မဲခေါင်၊ ဇန်နဝါရီ ၂
ရှမ်းပြည်တောင်ပိုင်း၊ မိုးနဲ – ဆိုက်ခေါင် လမ်းပိုင်းရှိ ပွန်ချောင်းထဲ၌ PNO ထိပ်ပိုင်းများ ပတ်သက် ပိုင်ဆိုင်သည့် သစ်ကားအစီး ၅၀ ဝန်းကျင်ကို စစ်ကောင်စီတပ်က ဖမ်းဆီးထားကြောင်း ခိုင်လုံသည့် သတင်းရင်းမြစ်များအရ သိရသည်။
ယင်းသစ်ကားများကို ဒီဇင်ဘာ ၂၈ ရက်၊ ရွေးကောက်ပွဲ အပိုင်း – ၁ မတိုင်မီ ရပခ တိုင်းမှူး ဗိုလ်ချုပ် ကျော်နိုင်ဦး၏ သဘောတူညီမှုဖြင့် ဟိုပုံး နည်းပညာကျောင်းအုပ် ဗိုလ်မှူးချုပ် သန့်ထင်စိုး အမိန့်အရ ဖမ်းဆီးခဲ့ခြင်း ဖြစ်ကြောင်း သိရသည်။
“တိုင်းမှူးနဲ့ တစ်ပတ်စဥ်ထဲ ဆိုတော့ သူက လုပ်လို့ကိုင်လို့ ပိုကောင်းနေတဲ့ သဘောပဲ၊ သစ်ကား ဖမ်းလိုက်တာ PNO တွေ တင်းသွားပြီး တန်ပြန် လက်စားချေမယ့် အစီအစဉ်တွေ ရှိနေပြီး လောလောဆယ်တော့ ရွေးကောက်ပွဲမှာ ဝန်ကြီးချုပ် ဦးအောင်အောင်ကို မဲမထည့်ဘဲနဲ့ ဆန္ဒပြတာကို ခံလိုက်ရခြင်း ဖြစ်တယ်။ ဗိုလ်ချုပ်သန့်ထင်စိုးက လင်းခေး ဗျူဟာမှူးက လာတာဆိုတော့ PNO နဲ့ နီးကပ်တဲ့ ဆက်ဆံရေးရှိပြီး PNO အဖွဲ့တွေ အကူအညီနဲ့ တမလန်း ဆက်တီမျိုးစုံကို နေပြည်တော်အထိ အမြဲမပြတ် ဆက်ကပ်လှူဒါန်းပြီး နေရာတည်မြဲရေးက ကျားကန်ထားနိုင်သူ။ PNO ကျေးဇူးကြောင့် ဆပ်ပြာကောင်းလို့ ခေါင်းပေါင်းဖြူခဲ့ရသူက ကျေးဇူး ကန်းတာကြောင့်လေ”ဟု CDM ဗိုလ်ကြီး ဇင်ယော်က မဲခေါင်သို့ ပြောသည်။
အမှန်မှာ ကုန်ကားများကိုသာ ဖမ်းဆီးရန် ဖြစ်သော်လည်း ဗိုလ်မှူးချုပ် သန့်ထင်စိုး အမိန့်ကြောင့် သစ်ကားများကို ဖမ်းဆီးရခြင်း ဖြစ်ပြီး ယင်းကားများကို တစ်ည ၅ စီး ပြန်လွှတ်ပေးရန် သဘောတူထားသည်ဟု ၎င်းက ပြောသည်။
စစ်ကောင်စီသည် တရားမဝင် ကုန်တင်သည် ဟုဆိုကာ ရှမ်းမြောက်မှ ကုန်ကား အစီး ၈၀ ခန့်ကိုနောင်ဝိုး၊ ရပ်စောက်တွင် ဖမ်းဆီးအမှုဖွင့် ထားသော်လည်း ရှမ်းအရှေ့တွင်မူ ဟိုပုံး နည်းပညာကျောင်းအုပ် ဗိုလ်မှူးချုပ် သန့်ထင်စိုး အမိန့်ဖြင့် ဖမ်းဆီးခြင်း၊ ပြန်လွှတ်ခြင်းများ လုပ်နေကြောင်း သတင်းရင်းမြစ်များထံမှ သိရသည်။
ပုံစာ – ရှမ်းပြည်အတွင်း သွားလာနေသော တရားမဝင် လိုင်စင်မဲ့ သစ်ကားများ
#MeKongNews
#ပွန်ချောင်း
#ဗိုလ်မှူးချုပ်သန့်ထင်စိုး
#PNO
#သစ်ကား
