မဲခေါင် ၊ ဇန်နဝါရီ ၁၅
မူဆယ်တွင် မြန်မာ-တရုတ် နှစ်နိုင်ငံဝင်ထွက်သွားလာခွင့် BPစာအုပ် ဒေသအခေါ် စာအုပ်နီ ပြုလုပ်ရာတွင် မူဆယ်ခရိုင်လဝကမှူး ဦးထွန်းဇော်ဦးထံ ကျပ်သိန်းရာချီ လာဘ်ငွေများ ပေးနေရကြောင်း ဒေသခံ သတင်းရင်းမြစ်များကပြောသည်။
ယင်းသို့ စာအုပ်အနီပြုလုပ်ရာတွင် မူဆယ်ခရိုင်လဝကက မူဆယ်ခရိုင်အိမ်ထောင်စုစာရင်းဝင်သူများကို စာအုပ်တစ်အုပ်အတွက် အနည်းဆုံး ကျပ်သိန်း ၂၀ တောင်းပြီး မူဆယ်ခရိုင် စာရင်းဝင်မဟုတ်သည့်သူများကိုမူ ကျပ်သိန်း ၁၀၀ အနည်းဆုံး လာဘ်ငွေတောင်းကြောင်း သတင်းရင်းမြစ်ကပြောသည်။
“မူဆယ် အိမ်ထောင်စုဝင် မဟုတ်တဲ့သူတွေကို ဆေးစာအတုနဲ့လုပ်တယ်။ မူဆယ် အိမ်ထောင်စုဝင် မှတ်ပုံတင်နဲ့လုပ်ပြီး ရလာတဲ့စာအုပ်ကို မူဆယ်အိမ်ထောင်စုမဟုတ်တဲ့ တခြားသူရဲ့ ဓာတ်ပုံကို ပြောင်းထည့်ပြီး လုပ်ပေးတယ်။ ဒီတခုကတော့ အနည်းဆုံး သိန်း၁၀၀တောင်းနေတယ် လူတိုင်းကိုလည်း မလုပ်ပေးဘူး ပိုင်တဲ့လူရှိမှ လုပ်ပေးတဲ့ဟာလေ”ဟု မူဆယ်လဝကနှင့်နီးစပ်သူတစ်ဦးကပြောသည်။
မူဆယ်ခရိုင်လဝကမှူး၏ လုပ်ပိုင်ခွင့်ဖြင့် မူဆယ်ခရိုင် မဟုတ်သည့် အိမ်ထောင်စုဝင်များကို လာဘ်ငွေအများအပြားယူကာ စာအုပ်အနီထုတ်ပေးခြင်း ၊ မူဆယ်ခရိုင် ဌာနဆိုင်ရာ အကြီးအကဲများ၏ လက်မှတ်ဖြင့် ရုံးချုပ်ကို စာတင်ကာအရေးပေါ် စာအုပ်အနီလျှောက်ခြင်းစသည့် နည်းလမ်းပေါင်းစုံဖြင့် လာဘ်ငွေယူရာတွင် မူဆယ်ခရိုင်လဝကဦးစီးမှူး ဦးထွန်းဇော်ဦးကိုယ်တိုင် ပါဝင်လုပ်ဆောင်နေသည်ဟုလည်း သတင်းရင်းမြစ်ကပြောသည်။
“အမှန်ဆိုရင် မူဆယ် နမ့်ခမ်းအတွင်းမဟုတ်ရင် BP စာအုပ်အနီလုပ်ပေးလို့မရဘူး ယာယီဖြတ်သန်းခွင့်ဖြစ်တဲ့ TBP ပဲ လုပ်ပေးလို့ရတာ ။ မူဆယ်ကသိတဲ့အတိုင်း ဌာနဆိုင်ရာအတွက် ငွေတွင်းဖြစ်နေတော့ ငွေပေးနိုင်ရင် အကုန်လုပ်လို့ရနေတာပဲ၊လူကြီးတွေရဲ့ နောက်ဖေးပေါက်စားကွက်ပေါ့ဗျာ”ဟု မူဆယ်လဝကနှင့်နီးစပ်သည့် သတင်းရင်းမြစ်ကပြောသည်။
တရုတ်-မြန်မာနယ်စပ်တွင် တစ်နှစ် သွားလာခွင့် သက်တမ်းရှိသည် BP စာအုပ်အနီကို မူဆယ်ခရိုင်ဖြစ်သည့် မူဆယ်နှင့် နမ့်ခမ်းမြို့နယ် အိမ်ထောင်စုရှိသူများကိုသာ ပြုလုပ်ခွင့်ပေးထားပြီး အခြားမြို့နယ်မှ လာသူများကိုမူ ယာယီနယ်စပ်ဖြတ်သန်းခွင့် လက်မှတ် (TBP)သာ ပြုလုပ်ခွင့်ရှိသည်ဟု စစ်ကောင်စီကသတ်မှတ်ထားသည်။
“ကျွန်တော်တို့က မူဆယ်အိမ်ထောင်စုစာရင်းဝင်တာတောင် စာအုပ်နီလုပ်တာ တရုတ်ငွေ ၃၀၀၀ တောင်းတယ်။ အမှန်ဆို ပေးဖို့မှ မလိုတာနော် မပေးရင် နှစ်လစောင့်ရမယ်တဲ့ နှစ်လပြည့်လည်း မရပါဘူး”ဟု မူဆယ်ဒေသခံတစ်ဦးကပြောသည်။
ထို့အပြင် မူဆယ်ဒေသခံမဟုတ်သူများအတွက် ထုတ်ပေးသည့် ယာယီနယ်စပ်ဖြတ်သန်ခွင့်ကဒ် TBP စာအုပ်လုပ်ရာတွင်လည်း ဒုခရိုင်လဝကမှူးကိုယ်တိုင် ငွေ ကျပ် ၁၀သိန်းအထိ တောင်းစားကြောင်း စုံစမ်းသိရှိရသည်။
“ပုံမှန်အတိုင်း တုံကင်ယူပြီးလုပ်မယ်ဆို ၂ လကြာမယ်တဲ့ ပိုက်ဆံပေးပြီးလုပ်မယ်ဆို ၁၀ သိန်းတဲ့ ဒုခရိုင်မှူးအဖွဲ့က တောင်းတာ”ဟု သတင်းရင်းမြစ်ကပြောသည်။
မူဆယ်ခရိုင်လဝကများသည် ၎င်းတို့ရရှိသည့် လာဘ်ငွေများကို တောင်ကြီးမြို့ရှိ ပြည်နယ်လဝကမှူးနှင့် အခြားအရာရှိများကို တစ်လလျှင် ဝေစု ပြန်လည်ပေးဆောင်ရသည်ဟုလည်း မူဆယ်လဝကနှင့်နီးစပ်သည့် သတင်းရင်းမြစ်တစ်ဦးကပြောသည်။
“လဝက ခရိုင်မှူးက အောက်ခြေမှာ ဖြစ်နေတာတွေကို အရေးမယူလို့ အဆမတန်ငွေပေးနေရတယ်။ သူကအောက်ခြေဝန်ထမ်းတွေကို အရေးယူလိုက်ရင် အောက်ခြေက သူ့ကိုပြန်တိုင်မယ်ဆိုတာကို သူလည်းသိတယ်”ဟု မူဆယ်မြို့ အငြိမ်းစားကျောင်းဆရာတစ်ဦးကပြောသည်။
မူဆယ်ခရိုင်အတွင်းရှိ ပြည်သူအပါအဝင် ဒေသအသီးသီးမှ ပြည်သူများသည် တရုတ်နယ်စပ်တွင် စာအုပ်အနီနှင့် တစ်ပတ်ခံယာယီဖြတ်သန်းခွင့်ကဒ်တို့ဖြင့် သွားရောက်အလုပ်လုပ်ကိုင်ခြင်း၊ ကုန်စည်ကူးသန်းရောင်းဝယ်ခြင်းများ ပြုနေကြသည်။
#MeKongNews
#မူဆယ်
#လဝက
#ဦးထွန်းဇော်ဦး
#စာအုပ်နီ
