မဲခေါင်၊ ဒီဇင်ဘာ ၂၉

ကျားဖြန့်၊ လောင်းကစား နှင့် မူးယစ်ဆေးဝါး စသည့် တရားမဝင် လုပ်ငန်းများမှ ရရှိသည့် လိုင်းကြေးများ အဝေမတည့်သဖြင့် ရှမ်းပြည်မြောက်ပိုင်း၊ မူဆယ်စခန်းရဲများ အပြန်အလှန် တိုင်ကြားနေကြသည်ဟု ရဲတပ်ဖွဲ့နှင့် နီးစပ်သည့် သတင်းရင်းမြစ်များထံမှ သိရသည်။

လိုင်းကြေးများအား အဓိက တောင်းရသည့် မူဆယ်မြို့နယ် နယ်ထိန်းရဲအုပ် ရဲနောင်က လိုင်းကြေးများ ပြန်ခွဲပေးရာတွင် မူဆယ်မြို့မ စခန်းမှူး ဒုရဲမှူး နေဆန်းနှင့် အဝေမတည့်ရာမှ ပြည်ထဲရေးသို့ အပြန်အလှန် တိုင်ကြားခဲ့ခြင်း ဖြစ်ကြောင်း သိရသည်။

“ဝေစုပြဿနာ တက်တော့မှ စခန်းမှူးက နယ်ထိန်း ရဲအုပ်ရဲနောင်ကို အိမ်ထောင်ရှိ အမျိုးသမီးတစ်ဦးနဲ့ ဖောက်ပြန်နေတယ် ဆိုပြီး ပြည်ထဲရေးဝန်ကြီးထံ လိပ်မူတပ်ပြီး တိုင်တာပေါ့။ ရဲနောင်ကလည်း စခန်းမှူးက အမှုသည်နဲ့ အချုပ်သားတွေဆီကနေ အတင်းအကြပ် ငွေတောင်းတယ်၊ ငွေညှစ်ပြီး လာဘ်စားတယ်ဆိုပြီး ပြည်နယ်ရဲတပ်ဖွဲ့နဲ့ ပြည်ထဲရေးကို ပြန်တိုင်တာ။ ဝေစုခွဲတာ မကျေနပ်လို့ အောက်ဖဲလှန်ကြတာ။ တိုင်တာက ဒီလထဲမှာပဲ အပြန်အလှန် တိုင်ကြတာ”ဟု သတင်းရင်းမြစ်က ပြောသည်။

စစ်ကောင်စီ ထိန်းချုပ်ထားသည့် မူဆယ်မြို့တွင် စစ်တပ်၊ ရဲ၊ မှုခင်းတပ်ဖွဲ့၊ စရဖနှင့် သက်ဆိုင်ရာဌာနများကို လိုင်းကြေး သိန်းရာနှင့်ချီ ပေးပြီး ပြည်သူ့စစ်နှင့် သူဌေးများက ကျားဖြန့်၊ လောင်းကစား၊ ပြည့်တန်ဆာ အပါအဝင် တရားမဝင် လုပ်ငန်းများကို လုပ်ကိုင်နေကြသည်ဟု သတင်းရင်းမြစ်တစ်ဦးက ပြောသည်။

မူဆယ်တွင် ကျားဖြန့်ရုံကြီးကို တစ်လ သိန်း ၂၀၀ ၊ ရုံသေး သိန်း ၁၀၀၊ လောင်းကစားဂိမ်းရုံ အကြီး သိန်း ၁၅၀ ၊ ရုံအလတ် သိန်း ၈၀၊ ရုံအသေး သိန်း ၅၀၊ ပြည့်တန်ဆာခန်း တစ်လ ၂၅ သိန်း၊ KTV နှင့် မာဆတ် တစ်လ သိန်း ၅၀ ပေးရပြီး ယင်းရုံများအတွင်း ယာမဆေးပြား၊ အိုက်စ်၊ ဘိန်းဖြူ၊ ဟက်ပီးဝါးတား စသည့် မူးယစ်ဆေးများ ရောင်းချပါက ယင်းအတွက် လိုင်းကြေး ထပ်မံပေးရသည်ဟု ၎င်း၏ ပြောကြားချက်အရ သိရသည်။

“လိုင်းကြေးတွေကို ရာထူး ကြီးငယ်အလိုက် ခွဲဝေယူကြတာ။ လောင်းကစားရုံတွေကို ပြည်သူ့စစ်တွေက လုံခြုံရေး ယူပေးပြီး တာဝန်ယူထားတာ ဆိုတော့ ပြည်သူက ဘာမှပြောလို့မရ အနားကပ်လို့ မရပါဘူး။ ပြည်သူ့စစ်တွေက တာဝန်ယူပြီးလုပ် စကစတွေက လိုင်းကြေးတွေနဲ့ အေးဆေး နှပ်နေတာပေါ့။ ဒီဘက်က ပြည်သူ့စစ်အဖွဲ့တွေ ရက်ကြီးခါကြီး ရောက်လို့ တိုင်းမှူးတွေ ပြည်နယ်ရဲမှူးတွေကို သွားကန်တော့ရင် မုန့်ပုံးထဲ ရွှေချောင်းတွေနဲ့ ကန်တော့တာဗျ။ အခုခေတ်က အဲလိုပြန်ဖြစ်နေပြီ”ဟု ရဲတပ်ဖွဲ့နှင့် နီးစပ်သည့် သတင်းရင်းမြစ်တစ်ဦးက ပြောသည်။

မူဆယ်မြို့တွင် စစ်ကောင်စီ လက်အောက်ခံ ပြည်သူ့စစ်အဖွဲ့ ၁၀ ဖွဲ့ထက်မနည်းရှိပြီး ၎င်းတို့သည် စစ်တပ်နှင့် ရဲများကို လိုင်းကြေးပေးကာ ကျားဖြန့်၊ လောင်းကစား၊ ပြည့်တန်ဆာရုံ၊ မူးယစ်ဆေး အရောင်းအဝယ်များကို လုပ် ကိုင်နေကြသည်ဟု ၎င်းက ဆက်ပြောသည်။

#MeKongNews
#ကျားဖြန့်
#လိုင်းကြေး
#အဝေမတည့်
#မူဆယ်ရဲ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)