ကား ကျေးရွာအုပ်စုမှ ဒေသခံတစ်ဦးက ပြောသည်။
ပြီးခဲ့သည့် ဒီဇင်ဘာတွင်လည်း PNO က နောင်ကား ကျေးရွာအုပ်စုတွင် တစ်အိမ် ၅ သောင်းကျပ် ဆက်ကြေး ကောက်ခဲ့သေးသည်။
ထို့ပြင် နိုဝင်ဘာလတွင်လည်း စစ်မှုထမ်းစရိတ် မထည့်နိုင်သည့် တောင်ကြီးမြို့နယ်၊ ဝင်းယကျေးရွာရှိ ပြည်သူတစ်ဦး၏ နေအိမ်ကို PNO က ဖျက်ဆီးခဲ့ဖူးသည်။
PNO သည် ယခင်က တော်လှန်ရေးတပ်ဖွဲ့ ဖြစ်ခဲ့ဖူးသော်လည်း ၂၀၀၉ ခုနှစ်တွင် ဦးအောင်ခမ်းထီ ဦးဆောင်ကာ စစ်တပ်လက်အောက်ခံ အသွင်ပြောင်း ပြည်သူ့စစ်အဖြစ် ပြောင်းလဲ ဖွဲ့စည်းခဲ့သည်။
လက်ရှိတွင်လည်း စစ်ကောင်စီတပ် နှင့်အတူ ကရင်နီပြည်ကို တိုက်ခိုက်နေသည့် အဖွဲ့ဖြစ်သည်။
#MeKongNews
#နောင်ကား
#PNO
#ဆက်ကြေး
#ထပ်ကောက်
