မဲခေါင်၊ ဇန်နဝါရီ ၈
ရှမ်းပြည်တောင်ပိုင်း၊ ရပ်စောက်မြို့နယ်၊ ယမ်းတွင်ငါးကြောင် ကျေးရွာအုပ်စုတွင် စစ်ကောင်စီ လက်အောက်ခံ PNO ပြည်သူ့စစ် နှင့် SSPP တပ်ဖွဲ့၏ အောက်ခြေတပ်မှူးများက ယာမ ဆေးပြား ရောင်းချကြသည်ဟု ဒေသခံ သတင်းရင်းမြစ်များက ပြောသည်။
၎င်းလက်နက်ကိုင် ၂ ဖွဲ့က ခေါင်းဆောင်ငယ်များ ပေါင်းပြီး ယာမဆေးပြား ရောင်းချခြင်းကြောင့် ဒေသတွင်းတွင် မူးယစ်ဆေးဝါး သုံးစွဲသူ များလာနေသည်ဟု သတင်းရင်းမြစ်များက ပြောသည်။
“သူတို့ ၂ ဖွဲ့က ဗိုလ်ကြီးတွေ ဗိုလ်လေးတွေပေါင်းပြီး လုပ်စားကြတာဗျ။ PNO တွေက SSPP ဆီ သွားယူလာပြီး ရောင်းတယ်။ ပြီးတော့ တောင်ကြီးဘက်ကနေ ယူလာပြီး ရောင်းတယ်။ အဲ့ကနေ ရွာတိုင်းလိုလိုကို ယာမတွေ အလွယ် ဝယ်လို့ရအောင် တစ်ဆင့် ပြန်ရောင်းတဲ့ သူတွေကို သူတို့က ပြန်ချပေးတယ်။ လူတိုင်း သိပေမယ့် ဘယ်သူမှ မပြောရဲဘူး”ဟု သတင်းရင်းမြစ်တစ်ဦးက ပြောသည်။
ယမ်းတွင်းငါးကြောင်း ကျေးရွာအုပ်စု၊ ဆတ်သေ၊ မြေမဲကျေးရွာ အတွင်းတွင် PNO တပ်စွဲထားပြီး ကျေးရွာ အပြင်ဘက်တွင် ရှမ်းပြည် တိုးတက်ရေးပါတီ – SSPP က တပ်စွဲထားသည်။
“PNO တပ်ရင်း ၂၄ က ဆတ်သေ မြေမဲရွာထဲမှာနေတယ်၊ ရှမ်းစစ်တပ်က ဘုရားကုန်းရွာ နမ်းလက်ဘုရားတောင် ဆတ်သေ မြေမဲရွာ အပြင်ဘက်မှာ နေတယ်။ အဲမှာ PNO တွေက SSPP ဗိုလ်လုံ(ဗိုလ်ကြီး)ဆီ ယာမတွေသွားယူပြီး ရွာထဲမှာ သူတို့လူကို ပြန်ရောင်းခိုင်းတာတွေ တခြားရွာက ရောင်းပေးတဲ့သူတွေဆီ ပို့တာတွေ လုပ်တယ်။ ပြည်သူတွေက အဲလိုလုပ်တာ မကြိုက်ပေမယ့် ကြောက်တော့ ဦးဆောင် ပြောပေးမယ့် သူမရှိဘူး”ဟု ဒေသခံတစ်ဦးက ပြောသည်။
ထို့ပြင် ဆတ်သေ၊ မြေမဲကျေးရွာများတွင် တောင်ယာသွားရန် အတွက်လည်း SSPP/SSA ထံတွင် ပိုက်ဆံပေးကာ ဖြတ်သန်း သွားလာခွင့် လက်မှတ် ပြုလုပ်ရသည်ဟု ၎င်းက ဆိုသည်။
“တခြားရွာကို သွားလည်တာဖြစ်ဖြစ် ခြံသွားတာဖြစ်ဖြစ် လက်မှတ် လုပ်ရတယ်။ PNO တွေ ကိုယ်တိုင်လည်း လုပ်ရတယ်”ဟု သတင်းရင်းမြစ်က ပြောသည်။
ယမ်းတွင်းငါးကြောင်းကျေးရွာအုပ်စုတွင် စစ်ကောင်စီတပ်ဖွဲ့၊ လက်အောက်ခံ PNO ပြည်သူ့စစ်၊ ရှမ်းပြည် ပြန်လည် ထူထောင်ရေးကောင်စီ – RCSS နှင့် ရှမ်းပြည် တိုးတက်ရေးပါတီ – SSPP တပ်ဖွဲ့များ လှုပ်ရှားနေပြီး ဒေသခံများက အဖွဲ့အားလုံးကို အခွန်ပေးရသည်။
#MeKongNews
#SSPP
#PNO
#တပ်မှူး
#ယာမဆေးပြား
