မဲခေါင်၊ ဇန်နဝါရီ ၄

အိမ်သုံးပစ္စည်းနှင့် အဝတ်အထည်များအပါအဝင် ဖမ်းဆီးရမိထားသည့် ကုန်စည်များကို စစ်ကောင်စီထိန်းချုပ်ထားသည့် ရှမ်းပြည်နယ်မြောက်ပိုင်း၊ လားရှိုးမြို့ရှိ ခရိုင်ရဲရုံးမှ ရဲဝန်ထမ်းများက ၎င်းတို့အချင်းချင်း ခွဲဝေယူနေကြကြောင်း သတင်းရင်းမြစ်များက မဲခေါင်ထံ သတင်းပေးပို့ တိုင်ကြားသည်။

ပြီးခဲ့သည့် ဒီဇင်ဘာလ ၃၀ ရက်နေ့က လားရှိုးခရိုင်ရဲရုံးသည် ကုန်စည်များကို ဖမ်းဆီးပြီး ကားများကို ရုံးဝန်းအတွင်း သွင်းထားခဲ့ကြောင်း၊ ယင်းနောက် ကားများပေါ်တွင် ပါလာသည့် ပစ္စည်းများကို ခရိုင်ရဲရုံးမှ ရဲဝန်ထမ်းများက ချယူ၍ အချင်းချင်း ခွဲဝေယူနေကြခြင်းဖြစ်ကြောင်း သတင်းရင်းမြစ်တစ်ဦးက ပြောသည်။

“လားရှိုးခရိုင်ရဲမှူး မြင့်အောင်အနေနဲ့ တာဝန်ယူမဖြေရှင်းဘဲ အောက်ကလူတွေကို ဒီတိုင်းလွှတ်ထားတော့မှာလား။ တရားမဝင်ကုန်စည်ဆိုပြီး ဖမ်းတယ်၊ ပြီးတော့ အဲဒီကုန်တွေကို ခရိုင်ရုံးထဲက ရဲမေတွေနဲ့ ရဲတွေက ခွဲယူကြတာ။ တချို့ဆို အိတ်လိုက်ပဲ။ ကုန်သည်တွေအနေနဲ့ ဘာမှလည်း ပြန်မရတော့ဘူး။ ကားပေါ်က ပစ္စည်းတွေကို ခရိုင်ရုံးကလူတွေက အကုန်ယူကြတာ၊ ဒါကို စစ်ဆေးပေးစေချင်တယ်” ဟု ၎င်းက ဆိုသည်။

ဖမ်းဆီးခံထားရသည့် ကားများတွင် ၁၂ ဘီးကားကြီးများ အပါအဝင် အိမ်သုံးကားငယ် စုစုပေါင်း ၈ စီးကျော် ရှိနေကြောင်း သိရသည်။

ဖမ်းဆီးခံရသည့် ကုန်ပစ္စည်းများမှာ အရုပ်များ၊ အဝတ်အထည်များနှင့် ပန်းကန်ခွက်ယောက်များ ဖြစ်ကြောင်း သိရသည်။

စစ်ကောင်စီသည် နယ်စပ်မှ ကုန်ပစ္စည်းတင်သွင်းခွင့်များကို ပိတ်ပင်ထားပြီး၊ သယ်ဆောင်လာသည့် ကားများကို တရားမဝင်ကုန်စည်တင်ဆောင်မှုဖြင့် ဖမ်းဆီးအမှုဖွင့်ခြင်းများ ပြုလုပ်လျက်ရှိသည်။

#MeKongNews
#လားရှိုး
#ခရိုင်ရဲတပ်ဖွဲ့မှူး
#ကုန်တင်ကား
#ဖမ်းဆီး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)