မဲခေါင်၊ ဇန်နဝါရီ ၁၄
တောင်ကြီးမြို့၌ ရုံးထိုင်သည့် စစ်ကောင်စီခန့် ရှမ်းပြည်တရားသူကြီးချုပ် သန်းဦးလွင်သည် အများပြည်သူပိုင် လမ်းမြေနှင့် ပလပ်မြေကို ၎င်းပိုင်မြေအဖြစ် ဂရန်ဖောက်၍ သိမ်းဆည်းရန် လုပ်ဆောင်နေကြောင်း ရပ်ကွက်ဒေသခံများနှင့် တရားရုံးနှင့် နီးစပ်သူများထံမှ သိရသည်။
တောင်ကြီးမြို့၊ ကံသာရပ်ကွက်၊ နယ်မြေ (၃) ရှိ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ဝန်ထမ်းအိမ်ရာဘေးကပ်လျက်ရှိ အစိုးရစီမံခန့်ခွဲပိုင်ခွင့်ရှိသော ပလပ်မြေပေါ်တွင် ပြည်နယ်တရားသူကြီးချုပ် သန်းဦးလွင် အမည်ဖြင့် ဂရန်ဖောက်ရန် စီစဉ်နေခြင်းဖြစ်သည်။
၎င်း၏တပည့်ဖြစ်သူ ထောင်ထွက်တစ်ဦးဖြစ်သော ရွှေလှမောင် ဆိုသူက တရားသူကြီးချုပ်ကိုယ်စား အဆိုပါကိစ္စများကို လုပ်ဆောင်ပေးနေခြင်းဖြစ်ကြောင်း ဒေသခံတစ်ဦးက ပြောသည်။
“ရွှေလှမောင်က တောင်ကြီးပျူစောထီးခေါင်းဆောင် သန်းရွှေနဲ့ပေါင်းပြီး အကုန်လုပ်နေတာ။ ရပ်ကွက်ကတော့ အများပြည်သူသွားတဲ့လမ်းကို ဖဲ့ယူတာမို့လို့ ရအောင်ကန့်ကွက်မယ်လို့ ပြောနေကြတယ်” ဟု ၎င်းက ဆိုသည်။
ယင်းအများပြည်သူသုံးလမ်းမှာ မူလက ၁၂ ပေ အကျယ်ရှိသော်လည်း ယခုအခါ ၅ ပေသာ ချန်လှပ်ထားကာ ကျန်မြေကွက်လပ်ကို ဂရန်ရရှိရန် စီစဉ်နေခြင်းဖြစ်ကြောင်း သိရသည်။
ယင်းမြေကွက်ကို သိမ်းယူရန် ၂၀၂၅ ခုနှစ်၊ ဒီဇင်ဘာလအတွင်းက မြေစာရင်းဝန်ထမ်းအချို့နှင့် ရှေ့နေများကို ခေါ်ဆောင်လာပြီး မြေတိုင်းတာမှုများ လုပ်ဆောင်ခဲ့သည်။
ယခုကဲ့သို့ လမ်းမြေကို ကျူးကျော်ကာ ကိုယ်ပိုင်မြေအဖြစ် ပြုလုပ်ရန် စီစဉ်နေမှုအပေါ် ရပ်ကွက်နေပြည်သူများက မြေစာရင်းဌာနသို့ ကန့်ကွက်ရန် ပြင်ဆင်ခဲ့ကြသည်။
သို့သော်လည်း တရားသူကြီးချုပ်၏ မြေဖြစ်သောကြောင့် ကန့်ကွက်၍မရကြောင်းနှင့် ကန့်ကွက်သူကို ပြန်လည်ဒုက္ခပေးမည်ဟု ရွှေလှမောင်က ခြိမ်းခြောက်ထားကြောင်း သိရသည်။
“ဒါက အများပြည်သူသွားလမ်းကို ယူတာ၊ ပြည်သူကို အနိုင်ကျင့်တာပါ။ ပြီးတော့ ပြည်သူကိုပါ ခြိမ်းခြောက်နေတာ ဖြစ်လို့ ကန့်ကွက်သွားမှာပါ” ဟု ကံသာရပ်ကွက်နေ ပြည်သူတစ်ဦးက မဲခေါင်သို့ ပြောသည်။
ရှမ်းပြည်တရားသူကြီးချုပ် သန်းဦးလွင်မှာ ယခင်တရားသူကြီးချုပ် ဦးကြွယ်ကြွယ် အငြိမ်းစားယူပြီးနောက် ၂၀၂၂ ခုနှစ်၊ ဒီဇင်ဘာလ ၅ ရက်နေ့တွင် စစ်ကောင်စီက ခန့်အပ်ခဲ့သူဖြစ်သည်။
၎င်းသည် ယခင်က အရှေ့ပိုင်းတိုင်းစစ်ဌာနချုပ် (ရပခ) ၏ စစ်ဘက်ဆိုင်ရာ ဥပဒေချုပ်အဖြစ် တာဝန်ထမ်းဆောင်ခဲ့သူလည်း ဖြစ်ကြောင်း သိရသည်။
#MeKongNews
#ရှမ်းပြည်
#တရားသူကြီးချုပ်
#သန်းဦးလွင်
#အများပိုင်မြေ
#မြေဂရန်
