မဲခေါင်၊ ဇန်နဝါရီ ၈
ရှမ်းပြည်၊ တောင်ကြီးမြို့ကို အဆင့်မြှင့်ရန် ဟုဆိုကာ စစ်ကောင်စီနှင့် အလွမ်းသင့်သူ ချယ်ရီကွင်း ဦးတိုးနှင့် ၎င်း၏တူ စိုးလင်းတို့ ခြယ်လှယ်နေသော Smart City စီမံကိန်းအရ စစ်ကောင်စီ အုပ်ချုပ်ရေးက လက်ရှိ ဂေါက်ကွင်း၊ ရုံးနှင့် ဆေးရုံ အချို့ကို မြို့ပြင် ထုတ်သွားရန် ရှိနေကြောင်း ပြည်နယ်အစိုးရနှင့် နီးစပ်သူများထံမှ သိရသည်။
ယင်းအား ၃ နှစ် စီမံကိန်းအဖြစ် ကနဦး လျာထားပြီး ဖျက်သိမ်းရမည့် နေရာများကိုမူ အမြန်ဆုံး ပြောင်းရွှေ့ ထွက်ခွာကြရန် ဖိအား ပေးနေကြောင်း သိရသည်။
ထို့ပြင် စီမံကိန်းတွင် ပါဝင်သည့် ဘောလုံးကွင်းမှ ဆိုင်ခန်းများ၊ လူနေတိုက်ခန်းများကို အမြန်ဆုံး ဖယ်ရှားရန်လည်း ဇန်နဝါရီ ၅ ရက်တွင် ဒုတိယအကြိမ် သတိပေးစာ ထုတ်ခဲ့သည်။
ပထမအကြိမ် သတိပေးစာကို ပြီးခဲ့သည့်နှစ် ဒီဇင်ဘာ ၃ ရက်က ထုတ်ပြန်ထားရာ ဖယ်ရှားရမည့် ဆိုင်ခန်းပေါင်း ၁၆၂ ခန်းနှင့် လူနေတိုက်ခန်း ၆၂ ခန်းရှိကြောင်း သိရသည်။
“အစားထိုးပေးမယ် မျှော်လင့်တာ မရတော့ဘဲ အခု လုံးဝ ဖယ်ပေးရတော့မှာ။ ငှားတဲ့ နှစ်ကလည်း နှစ် ၃၀ ပြည့်ပြီဆိုတော့ သက်တမ်းကုန် အကျုံးမဝင်တော့ဘူးပေါ့၊ လူနေ တိုက်ခန်းတွေလည်း ဘာလုပ်ပေးမယ်လို့ သေသေချာချာ မသိရသေးဘူး။ အခုစျေးနဲ့ အများစုက ဘာမှ ပြန်မဝယ်နိုင်ကြတော့ဘူး”ဟု ဒေသခံတစ်ဦးက မဲခေါင်သို့ ပြောသည်။
လက်ရှိတွင် ဆိုင်ခန်းများ ပြောင်းရွှေ့ရက် မပါသေးသော်လည်း တတိယအကြိမ် စာထုတ်ပါက စက်ယန္တရားနှင့် အင်အားသုံး ဖယ်ရှားခံရနိုင်ခြေကိုလည်း ဒေသခံများက စိုးရိမ်နေကြကြောင်း သိရသည်။
မြို့စီမံကိန်းအရ နေရာပြောင်းရမည့် အထဲတွင် တောင်ကြီး ဂေါက်ကွင်းလည်း ပါဝင်ပြီး၊ ကျောက်တစ်လုံး ဘက်သွားရာ ၁၄ မိုင်ခန့် ဝေးသည့် ထီးဖောင်းသို့ ပြောင်းရွှေ့ရမည် ဖြစ်ကြောင်း သိရသည်။
“စာထွက်လာတာ အတွင်းလူတွေ လောက်ပဲသိရသေးတယ်၊ ဂေါက်ကွင်းနေရာကို ဘာတွေဆောက်မယ် ဆိုတာတောင် လျာထားတာ Shopping Mall တောင်ပါတယ်။ ဂေါက်ကွင်းကို အမှီပြုနေရတဲ့ သူတွေ၊ ကယ်ဒီတွေတော့ ထမင်းအိုးကွဲပြီ။ မြို့စီမံကိန်းက ရေဆိုလည်း ရေထွက်တွေက ပိုက်တွေနဲ့ပေးဖို့ အကုန်ပါတယ်”ဟု ဂေါက်ကလပ်နှင့် နီးစပ်သူတစ်ဦးက မဲခေါင်သို့ ပြောသည်။
ယင်းဂေါက်ကွင်းကို ၁၉၅၁ ခုနှစ်က စတင် တည်ထောင်ခဲ့ခြင်းဖြစ်ပြီး ယခု ၂၀၂၆ ခုနှစ်တွင် (၇၅) နှစ်မြောက် ရွှေရတုတိုင်ခဲ့ပြီး ဖြစ်ကာ ယခင်က အသင်းသားများ၏ ရွေးချယ်မှုဖြင့် ဂေါက်ကလပ်ဥက္ကဌ အပါအဝင် အမှုဆောင် ရွေးချယ်သည့် စနစ်အစား အာဏာသိမ်းပြီး နောက်ပိုင်း ရှမ်းအစိုးက တိုက်ရိုက် ခန့်သည့်စနစ်ဖြင့် ဂေါက်ကွင်းကို ထိန်းချုပ်ထားခဲ့ကြောင်း သိရသည်။
ထို့ပြင် ဖယ်ရှားရမည့် အထဲတွင် အဆုတ်ဆေးရုံမှ ဆိုင်ခန်းများ ပါဝင်နေသလို ဆေးရုံအချို့နှင့် ရုံးအချို့လည်း ပြောင်းရွှေ့ရမည် ဖြစ်ရာ ခရိုင်တရားရုံးမှာ စူဠာမုနိအဆင်း ဓာတ်ဆီဆိုင်ဘေး ရထားလမ်း အောက်ဘက်တွင် တည်ဆောက်နေပြီ ဖြစ်ကြောင်း သိရသည်။
ယင်းလုပ်ငန်းများကို စစ်ကောင်စီနှင့် အလွမ်းသင့်သူ ချယ်ရီကွင်း ဦးတိုးနှင့် ၎င်း၏တူ စိုးလင်းတို့က ရှေ့ထွက် လုပ်ဆောင်နေသော်လည်း နောက်ကွယ်တွင် ခရိုနီကြီးတစ်ဦး၊ သို့မဟုတ် အချို့ရှိနေသည်ဟု တောင်ကြီး ဒေသခံများက ဝေဖန်နေကြသည်။
ထို့ပြင် တောင်ကြီး စည်ပင်ကလည်း ရှမ်းချယ်ရီတောင်တန်း ကုမ္ပဏီနှင့် ပေါင်း၍ ဗိုလ်ချုပ်ပန်းခြံတွင် ၃ ထပ်ဆိုင်ခန်းများ ဆောက်လုပ်ရန် စီစဥ်နေသည်။
ယင်းအပေါ်တွင်လည်း ပန်းခြံ၏ အလှနှင့် အများပြည်သူ အပန်းဖြေနေရာ ပျက်စီး ပျောက်ကွယ်မည်ကို စိုးရိမ်သော မြို့ခံများက မကျေမနပ် ဖြစ်နေကြသည်။
#MeKongNews
#စစ်ကောင်စီ
#ချယ်ရီကွင်းဦးတိုး
#တောင်ကြီး
#စီမံကိန်း
