မဲခေါင်၊ ဇန်နဝါရီ ၁၆
တိုက်ပွဲများအတွင်း ကိုးကန့်တပ်ဖွဲ့ MNDAA က လက်ရ ဖမ်းမိထားသည့် စစ်ကောင်စီတပ်ဖွဲ့ဝင် ၈၆ ဦးကို ထပ်မံ လွှတ်ပေးခဲ့ကြောင်း ခိုင်လုံသည့် သတင်းရင်းမြစ်များအရ သိရသည်။
စစ်ကောင်စီနှင့် ပြီးခဲ့သည့် တွေ့ဆုံမှုများ ရှိခဲ့ပြီးနောက်ပိုင်း စစ်သုံ့ပန်း ၈၆ ဦးကို ဇန်နဝါရီ ၁၄ ရက်က ထပ်မံ လွှဲပြောင်း ပေးအပ်ခဲ့ခြင်း ဖြစ်ကြောင်း သိရသည်။
“သိသမျှတော့ ထပရ – ၆၂၆ ရယ် အဆရ – ၇ ရယ်ပါတယ်၊ အားလုံး ၈၆ ယောက်။ ဒီလထဲကို နောက်ထပ် ၂၀၀ လောက် လွှတ်ဦးမယ် သိရတယ်”ဟု သတင်းရင်းမြစ်တစ်ဦးက မဲခေါင်သို့ ပြောသည်။
ယခု လွှတ်ပေးသည့် သုံပန်းများမှာ လောက်ကိုင်နှင့် ပါစင်ကျော် ဒေသတွင် လက်နက်ချခဲ့သူများ ဖြစ်ပြီး မည်သည့် အဆင့်များ ပါသည်ကို စိစစ်နေဆဲ ဖြစ်ကြောင်း ၎င်းက ပြောသည်။
၂၀၂၃ ခုနှစ် အောက်တိုဘာတွင် စတင်ခဲ့သည့် ၁၀၂၇ စစ်ဆင်ရေးမှစ၍ ၂၀၂၅ ခုနှစ် ဧပြီလအထိ စစ်ကောင်စီတပ်မှ ဗိုလ်ချုပ်နှင့် ဗိုလ်မှူးချုပ်အဆင့် ထိခိုက်သေဆုံးမှု ၂၇ ဦးအထိ ရှိခဲ့ကြောင်း MDSI က ယမန်နှစ်တွင် ထုတ်ပြန်ထားသည်။
ယင်းအနက် MNDAA နှင့် တိုက်ပွဲများတွင် စစ်ကောင်စီတပ် ထိခိုက်ဆုံးရှုံးမှု အများဆုံးဖြစ်ပြီး ဗိုလ်ချုပ်နှင့် ဗိုလ်မှူးချုပ်အဆင့် စစ်သုံ့ပန်း ၃ ဦး၊ လက်နက်ချ ၆ ဦး၊ သေဆုံး ၂ ဦး၊ အဆုံးစီရင်သူတစ်ဦး၊ စုစုပေါင်း ၁၂ ဦး ရှိခဲ့ကြောင်း ဖော်ပြထားသည်။
#MeKongNews
#စစ်ကောင်စီ
#သုံ့ပန်း
#MNDAA
#လွှတ်ပေး
