မဲခေါင်၊ ဒီဇင်ဘာ ၂၄
ရှမ်းပြည်မြောက်ပိုင်း၊ တန့်ယန်းမြို့တွင် အမျိုးသမီးတစ်ဦးကို ပြန်ပေးဆွဲပြီး ကျပ်သိန်း ၅၀၀ ဖြင့် ပြန်ရွေးခိုင်းမှုတွင် ကျူးလွန်သူများဖြစ်သည့် တရားခံ ၆ ဦးကို ဖမ်းဆီးမိခဲ့သည်ဟု ရှမ်းပြည်တိုးတက်ရေးပါတီ/ ရှမ်းပြည်တပ်မတော် – SSPP က သတင်းထုတ်ပြန်သည်။
ပြန်ပေးဆွဲခံရသူ အမျိုးသမီးသည် မိုင်းရှုးဇာတိဖြစ်ပြီး မိုင်းလားတွင် ရောက်ရှိနေစဉ် အလုပ်မရှိကြောင်း လိုင်းပေါ် တင်ရာမှ ပြန်ပေးဆွဲသူများက တန့်ယန်းတွင် အလုပ်ရှိကြောင်း အလုပ်လိုချင်ပါက တန့်ယန်းလာရမည်ဟု ဆက် သွယ်ပြောဆိုသဖြင့် အမျိုးသမီး ရောက်လာသည့်အခါ ပြန်ပေးသမားများက ဖမ်းဆီး ခေါ် ဆောင်သွားခြင်း ဖြစ်သည်။
“ကောင်မလေးက ၁၈ နှစ်ပဲ ရှိသေးတယ်ဗျာ၊ အလုပ်ရမယ်ထင်ပြီး တန့်ယန်းကို ဆင်းလာတာ ရောက်တာနဲ့ ပြန်ပေးဆွဲသမားတွေက ကားပေါ်တင် လက်ထိပ်ခတ်ပြီး မျက်လုံးကိုလည်း ပိတ်ထားလိုက်တယ်။ အခန်းတစ်ခုထဲမှာ သုံးရက်လောက် ဖမ်းထားပြီးမှ မိဘတွေဆီကို ဖုန်းဆက်ခိုင်းပြီး ငွေသိန်း ၅၀၀ နဲ့ ရွေးခိုင်းတာတဲ့ဗျာ။ ကလေးသာသာ လူငယ်တွေပဲ ရုပ်ကြည့်ရတာ ဆယ်ကျော်သက် အရွယ်တွေပဲဗျ။ ပိုက်ဆံကို အလွယ်လမ်းနဲ့ ရချင်ကြတော့ လုပ်သင့်မလုပ်သင့် မစဉ်းစားတတ် ကြတော့တာလေ”ဟု ဖြစ်စဉ်သိရှိသူ သတင်းရင်းမြစ်တစ်ဦးက ပြောသည်။
ပြီးခဲ့သည့် ဒီဇင်ဘာ ၁၅ ရက်တွင် ယင်းအမှု ဖြစ်ပွားခဲ့ကာ ဒီဇင်ဘာ ၁၉ ရက်တွင် ပြစ်မှုကျူးလွန်သူ လူငယ် ၆ ဦး SSPP က ဖမ်းမိထားပြီး ပြန်ပေးဆွဲခံရသည့် မိန်းကလေးကိုလည်း မိသားစုထံ ပြန်လည် အပ်နှံခဲ့သည်ဟု SSPP ကထုတ်ပြန်သည်။
ဖမ်းမိသည့် ပြန်ပေးသမားများကိုမူ ဥပဒေအရ အရေးယူသွားမည်ဟု SSPP ကဆိုသည်။
“ပြန်ပေးဆွဲတဲ့ သူတွေကလည်း လူငယ်တွေပဲ ရှမ်းစကား ကျွမ်းကျွမ်းကျင်ကျင် ပြောတတ်တယ်။ အခုတော့ အဲ့လူတွေကို ဝတ်စုံစိမ်းတပ်- SSPP က ဖမ်းဆီးလိုက်ပြီ။ တန့်ယန်းမှာက အဖွဲ့စုံတော့ အမှုတွေကလည်း အစုံပဲ မူးယစ်ဆေးဝါးလည်း ပေါတယ်လေ”ဟု သတင်းရင်းမြစ်က ပြောသည်။
ယင်းလူငယ် ၆ ဦးကို SSPP က တန့်ယန်းမြို့တရုတ်သင်္ချိုင်း အနီးရှိ နေအိမ်တစ်ခုတွင် ဝင်ရောက်စီးနင်းပြီး ဖမ်းဆီးခဲ့ခြင်း ဖြစ်သည်။
ကျူးလွန်သူများသည် အသက် ၁၉ နှစ်မှ ၂၀ ကျော်အရွယ် ရှိသူများဖြစ်ပြီး တန့်ယန်းမြို့နယ်၊ ဝိန်းမိုင်ကျေးရွာအုပ်စု ဝိန်းမိုင်ကျေးရွာ၊ ကွန်ဟုန်းကျေးရွာနှင့် မိုင်းကျိုင်ကျေးရွာအုပ်စု၊ ဟွေအောကျေးရွာတွင် နေထိုင်သူများ ဖြစ် ကြောင်း SSPP ထုတ်ပြန်ချက်တွင် ဖော်ပြထားသည်။
#MeKongNews
#တန့်ယန်း
#အမျိုးသမီး
#ပြန်ပေးဆွဲ
#SSPP
#ဖမ်းဆီး
