မဲခေါင်၊ ဇန်နဝါရီ ၆
ရှမ်းပြည်တောင်ပိုင်း၊ ပင်လောင်းမြို့နယ်တွင် စိုက်ခြံသွားမည် ဟုဆိုကာ ထွက်သွားသည့် အမျိုးသားတစ်ဦး အိမ်ပြန်မရောက်ဘဲ ပျောက်ဆုံးနေသည်မှာ တစ်လရှိပြီ ဖြစ်ကြောင်း နီးစပ်သူများထံမှ သိရသည်။
တီကျစ်မြို့၊ မွန်းပင်ရွာနေ ခွန်မောင်ပွဲ ဆိုသူသည် ပြီးခဲ့သည့် ဒီဇင်ဘာလ ၄ ရက် ကတည်းက နေအိမ်မှ ထွက်သွားပြီးနောက် အဆက်အသွယ် လုံးဝမရတော့ဘဲ ယနေ့ထိ ပျောက်ဆုံးနေကြောင်း သိရသည်။
“သူက တောထဲမှာပဲ ပျောက်တာလား၊ အဖမ်းခံရတာလား ဆိုတာ အခုထိ သူနဲ့ပက်သက်တာ ဘာမှ မကြားရသေးဘူး။ တစ်ခါတလေ သူက အရက်မူးရင် လျှောက်သွားတတ်တယ်။ ဒါပေမယ့် တစ်ရက် ၂ ရက်ပဲ၊ အိမ်ပြန်ရောက်လာတယ်။ အခုက တစ်လရှိနေပြီ သတင်းလည်း မရတော့ မိသားစုတွေက အရမ်း စိတ်ပူကြတယ်” ဟု နီးစပ်သူ တစ်ဦးက မဲခေါင်သို့ ပြောသည်။
ခွန်မောင်ပွဲအား ရွာခံများက စုပြီး တောတောင်ထဲ လိုက်ရှာသော်လည်း မည်သည့် သဲလွန်စမျှ မတွေ့ရကြောင်း ၎င်းက ဆက်ပြောသည်။
ပြီးခဲ့သည့် ဒီဇင်ဘာ ၂၄ ရက်တွင်လည်း တောင်ကြီးမြို့၊ ဘုရားဖြူ ရပ်ကွက်နေ အသက် ၁၆ နှစ်အရွယ် မောင် အနဂ္ဂရဲထက်သည် အပြင်သို့ ဆိုင်ကယ်ဖြင့် ထွက်သွားရာမှ နေအိမ်သို့ ပြန်မရောက်လာဘဲ ပျောက်ဆုံးသွားခဲ့ပြီး ဒီဇင်ဘာ ၃၀ ရက်တွင် ရုပ်အလောင်းကိုသာ ပြန်တွေ့ရကြောင်း မြို့ခံများထံမှ သိရသည်။
စစ်အာဏာသိမ်းပြီး နောက်ပိုင်း ရှမ်းပြည်အပါအဝင် မြန်မာနိုင်ငံတစ်ဝှမ်း ဒေသစုံတွင် လူပျောက်မှုများ ဆက်တိုက် ဖြစ်ပွားနေပြီး အများစုမှာ အမျိုးသား လူငယ်၊ လူလတ်ပိုင်းများ ဖြစ်ကြသည်။
ယင်းဖြစ်စဉ်များတွင် စစ်မှုထမ်းအတွက် ပေါ်တာဆွဲခံရခြင်း၊ ပြန်ပေးဆွဲခံရခြင်း၊ လုယက် သတ်ဖြတ်ပြီး အလောင်း ဖျောက်ခံရခြင်းတို့က အဓိကဖြစ်ပြီး သေသည်၊ ရှင်သည် မသိရဘဲ ပျောက်ဆုံးနေသူများလည်း အများအပြား ရှိနေသည်။
#MeKongNews
#ပင်လောင်း
#အမျိုးသားတစ်ဦး
#ခွန်မောင်ပွဲ
#ပျောက်ဆုံး
