မဲခေါင်၊ ဇန်နဝါရီ ၂၀
မနက်ဖြန် ဇန်နဝါရီ ၂၁ ရက်တွင် ရှမ်းပြည်မြောက်ပိုင်း၊ တန့်ယန်းမြို့အတွင်း၍ လိုင်စင်မဲ့ ကားနှင့် ဆိုင်ကယ်များကို စစ်ကောင်စီ၏ အဖွဲ့ပေါင်းစုံက လိုက်လံဖမ်းဆီးမည် ဖြစ်သဖြင့် ပြည်သူများ သတိပြုရန်လိုကြောင်း သတင်းရင်းမြစ်များက ပြောသည်။
မနက်ဖြန် နေ့လယ် ၁ နာရီမှ ညနေ ၃ နာရီအထိ စစ်ကောင်စီ၏ အဖွဲ့စုံက တန့်ယန်းမြို့အတွင်းရှိ ကားအရောင်းအဝယ် နေရာများ ဆိုင်ကယ် အရောင်းပြခန်းများအား ရှောင်တခင် ဝင်ရောက်ဖမ်းဆီးမည် ဖြစ်ကြောင်း သိရသည်။
ထို့ပြင် မြို့အဝင်အထွက်ရှိ ဂိတ်များ လမ်းမများတွင်လည်း စစ်ဆေးဖမ်းဆီးခြင်းကို ဆောင်ရွက်သွားမည် ဖြစ်သဖြင့် စစ်ကောင်စီ၏ ကညနယာဉ်လိုင်စင် မရှိသော ပြည်သူများအနေဖြင့် အသွားအလာ သတိပြုကြရန် သတင်းရင်းမြစ်က ပြောသည်။
“ရှမ်းပြည်အဖွဲ့အစည်းတွေ ထုတ်ပေးတဲ့ အခွန်စာရွက်ရှိလည်း မရပါဘူး။ စစ်ကောင်စီ ကညန လိုင်စင်မရှိတဲ့ ကားတွေ၊ ဆိုင်ကယ်တွေကို လမ်းမပေါ်မှာရော ဆိုင်တွေထဲမှာပါ ဝင်ရောက်ပြီး ဖမ်းဖို့လုပ်နေတာမလို့ ပြည်သူတွေအနေနဲ့ ဖြစ်နိုင်ရန် မနက်ဖြန် အပြင်မထွက်ကြဖို့ အသိပေးချင်ပါတယ်”ဟု တန့်ယန်းမြို့ သတင်းရင်းမြစ်က ပြော သည်။
ထို့ပြင် စစ်ကောင်စီ စစ်ဆေးရေးအဖွဲ့သည် လူနေရပ်ကွက်များ အတွင်းထိ လမ်းများကို ပိတ်ဆို့ စစ်ဆေးရန် လုပ်ဆောင်နေပြီး ယာဉ်အမှုများသာမက အခြားအမှုများကိုပါ စစ်ဆေးတွေ့ရှိချက်အလိုက် ဖမ်းဆီးသွားမည်ဟု ၎င်းတို့၏ ညွှန်ကြားစာတွင် တွေ့ရသည်။
၎င်းတို့သည် ဇန်နဝါရီ ၁၆ ရက် နှင့် ၁၈ ရက်တွင်လည်း တန့်ယန်းမြို့တွင်းရှိ လိုင်စင်မဲ့ ကားများ၊ ဆိုင်ကယ်များကို စစ်ဆေးဖမ်းဆီးခြင်း ပြုလုပ်ခဲ့သေးသည်။
ယင်းစစ်ဆေးမှုအတွင်း ဖမ်းဆီးရမိသည့် ကားနှင့် ဆိုင်ကယ်များကို သိမ်းဆည်းသွားခဲ့ပြီး လူများကိုမူ ၃ လမှ ၆ လအထိ ထောင်ဒဏ် ချမှတ်ခဲ့ကာ ထောင်ကျမခံနိုင်သူများက ကျပ်သိန်း ၁၀၀ ပေးခဲ့ရသည်။
“ဖြစ်နိုင်ရင် မနက်ဖြန် ကား၊ ဆိုင်ကယ် နဲ့ အပြင်မထွက်တာ ကောင်းမယ်။ ပြီးခဲ့တဲ့ရက်ပိုင်းက ဖမ်းတဲ့အထဲမှာ ကား၊ ဆိုင်ကယ်ကို အပြီးသိမ်းတယ်။ လူတွေကိုတော့ သိန်း ၁၀၀ နဲ့ ပြန်ရွေးခိုင်းတယ်၊ မရွေးနိုင်တဲ့လူတွေကို ထောင်ဒဏ် ချမှတ်ခဲ့တာမလို့ အထူးသတိပြုပါဗျ။ ဖြစ်လာရင် ကယ်မရဘူးဗျ”ဟု သတင်းရင်းမြစ်တစ်ဦးက ပြောသည်။
စစ်ကောင်စီသည် ရှမ်းပြည်တွင် ပြီးခဲ့သည့်နှစ် မေလမှစ၍ လိုင်စင်မဲ့ကားများကို စတင် ဖမ်းဆီးလာခြင်းဖြစ်ပြီး ဖမ်းမိသည့် ကားများကို သိန်းရာချီဖြင့် ပြန်ရွေးခိုင်းခြင်းနှင့် ရောင်းစားခြင်းများ ပြုလုပ်နေသည်။
#MeKongNews
#တန့်ယန်း
#လိုင်စင်မဲ့
#စစ်ကောင်စီ
#ဝင်ဖမ်း
